Read Ninia Yali AYUB 16 Bible Online

AYUB 16 - Ninia Yali bible

AYUB 16

¹Aren airoho ebag famen de at Ayub en onggo uruk kwit de, “Nin salim ap en airoho boruk kahe ale ulug urukmu an nesanggo holduk kahi; Haren an nenda aho wat napuk kwit uruk kahen on etma re nebe nowatuk hagdoho uruk kahen.

³Nunggwe salim hele seiale neg uruk kahep on etma bale fohup? Nunggwe en henenda nauk en onggo uruk kahep?

⁴Hit henebe an nebe deg lalepman, ne an nebe su hit henebe deg lalepman de, an den oho hiren uruk kahep eta hagdoho uruk kale lit deg. An nunggul wan-duk uruk kwit, nele mun fano on fam hweag-hesele lit deg.

⁵Nawene komo diroho diyug suroho diyug ulug hweag-hesauk fam de hit henenda hambuge henobahakeg, henenda onggone henobahakeg, dele.

⁶An nele neg uruk kahimu re an naouk anyo se atuk fug; ne an nele eleg angge bok wereg latmin halug ohore an fam en eke nangginuk alereg en?

⁷At Allah en de an nahain elekwe on mundoho elehapdoho fesesi fam de, an mun anggolo-fanggoloroho nobahasi.

⁸Aren neg an nobam wene folug sen napsimu re, ketia nebe nahap mun iring-biring ahi su. Airoho atihik mu re it ap homi humdoho en boruk kwit de, at asiag disi anyo re ai fam eneg deg boruk.

⁹Allah mundoho aharoro fam an nahap bil-bal esasi; Ne, At ahum kwe het fam an il fu neauk katsi.

¹⁰Ap homi en de enembilik ele arebelug an enalitno napuk; ne an anyo ap en maseroho sen naplug de noroholanggen dagdoho nowatuk.

¹¹An anyo At Allah en de it ap enabut mun siag on enenggik fam nobahasi; ne it ap enenda esa fug angge enowatuk on fam fotog-neasi.

¹²O endam an nebe mun finik-fanoroho nakol eleg angge wereg kweleg; fetagdoho neg At Allah en nowarik wahasi. An nanduhunmu helmako og-napsireg de hwik-neasimu re; ap en enenggik wal-duruk kwit misigmu eke dugwiroho watuk anyo hag Aren an airoho napuk angge hag nobahasi.

¹³Mun enda nea fug angge, At andog en sele neg napuk men de; nahummu angge hililoho ilang-bulang isi.

¹⁴Aren de ap dog yapuk enap enamururu on fam debeseruk aleroho an nowatuk kwit de, hundig-handig nahap bale-nobahaik waharuk katsi.

¹⁵An nalong elehapdoho nobahasimu re nenda hesilduk en fong wat-dauk kwit de, karung sum belahi bugdoho ul fam hwerieg latihik.

¹⁶Airoho wereg lit noba yag dauk men de norohole mep sahalsi; nil indip de mun fitsireg de hesiloho daik isi.

¹⁷Famen de an den nobabut hape ale eke dirihik fug; ai fam de an den TUHAN fam somban irihik on aire nenda fano fam irihik anyo eneg atuk.

¹⁸Hat kwenang su, an den nolokdoho dirihik on de herahauk fug; ne an den wene katukdoho biling-numluhup ulug heng uruk kahi on aire sebele feselug welam fug.

¹⁹ An nili oko nibil atuk on aire At boholma wereg ai an noluk deg ma re; An siag dirihik fug on fahet aire Aren neg fagdoho uhu.

²⁰An nori en de siahapdoho bulip napuk kwit unda yag napukmu re; Noba yag-dauk kwit At Allah let-nabukwag ulug akit hweag-utuk kahi.

²¹Ap eke we it enori demdoho on en enenda fano fam inibil atuk hag de; We At Allah amu en neg At onggwareg il hanim an nibil atlug nili og-nabukwag ahi!

²²An we horog ketia dia neg mundoho lahukdeg nikangge waruhuk fug; tahun-tahun ambiangma dorangge welaruhuk on de mun dotdeg.