Read Ninia Yali AYUB 23 Bible Online

AYUB 23 - Ninia Yali bible

AYUB 23

¹Airoho hweag-etfag famen, at Ayub en onggo uruk kwit de, “An de nenda fituk kwit anggolo hauk kahi on au sebel ha fug ale duruk en de, At Allah fam nenek-fenek hauk kwit ngururuk kahi.

³Nori ahi, At wereg ma etma an noluk deg lalepman de, an akit lele angge aho.

⁴Lelereg de an nawene su biling nimin ulug At obam walug kwik lelereg de, an nambilik fam en nonggwareg nalong bal-dauk kwit de nele ninuk-nanuk di wene su wene uruk kale.

⁵An den Aren ele keroho hweag-nitmisi, ne onggo keroho imisi ai noluk alep boruk kahi.

⁶At ebe along wereg on anyo fam an nobam heroho sahali imisi ane? Eleg! we an nele uruk on At esanggo holmisi boruk kahi.

⁷An siag dirihik fug ulug aire At olohotman oho nonggwareg nalong bal daroho lahi, ai fam de an mundoho-mundoho etma wene nobam wereg fug[36] ulug ai enam aruhu mu hahuk.

⁸An den At Allah anyo o unggut timur, barat, selatan, utara, fil inim herarik lahi famen de, di kwe su kwe etma At Allah welaha fug, ne an At Allah ebe nim ambi ahe fug.

¹⁰Ai deg kweleg de an kwe lauk kahi on anyo At mundoho oluk deg, ne an den duruk kahi ale etma oho At oluk deg neg. Ap homi emas il fano on hwelakoho su ebe demdoho on a, amu on a? ulug wal hauk anyo hagdoho an oho airoho wal-neaman de, an nenda siag on eleg angge mun buhundeg welahi ale anyo enam am alereg.

¹¹An de mun dipdoho neg At ele holoho duruk kahi, ne Aren kwe lowag ulug an nobahet fouk deberuk kwe en de an dahandoho lauk kahi fug.

¹²Aren awene melaleg uruk on de an den holoho neg duruk kahi, an nonggwareg nenda boruk kahi ale bolug neg duruk kahi fug, we At enda ahayeg boruk ale neg higitdoho duruk kahi.

¹³At Allah aire mun aham duruk eleg; Ap homi en At eke ele sahaloho fouk fug alereg. Ne, Aren de enda ahayeg boruk ale neg duruk.

¹⁴Aren an nobahet duhuk ale ulug wenggelsi on de hum alereg kweleg de, An nobahet wenggelsi on hundig napuk kwit wereg.

¹⁵An den At fam nakol boruk kwit de nowag elek napuk, an den mundoho etma wenggeldil lauk-lauk de ekenim nakol napuk.

¹⁶An nambong sereg welatsi anyo re At Mun Leho wereg on anyo en siahap-biahapdoho fesimu re, an den Allah fam nakol boruk kahi, ne o mum aire an maseroho kwelap napil waheg, norohole saldil waheg, duruk famen de, an den o mum ai fahet nakol boruk kahi fug.