Read Ninia Yali AYUB 3 Bible Online

AYUB 3 - Ninia Yali bible

AYUB 3

¹ Ai en de at Ayub anyo en ele wiliboho nukoho at endag-atfag salim anyo wip duruk kwit de, diroho ebag,

²“Nakni Allah o, hup an nisinga ahummu atihik salim ai mel, an nebe endag-atihik salim ai mel, Haren wib debein!

⁴Nakni Allah, nukoho aire Haren mun mumap debelug de, Hat hunggul owag fam ebereg lahenma etman elehap debeiyug; Ambogbag fano on en selehap dukwag ulug Nakni Haren embesouk fug.

⁵Nukoho aire Haren heik koruag debeheg, mum-mam debeheg, orohole siagdoho heik-heik ale debeheg, hena inim emberimmu saloho debeheg, hup bin debeheg, diyug. Mo obam yaruk no ulug de sale mapnurebeiyug.

⁶Hup ai salim on aire, tahun mel bulan mel wenaharuk on omano fam en de eleho feseokwag; ap homi en oho ai fahet uhup hayog, nukoho ai mel wenggel-hahup hayog.

⁷Hup aire mum en neg mondeg lamag ai salim de mun fano ale ulug oho, enahayeg ale ulug oho mun eleg lamag.

⁸Yaho hit hwal henap mel Lewiatan [6] il watuk henap mel, nukoho ai hombuk baleheg, wib debeheg, diek aho;

⁹sohwalanggen wap anyo ambogbag duhu hayog, o hil yingguruk kwit ambogbag kwelabik waruhu hayog! nukoho ai wamag ulug nangno hauk on hup aire alemaroho nangno hauk kamag.

¹⁰Anggin-fanggin oma hauk kamag ulug nisinga en endag napsi salim, hup alemareg on ai hururung deg lamag.

¹¹Nunggwelug an nisinga ahummu en waratihik fug aho, ite endag-atihik li em eta sat dereng irihik fug aho?

¹²Nunggwelug an nisinga en mako bug naplug waling nabeheg, ag mon-nabeheg, disi aho?

¹³Etali em an waralereg wilibik leleman de, bik-bokdoho kel wat-dauk kwit nohoruk kale angge fahet,

¹⁴O indik-endam etma it ap raja mel, enalong wereg enap mel, en o endam etma wutuk katfag on omano nikangge obalma wutuk katswa hag en a,

¹⁵An de raja amloho hagdoho obam de perak, emas mel, hopodik debelug welatfag hagdoho nohoruk kale.

¹⁶Lebe mel duk eleg angge nanoho homogdoho nohoruk kale anggere, nunggwelug wareg angge endag-atihik fug aho?

¹⁷Ap waratuk on sal-enepukmu etma re, ap enolok on ohore enolok ale duruk fug, ne it ap yabuk enomamne mun eleg atuk kweleg duruk on oho re etman neg kel wat-dauk kwit wereg.

¹⁸It ap homi weim ambiangma en seneko feseik lauk on ohore, it ap kahal-enusug lit inil wereg on en enowatuk ale anyo mun eleg atuk mu eiyale ahi borukmu.

¹⁹O etma re ap homi abirangge fahet de higitdeg ma: ap doron et, it enunuk bogdeg on et, Ne, it enamingming anggeapdoho wereg on ohore fiselaroho wilibik laukmu.

²⁰Nunggwelug ap homi enebe ouk-bouk hauk kwit welamag ulug embeseruk ahi? Ap fong watuk on fam de nunggwelug selehap debeseruk aho?

²¹ It aireg on aire di angge su angge re mun enerim hag famen de waratuk on sal-enepukmu etma neg de mun enendareg, Aireg lit de nunggwe salim wararuhuk ulug nangno hauk kwit neg wereg famen de folo-folo enam aik waharuk fug.

²²It aireg on aire enebe mundoho waratil lauk em sale feserukmu neg de enahayeg ale uruk on ai hauk.

²³It ap aire enalukwe fil aruhu ale on anyo At Allah en mapnurebelug de, Aren neg ap anyo unggut foman-foman maseroho kwelaboho.

²⁴Nasiburu nauk on obalmangge re nendama nambik en aho uruk kahi, lohon bale fouk fug angge, su nangginoho hauk kahi ulug uruk-wauk kahi.

²⁵An den ai on nobam aik waruhu hayog boruk kahi on omano nobam aik waharuk neg, an den nakoldoho ahayeruruk kahi angge omano an horogma neg aik waharuk.

²⁶Anggin-fanggin aure mun bal-am fug aleroho hauk kahimu re, an fam de nenda hambukdoho bok wereg ale eke welahi fug alereg,” ulug ngururuk katsi.