Read Ninia Yali AYUB 34 Bible Online

AYUB 34 - Ninia Yali bible

AYUB 34

¹Hun hat de enggat deg lit wenggeleg lahen hahun deg ma re, an den nele uruk-wauk katmin suma hesanggo holiyug.

³Ap homi en de di angge su angge unduk neg halug de su unduk mun fano on ulug enoluk deg; ne enele urukmu hol-halug de ap sure enda wereg ahun en uruk ulug enoluk atuk.

⁴Wene wereg on aure niren furoho kumi halug de; ambine seberoho elehap dukoho lahe.

⁵At Ayub en uruk kwit de, ‘An fam siag on eke wereg fug famen de, At Allah en an fam katukdoho on de su ulug og-nutuk fug.

⁶An den uruk kwit an siag dirihik fug urukmu re; ap su seiale uruk on boruk. An siag dirihik fug famen de; ketia an anyo yebil mun anggoloroho hauk kahi,’ ulug ebag.

⁷Yaho, ap eke hun Ayub su hag on eke hauhup a? hundig-handig Allah siahapdoho neg foruk ahun su hwi

⁸At de ap siag neg duruk on sebereheg; ap naleg-haleg angge neg duruk on nim mang-mangno deheg duruk.

⁹Aren uruk kwit de, An den At Allah enda ahayeg boruk ale neg dimin ulug duruk kahi; famen de we alemaroho hag duruk kahi, uruk.

¹⁰Yaho ap henenda wenggeleg henap omano henesanggo holiyug! At Allah Mun Along wereg on ai de siag duk alereg a? Mun eleg.

¹¹ At Allah re it ap homi en enobabut duruk ale domog onggo enobam debeseheg, it enebe deg aleroho debeseheg, duruk.

¹²At Allah Mun Along wereg on aire siag duruk fug; Aren de ap homi mundoho enewene katukdoho neg debeseruk.

¹³At Allah re Omamne Along on ai san og-utuk behep? O kwenang sure ap san hwal-duk kamin ulug obam fesi behep? Mun eleg.

¹⁴At Allah en it ap homi enoluk anyo oko walug; it enesat anyo lisoho waman de,

¹⁵it di angge su angge mundoho enoluk wereg on anyo mundoho waratuk kwit; ap homi re nikangge sombandoho kwenang on am alereg.

¹⁶Aireg ma re hat henda wereg hahun halug de, furebelug de; hesanggo langdoho holeg lamin.

¹⁷At Allah mundoho along wereg lit katukdoho neg duruk on ai haren siahap deberuk kahen ai a? Ne, haren boruk kwit de, wene katukdoho duruk on aire At Allah en erim boruk ulug uruk kahen a?

¹⁸It ap raja mel enalong wereg lit o sebeleg wereg enap mel, en it enelok deg lit kwasikdoho neg duruk halug de At Allah en unggum enobam feseruk.

¹⁹At Allah en neg it ap raja et, enenggik wereg on et, enangge eleg on et wal-enepsi mu re, Aren de it ap raja halug neg inibil aheg, ne it ap homi enangge eleg on halug bap debeseruk kwit it enenggik wereg on halug neg olohotmaap debeseheg, duruk fug.

²⁰At Allah en it ap sebeleg wereg enap etmano unggum og-esama re, hup andundu famen oho re it enebe fetagdoho waram alereg. Ne, it ap enalong-benalong deg enap etmano re siseroho enowarukmu re, it enebe mundoho eleg am alereg.

²¹Allah en de it ap homi enebe anyo il kwelap nenusug lit wereg; niren di kwe su kwe lauk ale duruk ale anyo mundoho fubi-nenobaharuk.

²²O heik deg ma il mun mum-mam deg ma famen oho re; it ap homi siag duruk on de herag am fug alereg.

²³It ap homi Allah en wene katukdoho hweag-nesowag ulug Allah akit lahup salim fahet; At Allah en li di salim[50] ulug eneko fouk fug alereg.

²⁴It ap o sebeleg wereg enap omano re it enawene furoho kumu halug baluk eleg anggere; Are it enobalma keron unduhuk feseruk.

²⁵At Allah en de it ap etman duruk ale At oluk deg ma re; o hup angge it enebe sebeloho siaho feseruk.

²⁶It enesiag fam de enoroholanggen dagdoho enowatuk; ne it ap homi humdoho inil hanim de it enebe unggum og-esauk.

²⁷Iren de At enda ahayeg boruk ale anyo holoho duk fug angge deheg, At ele welaleg hweag-esauk on anyo furebouk fug angge deheg, neg duruk en de airoho debeseruk.

²⁸It enobabut duruk fam de ap homi enenggik eleg on etmano en enenda watauk on etmano re At Allah en esanggo holduk.

²⁹At Allah en an nele eleg angge bok welatmin ulug duk men de ap misig en oho eke ambong seroho nunggwe fahet deg lahen ulug obam uk fug alereg. Aren orohole heraho folug wereg ma re ap misig eke en hweahauk fug alereg.

³⁰Airoho deg ma re ap enalong wereg lit enomamne fam sebel-enusug anyo hag siag on along atlug sebel enusugmu re, Ap homi di enunggul unuk su enunggul unuk omano en ai on elehap dul ulug duk men de am fug alereg.

³¹Ayub ahwi, hat hasiag de Allah fam mundoho fag-dirihin a, eleg a? an siag eke nim duhuk fug ulug de At il hanim hele unduhuk ferihin a, eleg a?

³²Hat hasiag wereg on anyo ebe enamoho hweag-homag ulug de At fam heng irihin a, eleg a? Haren duruk kahen on anyo bale fohuk ulug de hombuk baldihin a, eleg a?

³³Haren At Allah en duruk on anyo fahet demdoho bouk eleg kweleg de, At Allah en de haren heng uruk kahen on ai hele hole fuk alereg boruk kahen a? Ketiare we haren neg kongdoho in, ne an de fug; Haren henda behen ale ai in!

³⁴It ap enenda wereg enap en oho, it enenda hebeleg enap en oho re, an den uruk kahi on au fahet de demdoho uruk kahen uk alereg. Ne, iren hol-halug uruk kwit de,

³⁵At Ayub en etma re fubi debouk fug angge en uruk; ne aren de ebe di on fahet uruk kahi ai apeleg angge en uruk, ulug uk alereg.

³⁶At Ayub en ele uruk on etma fik-furoho holeg laman de; aren etma re ap kwasikdoho duruk on en uruk hag ulug fubi debouk alereg.

³⁷Aren kwasikdoho duruk on anyo re asiag eke nim dopno deberukmu re, aren nit ninil hanim Allah anyo sebeloho folug de, At Allah ele sahaloho fouk alereg.