Read Ninia Yali AYUB 19 Bible Online

AYUB 19 - Ninia Yali bible

AYUB 19

¹Airoho ebag famen de at Ayub en onggo uruk kwit de, “Nunggwelug hit henele fam an siaho nobahakeg, nenda oukap nobahakeg neg duruk kamluhup?

³Hit henenggali ha fug eleg anggere, hiren an siahapdoho nobahakeg, anggin-fanggindoho nobahakeg neg duruk kwit welahep.

⁴An den nobabut fam en siag ale dirihik halug oho re, an den dirihik ai fam hit alemaroho henobaharihik fug.

⁵Hiren boruk kwit de, nit neg de fanoreg lahe boruk kahep; Ne, an nobam anggin-fanggindoho welahi on ai fahet de an asiag disi on anyo ai fam enameg wereg boruk kahep.

⁶Famen de an de At Allah en asi yepdeg on fam luhut-napsireg; nobam anggin on foruk ale ai fu-nobahaiek.

⁷Mun ouk-boukdoho nobaharuk ai fam nele hwiruruk kahi famen de; ap misig en oho eke an fubi nobaharuk fug. An den hwiruruk kwit de, “Katukdoho duruk on aire kema wereg aho,” Uruk kahi; famen de ap en oho eke holduk fug.

⁸At Allah en an nanggobokwe bale fesimu re an sohwandoho lahi fug halereg. Ne nanggwe aire mundoho hupin debesi.

⁹Aren de an nangge di angge su angge mundoho del-dasireg de, an nunuk fano welatsi anyo Aren mundoho siahap debesi.

¹⁰Aren an nebe nombandu foman-foman inim, nambol-nalukwe fil en inim, fulambe nobahasi. E kwenangma yaho on ap en omanggen sanog debelug; hesama leireberukmu sawet atuk anyo hag de, an nendama ebereg welahi angge anyo mundoho abirangge oko wasi.

¹¹Aren de an fahet aselei on hag besireg de, At Allah en an nobam olok mun leiyereg lit wereg.

¹²Autsi sehen foroho enap de mundoho hambuk ha fug aleroho bin kwik waharuk; Airoho kwik waharuk kwit de an nobam sabo anyo maseroho kwelabeheg, an nanggobokwe lauk on kwe baleheg, duruk.

¹³An nowesi nautsi omano re an weregman yarapdoho feseik laukmu re; it ap homi an enoluk on etmano fam de an ap bohon hag atuk kahi.

¹⁴It namepsi on mundoho re an ahaye naplug enamumu lauk; it nori on etmano en de an anyo lohon ebet neauk fug.

¹⁵It hwelani namingming angge omano en ohore an enowe anyo enapeleg atlug de; an anyo ap amu on enapeleg on hag nobaharuk.

¹⁶An namingming angge anyo wol-hauk kahi famen; ne an den nele sako fam onggon-onggon uruk kahi famen de aren onggo welahi ulug isi fug.

¹⁷An nele amben fahet de an nohwe en amben sang ha ale ahummu aldo duruk; ne nori nenesinga misig hwe en endag-nenesug on en oho re an naluluk waharuk ale enerim deg.

¹⁸Kobokweman omalik doron en siahap-biahap napuk; ne an inatuk mu re iren unda yag napuk.

¹⁹An inil nealug de it nori ninim hundig on en ohore homombuk lil hauk; it nenda hundig enusug lahi on etmano en ohore nobahalug neg lauk.

²⁰Nebe re we nahap nowag fam dopnoreg on neg wereg; an we waralema naheime oko lelep angge famen welahi.

²¹At Allah enggik en an nowatuk mu re; Yaho nori, an henenda neakiek o.

²²At Allah en hundig-handig an berel neg neauk kweleg oma re, hiren de nunggwelug Aren duruk aleroho napuk kahep? An nobam anggin-fanggin nobaharuhup fam neg oma re henobam atuk fug a?

²³We an nele uruk kahi on oma mundoho baloho fohupmu, ap homi en ebet neg hauk kamuhup.

²⁴Li[29] anunuroho baleg welamag dohore; amu angge fam de fug, ite no bosimanggen fam helep hwesesengge oko foukwag.

²⁵O boholma etma an nibil atlug nili wauk on eke wereg ai an noluk deg ma; ambiangma en de At watlug an nili og-nabik waruhu.

²⁶An nahap yebil deg lit halet lauk famen de; an nebe nahap su[30] eleg aruhukdeg en ohore Allah nil hahuk.

²⁷An nonggwareg nil en neg At hahukmu re; At fahet de an den de nare ninim hundig on hag aruhu. Hiren henele uruk kwit,

²⁸‘At awene ai nenoluk amagdoho re keroho hein wak?’ uruk kahepma re an nenda mundoho hesilduk; Hiren awene bilinggul ulug wene indip heraruruk kahep.

²⁹Famen de At Allah en de ap siag duruk on olok enobam folug unggum og-esaukmu no en de; ketia hit karog fam henakol duruk kahep! Ai fam de we At Allah en neg ap homi enawene balduk on[31] anyo henoluk atuk ai,” ulug ebag.