Read Ninia Yali AYUB 31 Bible Online

AYUB 31 - Ninia Yali bible

AYUB 31

¹An den de it hwelani duhum on fam nil fu esalug nenda nahu hayog; ulug nele hombuk baloho irihik.

²At Allah en nit nenobam keroho duk alereg? Ap homi en duruk on onggo re Aren keroho debesouk alereg?

³Ap siag duruk on fam de, Aren enebe alemat atuk on nim enebe nong-hong uruk on nim enobam feseik wam alereg!

⁴An den duruk kahi alere At Allah en de demdoho oluk deg; ne an lauk kahi ale re Aren mundoho il neauk.

⁵An de nele hombuk baloho uruk kahi ai, ne an den de hwenaroho eke dirihik fug; an den ap homi eke laloho hweag-esauihik fug.

⁶At Allah en anggin ilit-duruk angge demdoho on fam kumu neowag; an kumu neauk men de siag dirihik fug on aire At oho oluk deg.

⁷Wene demdoho on fam en an den dahandoho wilibik lauihik halug oho, ite mun siag angge fam nenda sisimu dirihik halug oho, ne an nenggik fam en siag dirihik halug oho re,

⁸an den yatihik angge etma ap amu on en nowag, ne an den neyabukmu yatihik on en anggen yihig etma mundoho amu siag amag.

⁹An den it nare o foma fil on ohwe fam nenda nasimu, nebe sok mapnu heraho lit ben duruk katihik halug oho re,

¹⁰an nohwe en de it ap amu on fahet esag-werag enepuk kamag; ne at ebere ap amu on en inim nohoukwag.

¹¹Ne, an den siag mun duk fug on famen ai demdoho dirihik halug aire, an unggum nobam fohup halug aire demdoho at.

¹²Siag aire indok ambulbul humon en elehap duruk anyo hag deg ma re; an nangge mundoho wereg angge etmano mundoho elehap debesi.

¹³It an namingming angge etmano en it enangge on fam en an den amuroho dirihik mu, enele uruk-wauk halug de; an den it enele hole folug de, nenda bekit fam debeseruk katihik.

¹⁴Ne, an den airoho debeseruk kale fugmen de, an keroho nakni Allah olohotma ik lamin ulug no? Ne, At watlug an ayo wiroho biling-napukmu re an den onggo keroho uhuk en?

¹⁵At Allah en de an wal-nabeheg, ne it namingming angge etma wal-enebeheg disi fug no a? Aren wal-nenepsi neg.

¹⁶Ap homi enangge eleg on wereg halug an den mundoho let-enepuk katihik; ne it homi sohwe on enenda kolokwe ya fa ulug wereg ma re, airoho deg lamag ulug embeseruk katihik fug.

¹⁷An nebe nauk on higitdoho wereg kweleg, it omalik wetien on enasiburu obokdoho welamag ulug embeseruk katihik fug.

¹⁸It enebe dotdeg li en de an den it hwal-enepuk katihik[49] deg; an nebe noluk wereg lit aire hwal-enepuk kwit neg welatihik.

¹⁹An den ap enangge elegdoho wereg lit; enasum hun-dale mun enelaheg deg ma esalug de,

²⁰an nowam domba ahap omano fam en enahap fam bug debeseruk katihik, airoho enepukmu re iren enenda abirangge en an mot-napuk katswa.

²¹An nawene bilingguruk kwit an nalong atmin beheg, it omalik wetien on mel soareg on mel sebeloho feserihik halug oho re,

²²an nenggik birenet somboroho lalug; nomalo fam en saroho lowag.

²³At Allah en unggum og-esauk on aire mun namelmel on deg ma re; an den airoho dihi fug alereg.

²⁴An nangge wereg on fam nenda dip-debelug duruk katihik fug;

²⁵ne nenggik wereg on welatihik ai fam leho fahat-dauk katihik fug.

²⁶Mo ambogbag fanoroho yatuk on ai fam ulug oho, ite bigalem ombagbag buhundoho yatuk on ai fam ulug oho apne wauk katihik fug.

²⁷At fam ulug nenda lisuruk ale oho duruk katihik fug; ne at along deg en ulug uhu leho foruk kwit ulug nenggik yaun nauk katihik fug.

²⁸At Allah Mun Omamne on anyo embeselug durukmu re, siag ai hag on de unggum enobam folug enebe binggi enowaruk alereg ma hauihik.

²⁹It an naselei on enobam anggin-fanggindoho wereg ma an nahayeg en duruk katihik fug; ne it bule wamburukmu an nawonog atuk katihik fug.

³⁰An den it naselei on waramag ulug somban uruk katihik fug; siag aireg on etma re an de duruk katihik fug.

³¹It ap homi an nobam yabuk duruk katswa on de enoluk deg, ap abirangge etanore an nobam hondoko kwelap-eneplug nasiburu og-esauihik on neg.

³²Ap o yatma lauk on fahet oho re an nobam nasok husig lit neg wereg ma noholug lauk katswa; it enebe dagma noholug lowag ulug embeseruk katihik fug.

³³It ap homi amu on enesiag wereg halug de sebelduk katswa; famen an de iren duruk katswa ai hagdoho duruk katihik fug

³⁴It ap homi enebe abirangge en enenda boruk ale enele seberoho uruk on fahet de an nakol boruk katihik fug; it ap homi en siahap-biahapdoho nobaharuk halug ohore, airoho napuk en ulug duruk katihik fug. Ap homi en siahapdoho nobahauk no ulug nakol en, an olma wereg ale oho, ne nele eleg angge wereg ale oho duruk katihik fug.

³⁵An nele uruk kahi on oma ap enesanggo holduk on de eke wereg fug a? An den uruk kahi etma re abirangge demdoho ulug hombuk baloho uruk kahi ai. Aireg ma re we At Mun Along wereg on anyo en neg onggo hweag-nomag. It ap homi an nobam hekip neauk on etma, mundoho lisu baloho felepma an nil hauk kaleman de,

³⁶an nenda nahayeg fam numu borebele, ne mahkota hagdoho re nunggulmu bug dele.

³⁷An den dirihik on etma re At Allah fam mundoho hweag-uruhuk; an den At olohotma nelaha leko nahayeg fam hweag-uruhuk.

³⁸An den kwenang habuloho yabuk witihik on etma heraharihik deg en witihik halug oho; ne it enonggwareg demdoho on wereg kweleg deloho witihik halug oho,

³⁹ne anggen yihisi on an den mundoho nauihik halug oho; ne it yarukwag ulug mingming-enepihik on etmano enasiburu obok angge embeserihik halug oho re,

⁴⁰yabukmu etma re gandum mel soabuk mel wilibuhu hayog; ite enggelangge alog on mel, osuk-osuk angge mel, wilibukwag,” ulug ebag. At Ayub en de ele mundoho airoho ebag.