Read Ninia Yali AYUB 15 Bible Online

AYUB 15 - Ninia Yali bible

AYUB 15

¹At Ayub en airoho ulug ebag ma, at Elifas en onggo hweag-utuk kwit de, “Ayub, haren de obahare hele matuk kahen. Haren hele ehen on etma re wene ebe di on fahet ulug fubireg eleg angge ehen. Ap enggat enap en de haren onggo uruk kahen eiya hagdoho uruk eleg, wene ebe indip hwaleg eleg angge en de, enele fam enonggwareg en inili og-dauk fug.

⁴Ne, haren ehen ale ai ap en holoho duk men de, ap misig en ulug oho eke Allah fam akol beheg, somban eheg, duk fug halereg.

⁵Hat honggwareg hele uruk kahen on etma fam de, hat siag dirihin anyo eneg atuk, famen de hat hele buhun uruk kahen ai fam de honggwareg hasiag omano sebel hauk kahen.

⁶Hat siag dirihin ulug aire an den hat hweag-hutuk kahi re fug, ite hat honggwareg hambilik fam en an siag dirihik ulug ehen.

⁷Haren boruk kwit de ap homi elegma kirim-keram endag-napswa on de an boruk kwit uruk kahen a? Dom-dom wal-duruk li em etare hat de wereg kweleg wal-debag a?

⁸At Allah duhuk ale ulug wenggelduk li em etare hat hesanggo holdihin a? ap homi fam en de we hat neg enggaron welahen a?

⁹Di ale su ale hat holuk deg on etare nit oho nenoluk deg neg, di wene su wene haren fureberuk kahen on etma re nit fam ohore enameg neg deg.

¹⁰Nit nenenda enggat deg on aire ap mundoho sobal atswareg konurebeswa on en nenobam fousa; it ap etma re hat hakni owan endag-am fug kweleg de it dam welatfag enap!

¹¹Niren de At Allah unuk fam nenenda sakoreg lit nenape bokdoho hweag-hutuk kahe; famen de At Allah en henda onggonoho hweag-hutuk on etma wa ale nunggwelug herim deg lahen?

¹²Famen de hat holok ahen deg horohole et, hil et mep sahaloho fehen deg,

¹³Haren Allah fam holok foruk kwit ele sahaloho duruk kahen.

¹⁴ Ap homi aire siag duk eleg angge eke wereg behen? Siag duruk neg. Ap aireg on Allah il hanim fanoapdoho fouk alereg a?

¹⁵It malaikat fam en ohore, iren At Allah il hanim eneg wereg fug mu re, it fam enda demdoho bouk fug alereg.

¹⁶Ne, nit ap homi mun nong-hong deg on, siag en neg dipni-dopno uruk on, siag aire mundoho ik hag deg lit hundig-handig duruk-wauk kwit welahe on oma fam de ebenaheg fanoapdoho nenobahauk fug alereg.

¹⁷Ayub ao, hesanggo holiyug, an den wene eke it ap enunggul owag enggat enap en

¹⁸endam etma hweag-nutswa ale eke hweag-hirikoho lahi. Wene ebere it enombasi en hweag-esebag ale re, iren wausareg de, iren enomaliki ondohoma on fam higit-hagatdoho fousa wene.

¹⁹Eta li em it enobam etma ap bohon eke welatfag fug, ne ap eke en it enebe Allah fam en laloho og-eneplug wilibik lauk katfag fug.

²⁰It ap kwasikdoho duruk on en enori sebel-enusug lit anggin-fanggin enobam foruk on etma re, enendama yehelik duruk kwit neg welamuhup.

²¹Aplohok humon on en de it enesanggo husik waharukmu re, it enebe enakol eleg angge fano wereg lit etano at, it ap heraharuk on etmano kwik waharuk kamuhup.

²²Aren de mun aik waharuk on anyo oko fouk ale wereg laruhu fug, hundig-hundig omano re it ap watni enasehen en de hundig mug-hauk karuhu mu re.

²³Sue nasar wareg filik nauk on nangginig li em waramuhuk ulug nangno hauk kwit de, iren wareg angge omano yin-hundoho nauk kamuhup.

²⁴Anggin on de raja mun along on hag, enowarik kwimin ulug mun fik-fouk deg wereg.

²⁵Airoho neg it ap homi Allah ele sahaloho folug duruk on mel; it ap homi enambong seroho At Mundoho Along wereg on anyo ele holeg eleg angge duruk on mel, enambiangma hahup.

²⁶At anyo re awonog fam de Allah inim wal-haul ulug kwik lalug de, aren andog beiangge perisai anyo leko re ik debouk fug angge fatlug kwik lauk.

²⁸At ebere o kota mundoho moluluk-malalakdoho deg kwe etmano; o ap homi elegma foluk kwe etmano wereg lit duruk. O kota etma re fobik ap en bin kuruk kwit meiyaloho embesehup, ulug mun abug wiliboho febag ma etmano.

²⁹Ap ai angge di angge su angge dungdoho wereg on etmano re dima laha suma laha elegdoho eyog obale eleg angge eleg aruhu; at angge wereg on ai mundoho eleg aruhu mu re eke nim welaruhu fug.

³⁰O mum on fam en de at dahandoho lahu fug, indok en de asimit wilibuhu on etmano han yal-enebuhu, At ebere Allah ambilik ahe en waroho lahu.

³¹Aren femdoho welam fug angge fam enda dip-deberuk halug de at lale foruk ai, ne aren onggo ambiangma hwelahu on oho re at fam am on eke welaruhu fug.

³²E enggik sawet atuk on enggela hesiluk fug alereg anyo hag, at ebe waratuk li owan deg ma wararuhu.[25]

³³At ebere e anggur anggen dahanoho wambeheg, e zaitun owil loloho wambeheg, duruk on hag aruhu.

³⁴Ap kwasikdoho duruk on halug de aren ondohoma on welamuhup fug; ne o ap en enangge enggik apmane hwelasireg witsi on aire mun han nahu.

³⁵It kwasikdoho duhuk ale ulug wene melalug de, uruk ale anyo duruk enap; wene seiale uruk on de it enendama hoporoho wereg,” ulug ebag.