Read Ninia Yali AYUB 27 Bible Online

AYUB 27 - Ninia Yali bible

AYUB 27

¹Ayub ele ebag on anyo ambiangma lisoho uruk kwit de diroho ebag, “At Allah mun oluk wereg on anyo, Aren an nawene katukdoho bal-nutuk eleg on anyo unuk fam anggere,

³an den hombuk balduk kahi ai: At Allah en nebe sat og-nutuk kwit neg wereg li em, ne an nebe noluk anyo nobam wereg li em etare,

⁴an nambilik fam en nele seiale on eke wilibik waruhu fug, ne nambilik anggen en ap laleg wene eke uhuk fug.

⁵Aireg ma re an den hit demdoho on ulug ihi ha fug alereg; an de noluk welaruhuk li em aire an den eke siag ale dirihik fug ulug de ning hauk kwit neg welaruhuk.

⁶An de nenda anggen doron anyo ohore mun koloreg ma re, an oho ai demdoho bolug seneg lahi on aire seneg lit neg welaruhuk.

⁷It ap an naselei on etma re ap wene sahale folug duruk on ulug unggum enobam foukwag; ne it an na weim on etma re ap enolok fam fam duruk on ulug yeik enowarukwag.

⁸At Allah en ap obabut mun siag on ebe oluk fahet awene uk men de it fam enenda ebereg welam on eke welam alereg a? Mun eleg.

⁹At fam wene obam aik waharuk halug oba yatuk mu, At Allah en holuk alereg a? Eleg.

¹⁰Ebe demdoho on de aren Allah fam en enahayeg hwelauk on anyo og-netlep ulug enda ebereg wereg lit, Aren Allah fam somban obam anggin ha fug angge uruk halug fano.

¹¹An den de hit henobam At Allah omamne humon wereg ale anyo hweag-heseheg, At Mun Leho wereg on anyo en duhuk ale ulug wenggelsi ale anyo henoluge henobahakeg, duhuk.

¹²Famen de hit henebe abirangge hinil en hauhup neg. Aireg halug de nunggwelug hiren komo ale indip eleg on neg uruk kahep?” ulug ebag.

¹³[43] Airoho ebag ma at Zofar en uruk kwit de, “Ap wene melaleg sahale folug duruk on mel, enenda esa fug angge hape fam duruk on mel de, At Allah en unggum diroho og-esauk.

¹⁴At omaliki humdeg halug de it enebe weim fam en waramuhup ne at omaliki mel ombasi mel de nauk angge elegdoho neg enoluk welamuhup.

¹⁵Ori enoluk wereg on de ouk en fun heheg eleg amuhup, ne it enohwesi sohwe etmano en de oba yag-enebuhup fug.

¹⁶Ap en angge perak etma aldap-aldap angge kabog deheg, asum sap-sap angge kabog deheg, duruk karuhu aire fano neg,

¹⁷famen de sum inim perak inim aire it ap demdoho neg duruk on enangge aruhu.

¹⁸Ap kwasikdoho neg duruk on obam de kolmal ahalesa[44] hag wirik deg elegma folo-folo dendaloho lauk, o we elamna fahet ap en o sabo wutuk hagdoho wirig.

¹⁹Aren de ap dung on hagdoho yinggig wereg, famen de aren nikangge up sahaloho[45] duk fug alereg. At ebe nohorukmu etmano en inatuk kweleg de, at angge di angge su angge etmano mundoho linggik-longgo urukmu inatuk.

²⁰Ik fu fetagdoho sebelik waharuk hag enakol on obam aik waharuk. Hol o hup angge warik waharuk kwit de fundoho walug lauk.

²¹Sielu mo bekit fil en warik waharuk kwit de at ebe obam wereg ma etmano en horoho leko walug lauk.

²²Enda ha fug angge airoho obam aik waharukmu, nangginik-nangginik kema herag aik ulug leil watil lauk.

²³At ebe airoho watuk ale anyo fahet de ap homi en ahayeroho enenggik dag duruk; di kwe su kwe en de at siahap-biahapdoho foruk” ulug ebag.