Read Ninia Yali AYUB 32 Bible Online

AYUB 32 - Ninia Yali bible

AYUB 32

¹At Ayub en an siag dirihik fug ulug endama demdoho boruk katfag ma re, it ori enebe henahan etano en oho re at ele wurep wauk ale embesebag.

²Famen de etma ap misig eke unuk de Elihu hun Barakheel amloho, it enunggul unuk Ram on fam en de hun Bus ambiangma on ai welatfag. At wereg ma etma at Ayub en Allah obam hekip hauk kwit de at Ayub onggwareg fanoap dobahat-dauk en de, at ahummu het lahabag ale anyo sebel ha fug ale duruk katfag.

³Aren de it ori henahan etano en oho at Ayub en uruk on anyo sahaloho hweag-om on de, we iren at siaho neg foruk katfag ma re it bet-enepfag.

⁴It ap enebe welatfag on etano en de at Elihu re it enaut on deg latfag ma re it fomane dam ulusama at imin ulug nangno esauk katfag.

⁵At il esauk men de it ap henahan etano en onggo uk fug ale durukmu esebagdeg de, aren it enobam olok enepfag,

⁶olok enepfagdeg aren uruk kwit de diroho ebag, “An de nebe sauwereg lahi, ne hit de henebe ap lohon deg lahep, ai fam de an nenda behi on uk alere, nakoldoho nenda anggin napuk.

⁷An den nenda boruk kwit de hiren neg henele ulusa, ne hit de ap lohon deg lahepma re, hit henenda wereg ale ulusa behi.

⁸Famen de ap homi enobam enenda werehe feseruk on aire, At Allah di ale su ale mundoho duk alereg on anyo Aheime en neg og-esauk.

⁹Ap enenda hebeleg on atuk aire, it enebe mun sobal aik lauk ai fam de fug; ne it ap demdoho on atuk aire it umur yatdoho wereg ai fam de fug.

¹⁰Ai halug de an den uruk kahi on su henesanggo holiek; an nenda behi ale on ai imin en de, fano in ulug hweag-nemek.

¹¹Hit henele uruk li em etma re an nenda sebel hauk kwit bok welahi, ne hiren nenele hebeleg on de keno ul ulug herarurukmu etma re nangno hesauk kwit welahi.

¹²An den hit fik-furoho kumu hisihimu, ne hiren uruk kahep on etma hol hihimu re, hiren uk fug aleroho neg atuk kaha; ne at Ayub ele uruk on etmano fam en siag on de ebe su ulug uk fug ale durukmu henisihi.

¹³Airoho duruk kwit en famen hiren uruk kwit, enenda wereg on anyo niren mundoho hauhuk uruk kahep? Hit henebe nangginuk-nangginuk henele sa eheik etma. We At Allah amu neg de at Ayub en uruk on etmano onggo uk alereg ma hihi.

¹⁴At Ayub en de an nobam uruk kaha fug, ite hit henobam at uruk kaha; famen de an den de hiren uruk kahep eta hagdoho onggo ihi ha fug alereg.

¹⁵Ayub ao, ite enenda sug-sag eheikma re onggo hweag-hom fug ale aha, iren enele uk alere mun nong-hong eheik.

¹⁶It enele uk fug ale neg atuk en de unduhuk lit neg welahesa. It enele uk eleg angge bok wereg en ulug an nangno esauk kwit welatmin a?

¹⁷Eleg, ketiare an den onggo uruk kahi ai; an nenda behi ale hweag-hutuk kahi ai.

¹⁸An nangno hauk kwit welam fug ale napuk; an nele imin ulug deg lahi on anyo hambuk ha fug ale napuk.

¹⁹Ne, an nele eleg angge neg wereg ma de, ikwag anggur ahalue ele sopdoho hwenanggeg on aningning en sog duruk anyo hag an sog dihi ha alereg.

²⁰An nenda hambuk dukwagdoho re an nele imin fano; an nele wiliboho wene onggo hweag-hitmin fano.

²¹Wene su fam de ap sa-sa ulug inili oko inibil ahi ha fug alereg; ne ap misig on oho an den mot-dihi ha fug alereg.

²²An de ap motdoho lahabe feseruk ale etma oho re mun napeleg; ne an den airoho dihi ha man oho re At Allah en folo-folo an unggum og-nom alereg.