Read Ninia Yali AYUB 30 Bible Online

AYUB 30 - Ninia Yali bible

AYUB 30

¹Famen de ketia it ap sauwe on etmano en an unda yag napuk; endam de it enakni an nowam domba omano it gembala enamene nim hwaldukmu re, an den it maben hag boruk katihik.

²It enomamne mundoho eleg atsi mu re, it fahet de an den nendareg latihik fug.

³It enebe re siburu obok anggoloroho wereg lit de; o leimu ap homi elegma etmano en omanggen iringgig on omano nauk katswa.

⁴O leimu etmano en de iren mesei yahalug de; enggela inim ebe inim mundoho nauk katswa.

⁵It enebere ap heraharuk on yeik waroho wilip-enepuk anyo hagdoho; yeik waroho wilip-enepuk katswa.

⁶It enebe re owik elekwe etmano wereg lit de; dom etmano it enobam atuk mu re ele fololeg on etmano obahat debelug welatswa.

⁷Ohwei obahare on fam de mene en duruk hagdoho re kouwaruruk katswa, ne enebe re somun-somun angge apmane ohweimu etmano esan lohwaloho welatswa.

⁸Ap homi it enobam en muko wilibi feseswa on deg ma re; enunuk eleg angge enebe siag-biagdoho welatswa.

⁹Ne, ketiare it omano watlug an unda yag napuk; iren boruk kwit de an aure it enemaheag angge hagdoho boruk.

¹⁰Iren an fu nealug de mun siagdoho maben deg boruk; an nolohotma re wasulahap supdoho hwik neauk.

¹¹At Allah en an nobam lilipnaroho nomamne elehap nobahasimu re; iren enolok hauk ale anyo mundoho debeik waharuk.

¹²It ap o sel kwelapni etman de an wararuhuk ale diroho ulug iren wene melaleg de an nalukwe fil en housalik waharuk.

¹³Iren de an nebe elehapdoho nobahauk ulug de kwe baloho forukmu re, it airoho duruk kweleg eta ap misig eke en oho it kwe bal-enepuk fug.[48]

¹⁴Ik fu waharuk kwit omamne angge waharuk anyo hag de an nobam elehet fak omamneroho oho on anyo fam enebe sahali ik watlug de, enebe abirangge enanggilukdoho re an nebe berel nabik waharuk.

¹⁵Hol firoho lauk anyo hag de an nebe fano welahi ale anyo mundoho eleg aheg, hena baloho lauk hag an nahayeg welahi ale anyo baloho eleg aheg, durukmu re anggin-fanggin neg nobam wereg.

¹⁶An naouk hauk kahi on su mun anggin am ale atuk mu re; ketiare an mundoho wararuhuk on deg ma hauk kahi.

¹⁷O hup anggere an nowag elekwe mundoho fato neg duruk kwit de, mun fulung durukmu re eleg am fug aleroho neg napuk.

¹⁸At Allah en de an nanggolopma hamboroho og-napsimu re; an nasum wandeg latihik on anyo nebe liloho song-song angge duruk katsi.

¹⁹An de sabelep fam hwik-neasimu re; ololo hwik-esauk on hagdoho welahi!

²⁰Nakni Allah o, an de Hat hobam hwi hapuk kahimen de, Haren hele wurep-neauk kahen fug; ne an den somban urukmu re Haren funobaharuk kahen fug.

²¹Haren an nobam mun holok hasimdoho duruk kwit de, Hat homamne abirangge fam an sebel neauk kahen.

²²Haren de an hol en firoho og-naplug lowag ulug nobahalug; hol fam etman Haren an nebe hebel-febel neauk kahen.

²³Haren it ap homi enoluk wereg on waratlug laukmu mundoho kabog-debeseruk kahenma, og-naplug lauk kahen ale aire an mun noluk deg;

²⁴Ap enebe mundoho alemat atlug wereg lit, di on su on duk fug alereg ma enenda nelep aho, ulug boruk kwit wereg kweleg oma, Nunggwelug Haren enobam anggin neg feseruk kwit welahen?

²⁵An de it ap homi enobam anggin atuk on nim de oba yatuk katihik, ne it ap homi enangge we dorangge neg deg ma duruk on fam de nenda hundig enepuk katihik.

²⁶An den de seleg inim nahayeg hauk on nim enam alep ulug nangno hauk kahi; famen de anggolo on nim mum on nim neg enam aik waharuk.

²⁷Airoho atuk mu re an nenda mun hesilduk kwit neg weregman lilipna uruk kahi; di salim su salim nukoho hundig etano ouk-boukdoho neg hauk kwit welahi.

²⁸O seleg elegma mun heik deg kwe lag-wag uruk kahi; an nebe it ap homi humdoho kabogdeg ma enolohotma inatlug let nabiek ulug heng-enepuk kahi.

²⁹Nele oba uruk kahi on de mun nenda fu ale omano, suwe unta mel olomene mel en enele uruk hag uruk kahi.

³⁰Nahap de mundoho ul banggum ulug anggen og-heheg lauk; Nebene ahanhan en de nebe mundoho han na ale duruk.

³¹Endam de binggong enahayeg fam watuk mu holduk katihik, ketiare we oba yareheg, fong wareheg duruk on neg deg ma holduk kahi.