Read Ninia Yali AYUB 24 Bible Online

AYUB 24 - Ninia Yali bible

AYUB 24

¹Ap Allah enoluk deg on etmano Aren hit fano duruhup ulug katukdoho hweag-eselep angge re, nunggwelug At Allah en nukoho ayo wiroho en enebuhu salim ai momale fesi fug ahi?

²Ap foman de it enanggwenang wiriloho amag ulug de, kwenang huli-huli wereg on anyo hihildil lauk. Iren de domba herahaik lalug de, it enowam obam wirigmu etmano kwelabe fahat-da waharuk.

³Wam keledai omalik wetien on en de kumbi fetengdoho wilibi feseruk; sapi homi sohwe on enowam de o mel, kwenang mel hag angge onggo baloho ulug hwelauk.

⁴Iren de ap enenggik eleg on en it enengge on etmano hwelaul ulug durukmu iren kwe bal-enepuk ale en de, nangginuk-nangginuk it ap enangge eleg on etmano re herag aik lauk.

⁵Ai fam de it ap enenggik eleg on anyo re, wam keledai maro on en o leimu somun kwe etmano neg at omalik nauk on fahet wereg ma heraruruk hagdoho nauk on hera dil noruk.

⁶Aren de ap amu on eneyabuk[37] onggo hwelaul ulug anggolo heheg wireheg; it siag duruk on en enahan anggur anggen etmano kabog deheg, duruk.

⁷O hup angge at nohorukmu ahap saloho nohoruk on ulug de, asum wan-dauk on mel, asilimut mel, wereg fug.

⁸O doman de at ebe osit kulu mahaukdoho watil lauk em de; osit en de dom indipmu lombog aik kuruk.

⁹It ap kwasikdoho duruk on de it omalik akni eleg isinga eleg anyo enomamne fam sebel enusug laheg; it ap enenggik eleg on nim angge baleg wereg halug de ap anyo omalik hweleheg, duruk.

¹⁰Ap enenggik eleg on de nauk on hwaleg eleg angge lauk; at anyo lalug yabukmu etmano gandum anggen balduk men de siburu aeg foruk.

¹¹E zaitun anggen fam en de ahalue wireheg, ne anggur anggen fam en de ik nauk on wireheg, duruk; famen de at ebe ik en mundoho enda aheruruk kweleg airoho duruk.

¹²O kota kwe etmano re ap mundoho enebe siag-biagdoho wereg lit ngururuk; ne it eneyebil wereg on en de hiling nenebik walep aho ulug hwiruruk, famen de iren somban uruk on ai At Allah en esanggo holduk fug, ne Aren it enele holoho duruk eleg.

¹³Ap fomane en de seleg anyo nenerim ulug de inim eneselei debelug duruk kwit de, iren at enapeleg angge, ne aren kwe hweag-esauk ale anyo mutlug la fug angge duruk.

¹⁴O hubet hil yingguruk kweleg etano re at ap watni anyo re nohoruk men feiyaloho inatlug; wilibik lalug de ap mundoho enangge eleg on etmano enowarik wilipuk, ne o owan sekan duk eleg kweleg etano re ap heraharuk on en hagdoho konu-konu lauk.

¹⁵It ap homi hesangge hambena duruk on en de o hupmu heik-heik ale dukwag ulug nangno hauk kwit wereg; ne ap en inil neano ulug de orohole saloho wereg.

¹⁶Ap heraharuk on en de hup angge o meiyalug de; nukoho anggere oseleg deg ma etmano embeselug de herag aik lalug wereg.

¹⁷Ap aireg on ai en de hubet atuk halug de mun akol deg, famen de mumdoho heik koruag degman ohore at de ahayeg deg,” ulug ebag.

¹⁸[38]Airoho ebag ma at Zofar en uruk kwit de, “Ap siag duruk on halug de ik fu waharuk kwit og-eneplug wirig atuk; it enanggwenang de At Allah en wipdoho foruk. Aren on anggur yabukmu etmano re mundoho dereng-dereng angge deg ma re; etma ap eke yabuk wutuk kwit wereg fug.

¹⁹O hobi lahakeg mo kwelabik waheg duruk kwit lumbiag eleg atuk anyo hag, it ap siag duruk on anyo ohore waratuk on anyo oko hwelaukmu re airoho eleg atuk.

²⁰At onggwareg isingan ohore mundoho apeleg atsi famen de, imbalo en de at ahap balduk kwit wereg. At unuk de ap en oho eke ebet hahup fug; at de ap en e muko belapuk on hagdoho mundoho siag atsi boruk kamuhup.

²¹Airoho atuk ale aire aren it hweap sohwe on etmano sebeloho feseheg, ne aren it homi enomalik ap endag dausa fug on fam haperoho deheg, duruk ai fam atuk.

²²Famen de At Allah en de At omamne fam it ap enalong wereg on etmano muko wilibi feseruk. Ne, At Allah en dimindoho durukmu re it ap naleg halegdoho duruk on de mundoho wat-heheg lauk.

²³Allah en de at ebe fam mun fanik-fanoroho welamag ulug debeselug en de, bale fouk fug angge hundig-handig kahaleg lit neg wereg.

²⁴We horog elamna fahet neg enda ahayegdoho wereg famen de, fobik de mundoho-mundoho lahu en deg. At ebere re enggelangge siag on hagdoho halo uruk, ne padi anggen owag fam en baloho forukmu hagdoho atuk.

²⁵Airoho durukmu re, ap san eke demdoho atuk ale ai fahet awea wa alereg? ap san eke an den nele demdoho ihi on ai sebeloho fouk alereg?” ulug ebag.