Read Ninia Yali AYUB 29 Bible Online

AYUB 29 - Ninia Yali bible

AYUB 29

¹At Ayub en de ele uruk katfag on anyo lisoho uruk kwit de, diroho ebag,

²“An nebe atam Allah en hwal-napuk li deg latihik etano hagdoho, nebe airoho hwelale aho boruk kahi.

³Aren de an let-nabeheg, an o mum deg kwe laukmu Aren selehap nabeheg, duruk katsi.

⁴At Allah ninim hundig wereg lit Aren an nobam wirig anyo sebeloho forohoma re, li eta fam nalong balongdoho wereg latihik ale re airoho.

⁵Eta li em de At Omamne Humon anyo re an naluluk unduhuk latsi; ne an nomaliki re nowag luluk kwe maseroho welatswa.

⁶Nowam sapi, domba mel omano en de ahoe humdoho hwenangguruk katihik. Ne, nahan zaitun omano en de, kwenang helep anggen on wereg kwe yaho foruk famen oho re ahalue humdoho hwenangguruk katihik.

⁷Ne, it ap o kota fam etma log-log enap seberoho hweriatlug wereg ma, an oho it enesahalimu hweria aik lauk halug de,

⁸it ap sauwe on en an nealug de enebe iming atuk katswa. Ne it ap log-log enap anyo en oho re an nalong bolug leho nobaharuk kwit de enepe fano angge inatuk katswa.

⁹It ap yain-kain enele matuk angge oho re enele bale foruk katswa,

¹⁰ne it ap mun leho enap famen oho re enele lohon uruk katswa fug.

¹¹Ap homi en an nunuk urukmu enesanggo hol-halug de inil along deg latswa, ne iren an inil nealug de an den duruk kahi ale fahet de mot-napuk katswa.

¹²An den de it ap enenggik eleg on en let-nenebin uruk halug let-enebeheg; it omalik wetien on ap homi en let-esa fug on de an den let-enepuk katihik.

¹³An den it homi sohwe on let-esaukmu re enenda se atuk katsi, it ap homi anggolo-fanggoloreg on en de an mot-napuk katswa.

¹⁴An den duruk katihin ale etma re hwenaroho duk eleg angge mun bekitdoho neg duruk katihik; ne wene katukdoho duruk on aire an den omamneap deberuk katihik.

¹⁵It ap inil bug on fahet de an de it inil hagdoho atuk katihik; ne it ap eneyog siag on fahet de an de it eneyog hagdoho atuk katihik.

¹⁶It ap enenggik eleg on fahet de an den it enakni hagdoho atuk katihik; ne it ap bohon fahet de an it enalong bale angge atuk katihik.

¹⁷It ap enolok on en enomamne fam duruk on etmano re an den luluhun esauk katihik; ne iren wam waroho foruk angge etmano re an den wendare foruk katihik.

¹⁸An nenda ebereg welatihik ale re noluk umur yatdoho welatlug; nobam olman nebe finik-fanoroho wararuhuk ulug boruk katihik.

¹⁹An de e enggela hesiloho wilipuk kwit, omanggen fam ahalue wereg ma enggik fene nim lil en watuk anyo hagdoho deg latihik.

²⁰An nomamne re dorangge lohon maben atuk katihik fug; ap en hundig-hundig mot-napuk katswa.

²¹An den komo ale hweag-esaukmu re ap homi mundoho enele eleg atuk katswa; an nele uruk on etmano re iren fik-furoho holduk katswa.

²²An nele mundoho uruk halug de ap en eke ambiangma lisoho uruk katswa fug; osit ahaik wamburuk anyo hag de nele uruk on etmano mun enendama kwik lauk katsi.

²³Di angge su angge owil yihiruk li em osit waharukmu it ap yabuk wutuk enap en eiyale waha boruk katswa anyo hagdoho; an nele uruk on etmano re it ap homi en enahayegdoho wauk katswa.

²⁴It enenda siroho wereg ma re an naeg ninggi uruk katihik; an norohole fam healeg ale anyo fam de it eke nim enaheyehap kwelabe feseruk katihik.

²⁵An de enowe melal-enepuk on unduhuk wereg lit de, wene di on su on etare an den neg kong-duruk katihik; ap raja en autsi sehen foroho on enesahalimu kulug duruk hag an den it melal-enepuk katihik. Ne it enenda hesiloho wereg ma re an den enenda onggon enepuk katihik.