Read Ninia Yali AYUB 20 Bible Online

AYUB 20 - Ninia Yali bible

AYUB 20

¹Airoho ulug at Ayub en ebag ma re at Zofar en onggo uruk kwit de, “Ayub ahwi! Hat hele ehen on ai fam de an nendama nolok behireg de, ketia an den wene onggo folo-folo hweag-hutuk kahi su,

³Hat hele ehen on etma re mun an sebeloho nobaharuk kwit hagdoho ehen, famen de onggo diroho imin ulug aire an mundoho noluk deg.

⁴Famen de o indik-endam etman angge; it ap homi keram on etano waldoho o kwenangma suma fesebag hwili en anggere,

⁵it ap kwasikdoho duruk on en enahayeg hauk on aire we elamna fahet, ne it ap wene sahale folug duruk on enambono halug duruk on aire we misiham fahet anyo hat de hapeleg a?

⁶At unuk bogdoho koloma leho wereg ma, ambiang en anggulog fam etlema bal hauk famen de,

⁷at ebe mundoho-mundoho eleg aruhu; ne o kwenangma suman de mun siag-biagdoho eleg aik lahu. It ap homi ap ai enoluk deg lamuhup on en hein og-enepuk kwit de, “Yaho, at anyo re kemane laha?” Uruk kamuhup.

⁸At ebere ap homi en ena og-hauk kwit enapumag lepengdoho longgo ik lauk anyo hag; ne hup anggo ena fam hag inil hauk men longgo uruk anyo hag longgo urukmu re,

⁹at anyo ap homi inilmu welaruhu fug; ne at obale wereg ma etano oho eleg laruhu.

¹⁰Atam aren ap homi enenggik eleg on enangge herag dasi on etmano re, it at omaliki en obalma og-esahup.

¹¹At ebe owan ahap olukdeg lit along balong deg famen de; we horog ketia eiya neg at anyo ebe kwenang ahe on aikohoreg.

¹²Kwasikdoho duruk on aire at ambilik fam de mun mit deg alere mun anggoloroho! Airoho deg ma re folo-folo bilha alere erim atuk en de, anunuroho foroho lit unduk neg hauk katmin en ulug de ambilik anggen apma mumunggoho foroho lit wereg.

¹⁴Famen de aren nasi angge anyo at ahum en ahamdoho re, asig angge ap watuk mu waratuk on atsi.

¹⁵Di angge su angge herahalug nauk katsi on etmanore, at ahummu en Allah en mundoho wilibi feseik wahasi.

¹⁶It ap kwasikdoho neg duruk on en asig on nauk halug de, at ebe fam angginap kwelabe fahat daukmu re, at ebe kisu aeg olok on en senggel enepukmu hag aren duhu angge anyo fam en wararahu.

¹⁷Aren de zaitun ahalue mun hum-hamdoho[32] mel, ahowe mel, kin ahalue mel mun amu kwesal heheg wamburuk on mel, nahu fug.

¹⁸Aren hwelasi angge etma re nikangge enonggwareg fam og-esahumu re, aren duruk katsi on fam en de anggen yihig eke nahu fug.

¹⁹Aren de ap amu on sebeloho feseheg, ap enengge eleg on elalinapdoho feseheg, o aren witsi fug on famen del deheg, duruk katsi.

²⁰Aren an namu nangge deg lalep ulug neg duruk kwit enda hambuk ha fug angge duruk katsimen de, at ebe obam homo atuk katsi fug.

²¹Aren mundoho nauk li re mundoho etmano elehap deberuk katsi, ap fam de at fam enggik wereg welatsi on anyo re anunuroho welam fug angge eleg atuk katsi.

²²At angge humdoho atuk kwit enggik wereg atuk li em etano re ouk-bouk inim anggin on inim mun alongdoho obam aik wahasi.

²³Aren ahum fam yohwat-dauk on fahet asingsing-basingsingdoho duruk li em etano re, At Allah en obam olok obam fesireg de unggum og-itsi.

²⁴Aren karog bosie baja on fam wirig on akol en longgo ik lauk li re, at ebe dog tembaga fam wirig on en ahap bale feik waharuk kamuhup.

²⁵At ebe dog ware fohupmu re ebe yebil duhu; dog ambiang mun helag-felag angge duruk on en de ahap fo miroho ware fohumu re akol on endama aik waruhu.

²⁶Angge si angge su angge kabog-dauk on anyo mundoho siahap-biahapdoho eleg aruhu; at inim ne at ahain elekwe on inim indok ap homi en yalduk fug on fam han nahup.

²⁷Bohol en de at asiag duruk on anyo ename fohumu re; kwenang en de at a weim aruhureg duruk karuhu.

²⁸Allah enda ahe olok anyo obam laharuk kwit de, at fam ebe dung ahun wereg ale anyo mundoho fundoho eleg aruhu.

²⁹It ap homi kwasikdoho neg duruk on fahet amuhup ale ulug, At Allah en eneko fesi ale re airoho amuhup ai,” ulug ebag.