Read Ninia Yali AYUB 22 Bible Online

AYUB 22 - Ninia Yali bible

AYUB 22

¹ Airoho ebag ma at Elifas en uruk kwit de, “Nit ap homi humdoho welahe on sahalimu en de ap eke At Allah endama ahayeg deg ale on misig eke wereg fug. Ne, ap enunggul owag mun enggat anggoloreg on wereg halug ohore, aire we at onggwareg fahet on neg deg.

³Ne, haren At Allah enda ahayeg boruk ale duruk kahen halug de, At obahet ale eke wereg a? Ne, hat hebe mun fano neg duruk on welahen halug ohore, ai fam ambiangma At hwela ale eke wereg a? Mun eleg.

⁴Haren Allah fam hakol bolug duruk kahen ai fam; hat siag dirihin ulug hweag-hereheg, hobam hekip heheg, duruk fug.

⁵Ite hat hasiag dirihin on de mun hum-hamdoho deg ma, ne hat hobabut mel, duruk kahen ale mel mun kwasikdoho deg en uruk.

⁶Ne, haren hat hare eke fam hombaleg angge wereg on obalma folo-folo feikwam fug alereg halug de, haren asum mundoho del-dauk kahen.

⁷It ap homi enobam lilipna koreg on de haren hahaik hwenang-esauk kahen fug, ne it ap homi enasiburu obok deg on de, siburu hwelakiek ulug heg-esauk kahen fug.

⁸Hat hebe halong wereg li em yabuk leho on fam hwerieg lit de kwenang etmano mundoho deloho hwelamin ulug neg duruk kahen.

⁹Haren it hweap sohwe on let-esauk kahen fug ale fahet neg de fug, ite it omaliki wetien on ohore haren homamne fam enangge deloho hwelauk kahen.

¹⁰Airoho neg duruk kahen ai fam, hat welahenman maseroho etma re ap san ulug ka balduk mu re, fetagdoho etano at hat hendama mun hakol neg aik waharuk.

¹¹O mundoho hup atuk mu re, hat hil en hehen fug alereg, hat de ik fu humon en sebel habik waharukmu ai fam obuk uruk kahen.

¹²At Allah re bohol mun anggungu on fam lehoma etlema wereg lit, il sohwalanggen mun koloma etlema wereg on fam belaboho wereg fug a?

¹³Airoho deg famen de haren uruk kwit de, “At de nunggwe ale oluk deg on a?” At de anggulog emberim fil etma wereg ma re, Aren nit ayo wiroho biling-nenebuk fug alereg. Uruk kahen.

¹⁴Haren boruk kwit de At ilmu re anggulog en hulireg ma re, At de we bohol dulug kwenang dulug[33] bul huli-huli kwe etma lag-wag uruk ulug boruk kwit duruk kahen a?

¹⁵Hat de it ap kwasikdoho neg duruk on en kwe hweaho fousareg lauk on anyo fam lauk kwit uruk kahen a?

¹⁶Ite enebe li waratuk on owan aik waharuk eleg kweleg folo-folo og-enepuk, ne ik fu waharuk on en sebel-enebik watlug og-eneplug wirig atuk.

¹⁷It ap aireg on ai en at Allah Mun Along wereg on anyo enambong seroho nenerim ulug embeselug duruk kwit, iren de At Allah en nit nenobam diroho suroho ulug nenebuk fug alereg boruk kwit duruk.

¹⁸At Allah en neg it enenggik dungapdoho fesesi famen de, it ap enenda wenggelduk ale et mun sohouroho wenggelduk kwit duruk ale etma re an mundoho nenda nong-hong uruk.

¹⁹It ap kwasikdoho duruk on unggum hwelaukmu re, it ap homi fano on en de enahayeg fam enda yag-enepuk kwit wereg.

²⁰It ap kwasikdoho duruk katswa on etmano enengge re mun luluhun-lalahandoho eleg atsi, ne indok en de alinlan wereg on etano en mun miroho nasi.

²¹Ai halug de Ayub ao, hat hobam hambukdoho welaruhun en de, At TUHAN hinim fano-fano amek, Ne, haren airoho dimihin halug de, ambiangma hat hum ale yohwaroho hwelahun.

²²At TUHAN en hat hweag-hutuk ale aire furoho walug de, mundoho etma hendama bugdoho foroho lamuk.

²³Hat hobam olman kwasikdoho duruk kahen on etma re embeselug de, henda sebele fahat dalug[34] sombandoho TUHAN akit waharuk kamin.

²⁴At Mun Omamne humon anyo hat hangge emas mel, perak mel mun fano on hagdoho amagdoho re,

²⁵Hat hangge emas mun il fano on aire hwik-esalug de, ik wirig atuk on ahummu ik ebe wereg fug on fam erahamu belabe feik lakiyug.

²⁶Airoho duhun ai fam de haren hundig-hundig Allah fam dip-deberuk kwit welaheg, ne At ebe aire hat hangge indip wilipukmu hagdoho aheg, deg ma holuk aruhu.

²⁷Ne, haren somban uruk halug de At esanggo holug onggo hweag-hutuk karuhu, ne haren hele sali waroho hweag-utuk karuhun on anyo dipdoho neg duruk karuhun.

²⁸Haren duruk karuhun on etma re ambiangma fano neg atuk mu hauk karuhun, ne o seleg en de hat hebe fam selehap hapukmu lauk karuhun.

²⁹At Allah en de it ap homi winik-wonog[35] uruk on sebele feseruk, famen de it ap homi enenda sebele fahat-dauk on de enahap wendare feseruk.

³⁰Haren siag duk fug angge At enda ahayeg boruk ale neg duruk kahen halug de, At Allah en hat let-heauk karuhu,” ulug hweag-etfag.