Read Ninia Yali AYUB 17 Bible Online

AYUB 17 - Ninia Yali bible

AYUB 17

¹Nebe eleg aruhuk li em mun horog atuk mu, sat lebeg uk ale napuk; an nobahet de we ap homi wareg on sal-enepukmu etmano neg wereg.

²Ap homi en de an anyo enalitno anggeap nobahalug de; iren an nik aleroho bulip napukmu esauk kahi.

³Nakni Allah, an de ap mun bekitdoho neg duruk kahi on deg ma, at demdoho uruk bein! Ap sa en eke an nele leko uk alereg ma? Mun eleg.

⁴Haren it enenda mun abiri ferihin mu re fureberuk fug mu re; iren ketia an sebeloho nobahauk no en e.

⁵Wene suwit eke uruk kwit de, ap eke en ambiangma hwelamin beheg, are nim yeik lahapuk halug de, ap ai omaliki re ambiangma duruk onggo[26] hahup.

⁶Ketiare wene suwit anyo on fam an enalitno-napuk kwit de iren an nolohotma wasulahap sup esaul ulug waharuk.

⁷Fong anggoloroho wat-dauk kahimu re nil mundoho hup bin atuk; ne nebe abirangge re mun saburoho bug atihik.

⁸Airoho deg ma nealug de it ap kwasikdoho duruk eleg on en de youk lalug yande napuk; ne it siag duruk eleg enap en de ap su Tuhan fam enda dipdeg eleg ahun boruk.

⁹Ap fano on et, ap siag duruk eleg on et, an Allah enda ahayeg hauk aleroho welahi ulug at ebe wereg ale fahet demdoho boruk kamag.

¹⁰Famen de hit henebe abirangge suma wahep famen de; ap misig eke enda wereg lit uruk hag eke wereg ma hisihi fug.

¹¹Nukoho an welahi on etano re mundoho eleg aik lasimu re, an den duhuk ale ulug wene abug wilibig on etmano re mundoho suhwi aik lasi; ne nendama duhuk ale ulug boruk katihik on etmano longgo ik lasi.

¹²Famen de an nombali en uruk kwit de, ‘Hup ai o nukoho atlug seleg enam aik waikohoreg on horog aik waha’ uruk. Airoho uruk on ai deg kweleg, an nebe fam o mum deg ma hag welahi ale ai an nendama noluk deg.

¹³We ap homi waratlug laukmu etma neg nenda ebereg welahimu re; we o mum deg ma etma lalug nohoruk karuhuk.

¹⁴An nebe sale nobahakupmu aire an den unuk de, Nayon, soaleheg, ne imbalo an nebe senggel-nabuhup on aire an den de, Ninga mel Nerek mel ulug soaleheg duhuk.

¹⁵An nenda eberoho welaruhukmu re kema aho; An nahayeg hauk karuhukmu eke ap san hauihin abi?

¹⁶An[27] waratlug ap wareg on wilibik laukmu etma lahukdeg de an nenda ebereg on eke welaruhu fug lit deg,” ulug ebag.