Read Ninia Yali AYUB 36 Bible Online

AYUB 36 - Ninia Yali bible

AYUB 36

¹An den nai Allah unuk fam an den foma eke hweag-hitmin en duruk kahi, anggere hambuk halug hesanggo holiyug.

³An wal-napsi on anyo Aren katukdoho neg duruk anyo eneg deg ma howag ulug, an noluk deg ale humdeg ma re ai on fam ikoho lahi.

⁴An nele uruk kahi on etma re seiale on eke wereg fug; it ap demdoho enenda wereg on de hat halukwema wereg.

⁵Allah aire mun anggiluk wereg ma re, di ale su ale mundoho fubi deberuk; aren de ap misig eke maben hag boruk on eke wereg fug.

⁶It ap homi siag duruk on de enoluk yatdoho welamag ulug debeseruk fug; ap ouk-bouk hauk on fam de aren katukdoho ale neg debeseruk.

⁷Ap en bekitdoho neg duruk halug de, Aren fubi debeseruk; it enebe re ap raja wereg lit melal-enepuk omano hagdoho enalong welamag ulug debeserukmu re, it ap homi en li mundoho-mundoho etmano fam enalong bolug mot-debeseruk kwit neg wereg.

⁸Famen de ap eke sabu bosiemanggen fam bombale feseruk halug de; at duruk anyo ambiangma ouk hauk.

⁹Ai fam de it enesiag duruk on nim, it enonggwareg en winik-wonog uruk kwit duruk on nim, Allah il hanim enamegma debeseruk.

¹⁰Aren de it ap homi enesiag duruk on anyo embeselug, it enenda wenggeloho ulug hweag-esauk on anyo hole folug welamag ulug hweag-esauk.

¹¹Airoho hweag-esauk men, iren Allah en uruk on anyo mutlug laheg, At obam neg wene kabog deheg, duruk halug de, it enebe enakol eleg angge wereg lit enangge di angge su angge mundoho wereg neg degman it enebe waraik lahup.

¹²Famen de iren hole fouk fug angge duruk halug de, it enenda sohou fam waramuhup.

¹³It ap homi enakni tuhan hagdoho elegma we hesangge neg duruk on en de enahummu enolok foroho lit neg weregman; At TUHAN en unggum enobam foruk famen oho re nit let-nenebiek uk fug angge neg wereg.

¹⁴It enebe mu siag-biagdoho wereg lit de; it enebe enahap oluk deg li enobam deg ale etmano duk fug ale atuk em waratuk.

¹⁵At Allah en de it ap homi enobam ouk hauk ai fene mamul-enebeheg, enobam anggin-fanggin hauk ai fam enenda enggarap enebeheg, duruk.

¹⁶Hat hebe anggilik-anggoloroho wereg kweleg At Allah en fiselaroho hobahasimu; hat hebe mun finik-fanoroho wereg lit, hahan meja doaleg fam inim hangge nauk angge hoporoho welatsi ai.

¹⁷Famen de hat hasiag dirihin onggo re ketia unggum hwelauk kahen ai.

¹⁸Uang enenggik apmane hwelauk on fam lal-habeheg, enenggik wereg on atuk fam kwe bulema hobahaik laheg, duk no re kahaleg lamin.

¹⁹Ap homi fam let nabiek ulug heng enepuk kahen on etma re we hesangge hag; ne hat homamne elegmiroho duruk kehen on etma re we obahareroho neg duruk kahen.

²⁰Haren o hup angge it ap homi enunggul unuk on etmano mundoho waroho lin uruk li em ulug, hendama begdoho welam fug.

²¹Hat haouk hauk kahen aire haren siag ale dirihin on au embesekwag ulug hapukmu re, haren horohole endenoho it ap homi wene sahale folug duruk on fam lahen hano re hape hebeloho diyug.

²²At Allah aire Omamne Mun humon wereg ale anyo hat henda ebet hakin. Ap guru wereg on At higitdoho eke wereg a?

²³At lowag ulug de ap sa en eneko foruk; it hat siag dehen ulug de ap sa en obam hekip ha alereg? Mun eleg.

²⁴Aren di angge su angge mun buhun-bahandoho fesi ale fahet mot-duruk; ne haren oho re we At neg mit-motdoho foruk karuhun fano.

²⁵Ap homi mundoho en de Aren waldoho fesi angge oma inil hauk; famen de ap misig en oho eke dik-demdoho fubi deberuk on[51] wereg fug.

²⁶Allah aire At ebe mun seleg ambogbagdeg on wereg ma re, ap homi en eke ebe diroho deg ahun ulug fubi debouk fug alereg; Ite At welatsi on tahun su huli ulug wenahauk fug alereg.

²⁷At Allah en neg ik o kwenangma suma en walug lahalug henaap deberukmu; hena anyo ahamdoho ik atlug depdoho hag osit belabik waharuk.

²⁸O hena heik deg ma anyo en Aren osit, ap homi enobam hililoho belabik waharuk.

²⁹No hena etma balug lauk ale fahet, ap eke en su diroho lauk ulug oluk deg fug; ne At Allah ebe wereg ma bohol fam etman ululu aplohok sipuk duruk on fahet mel diroho ulug oluk deg fug.

³⁰Bohol fam etlema Aren oweal ambogbag fam seleg duruk kweleg de; ik laut yenggeleg on il apma etma re mun heik koruag deg lit neg wereg.

³¹At Allah en ap homi di enunggul unuk su enunggul unuk enoluk welamag ulug debeseheg, enengge nauk on hoporoho og-eseheg, duruk alere obabut airoho.[52]

³²Aren de oweal enggik en seneko re, At enda borukmu etmano lepengdoho sebelik lowag urukmu airoho duruk.

³³Ululu sipuk duruk halug de osit watmisi en duruk ulug enoluk deg; ne it wam endetuk on oho re hol humon dimisi ulug aire enoluk deg.