Read Ninia Yali AYUB 33 Bible Online

AYUB 33 - Ninia Yali bible

AYUB 33

¹Ayub ahwi, ketiare an den nele uruk kahi on su, fik-furoho hesanggo holiyug.

²An de nele imin ulug aire, mundoho fik-fouk dihi.

³Ne, an den de nendama mun bekitdoho deg lit nele uruk kahimu re; an den uruk kahi on sure wene demdoho on uruk kahi.

⁴At Allah heime en de an wal-napsireg de; an noluk welamag ulug nobahasi.

⁵Aireg ma re, haren uk alereg halug de an hele onggo hweag-numuk, ne haren oho hili og-dauk kwit wene onggo imihin angge re fik-fouk deg wereg nu.

⁶At Allah en de nit nenebe birenet kwenang dangge on fam en wal-nenepsimu re; At Allah en de haret angge andet anggere mun higit deg neg welahe.

⁷Aireg ma re an den hat halong elehapdoho hobahamin fug anggere, haren an nobam hakol nabuk fug.

⁸Hun haren hele uruk kahen on etma an mundoho nesanggo holihi; ne haren henda behendeg uruk kahen ale etma oho an furebehi neg.

⁹Haren uruk kwit de, ‘An de wene eke dahandoho duruk kahi fug mu nebe nahap horeg. An de siag ale eke dirihik on wereg fug, an nebe koloroho welahi.

¹⁰Famen de At Allah en an nobam il napsireg de anggin on nobam foruk kwit; Aren de an anyo a weim on hagdoho nobaharuk kwit wereg.

¹¹ Aren de an neyogma sabu bosiemanggen on elang deg angge fam het-nobahasireg de; an nobabe duruk ale anyo fahet kahal-nusug lit wereg,’ irihin.

¹²Ayub ao, Ap homi re mun dotdeg kweleg At Allah aire ebe hum ahun deg ma re; haren berihin deg uruk kahen on etma re mun sei aleroho uruk kahen!

¹³Ap en At Allah fam enele hweag-utuk on anyo holuk fug angge duruk ulug, etma nunggwelug haren Allah fam hekip hauk kahen?

¹⁴At Allah en de wene indip eke on fam ele hweag-esauk; famen de it ap homi misig eke on oho At ele uruk on anyo furoho holuk eleg angge neg duruk.

¹⁵ It ap homi o hup angge noho hemegdoho nohoruk kweleg; At Allah en ena fam inim ne a fam hagdoho hauk kwit hweag-esaukmu holduk katswa on fam inim hweag-esauk.

¹⁶At Allah en de it enesanggo holukwag ulug hweag-eseheg, ele fag esauk fam youk wilibi feseheg, duruk.

¹⁷Airoho duruk ale aire it ap homi en siag neg duruk ale anyo bale feheg; it enawonog duruk ale anyo embeseheg, dukwag ulug duruk.

¹⁸Aren de it enebe siag-biagdoho amag ulug embeseruk fug; it enebe waratuk on fam etmano en Aren ili og-enepuk.

¹⁹At Allah en de ap komo enepuk kwit de, it enobam ouk feseruk; ai fam de it enehap fam mundoho ouk anggoloroho hauk.

²⁰Ap ouk wauk on anyo re asiburu ahaik nauk ale et mundoho erim durukmu re; nauk on unduk mun neg deg angge famen ohore ahummu me aperuruk.

²¹Ebere mundoho bug sabu atlug de; owag neg mundoho enam-fenam uruk.

²²At ebere ap homi mundoho waratlug laukmu etmano la on famen wereg; at ebere ap homi waratlug laukmu etmano mundoho horohe feik lalug en wereg.

²³At Allah en ayonggo malaikat enebe 1.000 en wereg on enesahalimu en de we at misig en neg, ap homi en eneyabuk duruk ale fahet ebet esalug de, it enebe yabuk durukmu etmano let-esa waharuk.

²⁴Watlug de enda mun sebeleg fam uruk kwit de, ‘At aire ap homi waratlug laukmu etma re wambik lahu hayogdoho re, fotog-esakiek; At ebe enggik lol angge ulug onggo re su,’ ulug ik waharuk.

²⁵Airoho ik wahail lauk em neg de at ebe mun omamne atlug de, ap sauwe on enahap oluk deg hag aruhu.

²⁶Ne, aren somban uruk em de At Allah en enda hundig durukmu re; Aren enda ahayeg fam Allah mot-durukmu, At Allah en at ebe deg on anyo mundoho fanoap deberuk karuhu.

²⁷Ai fam de ap homi humdoho enolohotma en aren uruk kwit de, ‘Mun siag on fahet an den fano ale boruk kahimu re nasiag humon wereg. Aireg kweleg famen de At Allah en an unggum og-nitsi fug,’ uhu.

²⁸An ap homi waratlug laukmu etmano la no ulug At Allah en an kwe bal-napsimu; ketia noluk welahi ai

²⁹At Allah en ap homi enahap wendare feselug enoluk og-eseheg, enahayeg on og-eseheg, dimin ulug de,

³⁰At Allah en de hundig-handig airoho neg napuk katsi.

³¹Ai halug de Ayub ao, ketiare an nele uruk kahi anggere; hat hele eleg angge wereg lit de hesanggo neg langdeg welamin.

³²Famen de haren eke imin behen on wereg halug de in; ne hat hele uruk fam ai hat demdoho halug de an den oho haren ai demdoho ehen imin.

³³Famen de airoho imihin fug halug de, hele eleg angge wereg lit an den imin on neg hesanggo holeg lamin; an den de hat henda wereg on anyo mamul-hapmin anggere.