Read Ninia Yali AYUB 2 Bible Online

AYUB 2 - Ninia Yali bible

AYUB 2

¹Airoho wereg ma eke salim bohol fam enoluk wereg on omano nikangge TUHAN olohotma aik watfag ma re, it enesahalimu etma at ap enda kahalni anyo oho welatfag.

²Wereg ma re TUHAN en at fam hein og-hauk kwit de, “Hat de hebe keman?” ulug ebag ma re, at ap enda kahalni anyo en de, “An de o di kwe su kwe omano dag watil laheg, o kwenangma etma wilip am kuk dil noruk kahireg,” ebag.

³Airoho ebag ma re, TUHAN en hein og-hauk kwit de, “An namingming angge Ayub aire, haren lohon fubi debehen a, eleg a? At aire An napne wauk kwit, siag mel duruk eleg on ai. O kwenangma etma mundoho re ap ai en enda An nobam dipdoho neg duruk kwit, enda mun fanoreg eta hagdoho misig eke wereg fug. At ebe en disi ale eke wereg fug kweleg, at ebe siahap debeik larohon ulug An nobam haren limi napihin famen de, at de mundoho An nobam dipdeg lit neg wereg,” ulug hweag-etfag.

⁴Famen de at ap enda kahalni anyo en onggo uruk kwit de, “At angge di angge su angge aire maben hag famen de, At ebe aheime nim, at ebe ouk am no ulug inim ai neg de mun along deg. Ap homi en de an nebe noluk welahi aire mun along, ne nangge mundoho nal atuk on ai fahet de, along fug boruk.

⁵Ne, Haren at ebe ahap fam ouk fehen ha man de, dik-demdoho aren bekit Hat wip habuk alereg!” ebag.

⁶Airoho ebag ma re TUHAN en at ap enda kahalni anyo fam uruk kwit de, “Fano, anggere at ebe neg de binggi waruhun fug famen de nangginig ale aire debeiyug neg,” ebag.

⁷Ai ebag ma re at ap enda kahalni anyo TUHAN olohotma etmano en wiliplug lebagdeg de at Ayub anyo ebe fam abirangge, eyog endangge apma fil en de unggul ahap huli burag humon bebag.

⁸Airoho debebagma re at Ayub anyo ap homi en al-alangge hwik-dik laukmu horogma etmano hweria aik lalug, woliom erap deg walug de ahap seleng duruk katfag.

⁹Airoho durukmu re at ohwe en hweag-utuk kwit de, “Hat de Allah ai fam neg dipdeg lit welatmihin a? At ai wip-debelug waratmihin mu re!” ulug ebag.

¹⁰At Ayub en onggo uruk kwit de, “Haren uruk kahen on aire hweap enape eleg mun morue on en uruk ale uruk kahen! Nit de Allah en fano angge og-nesauk on ai fahet neg nenendareg lit de, siag on og-nesauk halug de embeseruk kamul a?” Wauk kamul neg ulug ebag. Ai halug de at Ayub ebe fam di on su on etma aik waharuk katfag famen de at ele fam eke Allah ele sahaleg ale eke wilibik waharuk katfag fug.

¹¹At Ayub fam obam anggin atfag ale anyo re it ori enebe henahan angge, hun Elifas obam kota Teman on anyo ha, hun Bildad obam Suah ahun anyo ha, hun Zofar obam Naama ahun anyo ha, en holfag. Holfagdeg de iren enele seberoho matuk kwit de, nit de at Ayub kwelap ha lalug enda aho warik lahuk, bebag.

¹²Famen de it enebe watfagdeg yatman inil fu hauk men de, at Ayub ebe anyo iren hun di ulug fubi debouk fug ale atfag. Airoho deg en de it anyo oba enele hum fam yatfagdeg de enasum dilip-dalapdoho embeselug de kwenang ahe enunggul kwe mel, kolo kwe mel, lahapfag.

¹³It inil hebag ma re at Ayub ebe fam yebil atfag on anyo re mun anggin deg ma hebagdeg de, nukoho hundig hup hundig neg enenggik sabiren aire enele dem misig oho eke wilibi fouk fug angge at Ayub aluluk kwenangma etano hwerieg latfag.