Read Ninia Yali AYUB 21 Bible Online

AYUB 21 - Ninia Yali bible

AYUB 21

¹Airoho ebag ma at Ayub en onggo uruk kwit de, “An nele uruk kahi on su henesanggo holiek; we ai eneg de hit henenda onggonoho amag.

³Hit ehepma an nele imin anggere bok welamek o, ne an iminmu neg de hiren nebene henalitno napuk kahep ale etma napluhup!

⁴An den ap homi inim nele suahal uruk kahi fug anggere, an nele hambuk hauk kahi fug halug aire embeseiyug.

⁵An hinil kumu neauk men de hit hinil heleloho folug kumu napuk kamluhup lit deg, hit de hinil loureg lit de henambilik sop-sopdoho welamluhup.

⁶An den nebe deg lahi ale au fahet ulug wenggel-hauk kahimen de, mun namelmel alereg en de nowag elek duruk kahi.

⁷At Allah en ap siag duruk on etma nunggwelug enoluk yatdoho welamag ulug og-esauk? ne nunggwelug it enangge eke nim dopno debeseruk kwit neg wereg?

⁸It enebe mun anunuroho enoluk wereg lit, it enomaliki inim enombasi inim omano mundoho log atuk mu esauk oma hwi.

⁹It enobam olekwe re mun finik-fanoroho wereg; ne At Allah en de it fam anggin on feseruk fug.

¹⁰It enowam endag-dauk on de mun hum-hamdoho ondoko saha il lauk; ne anggin ha fug angge enomalik endag-enepuk.

¹¹It ap siag duruk on enomaliki omano re wam domba omaliki en holombog-holombog angge duruk hagdoho, it enahayeg en holog-holog angge duruk.

¹²Ap en binggong rebana, seruling, kecapi mel watuk kweleg, iren suni uruk kwit enahayegdoho yunggulduk.

¹³Iren de nukoho etmano hundig-handig enahayeg hauk kwit neg wereg ma eleg aik laukmu, it enebe oho finik-fanoroho waraik lauk.

¹⁴Iren Allah fam uruk kwit de, Nit de Haren nit nenoluk welahe on nenobahet henda boruk kahen ale mel, henda wenggelduk kahen ale mel, etma re nit de nenapelegma fubi hobahaul fug anggere, “Nit welaheman yarapdoho nenobahalug lakin!” ulug uswa famen.

¹⁵Iren wenggel-hauk kwit de, “Niren nunggwe lug Allah obahet dulen, niren At fam somban uruk ale aire we alemaroho hag.

¹⁶Niren duruk kahe ale ambiangma aik lauk on etma re, nit nenomamne fam fug en a? Nit nenomamne fam neg,” ulug uruk katswa. Famen de iren uruk katswa ale fahet mel, wenggelduk katswa ale fahet mel aire, an den de mundoho nerim boruk katihik.

¹⁷Ap siag duruk on enesahe nahul atuk ale eke wereg a? ne it fam enobam anggin on aik waheg, ouk on enobam aik waheg, disi ale eke wereg a? At Allah en it enobam olok enepsireg, it unggum og-esasi ale eke wereg a?

¹⁸It ai hol en mel, sielu en mel firulug lauk kwit, enggelangge mel ul ahe mel firulug lauk anyo hag atswa ale eke wereg a? Mun eleg.

¹⁹Hiren uruk kwit de, “At akni asiag fam de omalik unggum og-itsi.” Uruk kahep, famen de an den uruk kwit de: We ap siag duruk on ai neg At Allah en unggum obam foruk, It enesiag fam At Allah en unggum enobam feseik waharuk ai, enenda wenggel amag ulug de airoho duruk.

²⁰Ap siag disi ahun halug de, at asiag onggo amu en howag, At Allah Mun Leho wereg on anyo en olok obam fesi on ai howag.

²¹Ap homi o kwenangma wereg ale mundoho atil lauk em, at ahain elekwe enebe mun enahayegdoho neg wereg en ulug at fahet wenggel-ha alereg a?

²²At Allah amu en neg it bohol fam enoluk wereg on etmano enawene bilinggoho owag lol-enepuk famen de, Ap homi At Allah mamuluk alereg a? Mamuluk fug alereg.

²³Ap eke oluk wereg li em de obam ouk ha fug angge fano neg we wereg katsireg de, endama mun ahayegdoho, obam siseroho waratsi. Ne, at ebere mun omamne wereg kweleg famen de, nenek duk fug angge mun ahayegdoho waratsi.

²⁵Famen de ap ekere ahayeg lohon dorangge ha fug angge, ebe fam mun asigmiroho neg hauk katsireg waratsi.

²⁶Famen de ap waratuk on sal-enebik laukmu etmano re enebe birenet yinggig wereg ma re, musu mel, imbalo mel, maeng mel, sobon anggen mel, en leareg latswa.

²⁷Demdoho hiren wenggelduk kahep ale aire an oho noluk deg, ne hiren an nobam deboukoho siag ale wenggelduk kahep on etma oho an noluk deg.

²⁸Hiren uruk kwit de, “Ap o suma sebeleg wereg lit along wereg liren, mun nong-hongdoho nenggali ale duruk ahun ai obam de ke?” ulug hein og-enepuk kahep.

²⁹Ap kwema lauk on etma fam de hein og-esauk kahep fug a? Ne, iren wene henobam uruk on fahet de demdoho uruk boruk kahep fug a?

³⁰Iren uruk kwit de, “At Allah en unggum enobam fohu salim aire ap kwasikdoho duruk on de mundoho enahap wendaruhu.” Uruk kahep.

³¹Ap sa en diroho duruk kahen ulug owag loluk alereg, ne ap san en haren siag diroho dirihin ulug at oho ambiangma obam fouk alereg? Mun eleg.

³²We at ebe walug lalug ap sal enepukmu etmano feik lalug de, kwenang habulig elma etmano belabe foruk, Airoho belaboho folug de, at ebe salegma anyo furoho hwalduk kwit de buhun-deberuk kwit wereg.

³³At ebe wareg anyo walug salik laukmu re ap enebe hum-hamdoho lauk ne mun enepe lombuk angge kwenang anyo saldil lahaik waharuk.

³⁴Airoho deg ma re hiren an onggon napuk kahep on ai mel, ne hiren onggo ulug uruk kahep on etma mel, de mun seiale uruk kahep!” ulug hweag-esebag.