Read Ninia Yali AYUB 26 Bible Online

AYUB 26 - Ninia Yali bible

AYUB 26

¹Airoho ebag famen de at Ayub uruk kwit de, “Nare, an hare mun nomamne elegdoho kopitareg lahi nahun su fam, haren hebelmiroho let-nehen ai abi.

³An ap morueroho sohu nahun su fam, haren wene komo mel, nolukdoho on ulug mel hweag-nerehen ai!

⁴Hat de hele etma sa fam hil yuoreg lit matuk kahen? Airoho iyug ulug de wene san helma feheikma airoho uruk kahen?” ulug ebag.

⁵[39]Airoho ebag ma at Bildad en onggo uruk kwit de, “It ap waratlug laukmu etma wereg on etmano re enowag elek duruk; ik inim it ik ahum fam etma enoluk wereg angge nim oho ilik duruk.

⁶At Allah il hanim de it ap homi waratlug laukmu etma re sok husigmu hag deg; aplit lareg elegma re At ilmu re mun enameg wereg.

⁷At Allah en de bohol ik yenggeleg on emberimmu doale fesi, ne kwenang de obale koloma sukni fesi.

⁸Aren de hena fam ik hum-hamdoho yohware fesi, famen de hena anyo ik anggin en ulug denelduk eleg.

⁹Aren hena wirili fesi on anyo ambol fil etma re, bigalem funu anyo orohole sale fesimu wereg.

¹⁰Aren de mum inim seleg inim amu-amu welamag ulug, ik laut ahum emberimmu huli ware fesimu wereg.

¹¹Ne, Aren ele sipuk delelang duruk uk men de, bohol hulug lahabeg on omano mun elek duk alereg.

¹²Aren de ik yenggeloho diahan deg on anyo Omamne fam sebeloho[40] fesi ne Rahab [41] o sel kwelapni anyo ohore At hebeleg fam yeik waroho fesi.

¹³At ambilik ahe re bohol fam fu esasimu re mun healsi, ne At enggik en de kisu menawe hag on naga laut fam etman wilibik waharuk on anyo ware fesimu, wareg wilipsi[42]

¹⁴Famen de mundoho etma re At omamne humon wereg ale anyo eneg deg ma howag ulug debag ma re, we enele ling-long ale uruk on neg nit nenesanggoma aik waharuk. At Allah ebe deg ale fahet mel, ne At Omamne mun nik aleroho deg ale fahet mel, nit fam de we dorangge neg nenoluk deg!” ulug ebag.