Read Ninia Yali AYUB 28 Bible Online

AYUB 28 - Ninia Yali bible

AYUB 28

¹[46] Perak habulig kabog-durukmu obale wereg neg; ne emas il fano on enam amag ulug indok fam han weratuk mu oho obale wereg neg.

²Bosiemanggen de kwenang fam en habulduk; ne helep fam en de indokma weratlug de tembaga wauk.

³O heik koruag deg ma famen de mun foroho kwik lausa; ne obale mun yit-yat deg ma etmano re mundoho longgorik kusa. Ilonggoma mun mum-mam deg ma etma ap en helep anggen herarik kuruk katswa.

⁴Mun yit-yatma atlumu ap homi mel di angge su angge mel wereg fug mu, ap eneyog en mel sobutswa fug mu, ne etma mel lohon lausa fug mu etma, ap en sabu fam liloho song deg lit bohwe elma di angge su angge ele mundoho elegma atlumu yabuk duruk.

⁵Kwenang fam en de ap homi fahet nauk on yako lahapuk, famen de kwenang ai apma fil etma re mundoho aham-faham esaukmu re, kwenang fam yohwareg wereg angge etmano da leag ya leag wereg.

⁶Helep kwenang ilonggoma on etma re orohole fano angge unuk nilakandi ai wereg; ne kwenang ahe fam etma re emas il buhun on yohwareg wereg.

⁷Sue findi ohore etma lauk kwe kobokwe apeleg; ne suwe ik wesahup famen ohore obale eta emberim kwe eke darulug lasi fug.

⁸Wam singa oho di on su on maro on fomane oho re kobokwe mun dereng-dereng uruk kwe ai en etma eke lausa fug.

⁹Helep mundoho wirik anggoloreg kweleg de ap en habuldil kuruk; ne iren de dom omano foril kulug de dom indipmu etmano feik kuruk.

¹⁰Aren dom anyo foril kwik lauk men de, etma permata wirili hag on mun fano on hweaharuk.

¹¹Habuldil wamburuk men de ik eleruk fulohomdoho lahaik waharuk on fam feik wambulug[47] de, etma mundoho heraho wereg on etmano ename foruk.

¹²Famen de enenda wereg on aire keman hweahauk alereg? Nit nenoluk amag ulug de keman mamulehe halereg?

¹³Enenda wereg on aire ap homi nenesahalimu wereg fug, ap misig eke en il orohole direg angge ulug ebe dik-demdoho on oluk deg fug.

¹⁴Ik laut ahummu erahamu en inim ne ik laut ebe yenggeleg on emberimmu en inim, enenda wereg on aire nit fam wereg fug ulug uruk.

¹⁵Enenda wereg on aire emas il fano on fam ulug ohore onggo baluk fug alereg; ne perak fam oho re onggo hunduruk fug alereg.

¹⁶Emas mel permata mel, mun onggo hum angge en oho re enenda wereg on aire inim higit duk fug alereg

¹⁷emas mel woliom hag on mun sako on nim fam en oho re enenda wereg on ai nim higirap duk fug alereg, emas mun fano on wirik atsi on nim oho re onggo hunduruk fug alereg.

¹⁸No merjan mel, kristal mel, mutiara mel, etma mun sebeleg kweleg de enenda wereg on ai neg de mun leho.

¹⁹Enggatdoho wenggelduk on ai inim de helep anggen topas demdoho on mel, emas ebe on mel, onggo inim higitdeg fug.

²⁰Enenda wereg on aire indip de keman wilipuk? Furebelug duruk on aire keman wauk?

²¹Di angge su angge oluk wereg angge oma misig en oho eke inil hauk fug, ne suwe koloma darulug noruk on en oho re enamegma hauk fug.

²²Waratuk on mel, eleg atuk on mel en uruk kwit oho re, nit de enele en ulug walug neg urukmu holduhuk, ulug uruk.

²³At Allah en de o kwenangma di o su o unggut-unggut etma il eseheg, di angge du angge bohol apma wereg on oma re Aren neg fubi deberuk kwit wereg ma re,

²⁴Enenda wereg on ai wereg ma oho re we At Allah amu en neg oluk deg, ne etma lauk kwe aire we At neg oluk deg.

²⁵Aren hol omamne og-utuk li em, ne ik laut yenggeleg laruhu kwe ulug Aren helahalet foruk.

²⁶Aren osit wamburuk karuhu kwe ulug obale dugwi deberuk li em, ne oweal inim ululu inim lauk karuhu kwe ulug kobokwe fouk deberuk li em,

²⁷Eta li em neg enenda wenggeleg on anyo Aren hauk katsi, airoho halug de Aren orohole kumu halug, fanoreg ulug buhun-debesireg fesi.

²⁸ At Allah en ap homi fam uruk kwit de, “Enenda wenggeleg on ai og-nesowag ulug halug de, At Allah leho foruk kamuhup. Ne, fureberuk kamag ulug halug de, siag on ai ahayeroho yatmaap deberuk kamuhup,” ulug ebag.