Read Ninia Yali AYUB 18 Bible Online

AYUB 18 - Ninia Yali bible

AYUB 18

¹Airoho ebag ma at Bildad en onggo uruk kwit de, “Ayub ahwi, nangginig li em hele bale femihin abi? Hele eleg amin, ketiare niren nenele uruk kahe.

³Nunggwelug haren nit fahet wam sapi nim higirap nenepuk kwit; ite ap morue on hag boruk kahen?

⁴Hasuahal olok ai fam de honggwareg en hebe oukap dauk kahen; Hat hobahetdoho ulug; ap homi o kwenangma suma eleg am alereg a? ne dom-dom anyo obalma yahoman oko amumu feik la alereg a? Mun eleg.

⁵ Ap kwasikdoho neg duruk on en enesahe ambogbag etma re nahul-esahup lit deg; ahaindok de nikangge eke nim nonggwale fohup fug.

⁶Obam Sabo salegma esahe ambogbagdeg on anyo re wat-wat kuruk karuhu; e lampu ombagbagdoho wereg on anyo re eke nim selehap duhu fug.

⁷Eiyog fanoroho sobotil lauk on anyo re dal-dal angge ril lauk karuhu; at onggwareg en duhuk ale ulug wene melaleg wereg on anyo fam dung dauk karuhu.

⁸Sum ahe yihig on ilonggo fil sobit-sobit laukmu re eyog salog-kwalog angge duruk karuhu;

⁹eyog anggul de yepdeg ma kurukmu re at ebe luhut atuk karuhu.

¹⁰Kwenangma re sabu yepdoho heraho; ne kobokwe at lauk on fam de asi belabeg laheg, sapna leho laheg, deg.

¹¹It ap kwasikdoho duruk on de, foman-foman enamelmel ale neg en de youk lauk; ne at lauk kwit de amelmeldoho neg lauk.

¹²Endam de at omamnereg latsi famen, de ketia re aren eke duk fug aleroho atsi. Di kwe su kwe re obam anggin atuk on anyo asisiroho noruk.

¹³Ahap de yebil en mundoho nasi; enggik mel, eyog mel de mun filik atsireg muluna wilibik waharuk.

¹⁴At ebere obam sabo salegma etmano finik-fanoroho weregman hambogmiroho walug de, waratuk on olohotma aik lowag ulug feik wahasi.

¹⁵Ketia re at obam sabo salegma aire ap sa halug oho welamluhup fano; ne ouk ai waroho wilibukwagdoho[28] re amben siag on hililik lakiek.

¹⁶Indip fil de omanggen mundoho bal-aha ma re bug ahareg iring aha; onggombi fil de enggik mundoho sawet ahareg halo eheik.

¹⁷It ap homi o kota ilonggo fil wereg on en mel, dag fil wereg on en mel, de ap su ulug fubi deberuk fug; at unuk de ap misig en oho eke ebereg wereg fug.

¹⁸O seleg fam etmano en de at anyo siloho o mum fam feik wahasi; ap enoluk wereg on wereg ma omano en at anyo hamboko hwik-esasi.

¹⁹At omaliki mel, aren ondohoma on enambiangma en mel, eke wereg fug; at obam indipmu etma ohore ap misig oho eke wereg fug.

²⁰At fam atsi ale ai hol halug de it ap homi o barat fil on de youk lauk; ne it ap homi timur fil wereg on de enakol en enowag elek duruk.

²¹At ap Allah en uruk ale anyo hole fouk eleg angge duruk on mel; it ap homi Allah enapeleg on mel, de it enambiangma airoho neg atuk,” ulug ebag.