Read Ninia Yali AYUB 37 Bible Online

AYUB 37 - Ninia Yali bible

AYUB 37

¹Aplohok mil-mil angge duruk on ai en de an nendama et elek deheg, ne nenda anggenmat bong-bong angge duruk.

²Yaho hit ap homi mundoho, Allah ele uruk angge ai holiek; At ambilik fam en ele sipukdoho wilibik waharuk angge ai hakiek.

³Bohol abirangge fene oweal lepeng esauk; kwenangma unggut-unggut etma asisingag baloho belapuk.

⁴Airebelug de At elere houwaloho hwik dik waharuk; hena fam etman ele kululuk duruk, ne ele kululuk duruk on sahalimu etman de; oweal lepengdoho dahan-dahan atuk.

⁵At Allah ele amingming fam de along wereg on mel, di ale su ale mik on; niren mel furebehe ha fug on mel, duruk.

⁶At ele amingming fam de lumbiag kwenangma wambik waharuk; At ele yonggo fam de osit humon wambik waharuk.

⁷Aren neg yabuk duruk ulug ap homi en enoluk amag ulug de; it ap homi en yabuk duruk on etmano mundoho bokap debeseil lauk.

⁸Eke it di on su on inil bolog on etmano oho re kwenang habulig elekwe mel, koru elma mel; ena wirigmu etmano herag aik kuruk.

⁹Selatan fil en de hol sielu warik waharuk; ne utara fil en de hol habub on leng ha waharuk.

¹⁰At Allah ambilik ahe fam de ik ahum yahamagdoho yenggele feheg, ne ik fam en ahamdoho lumbiag olom debeheg, disi.

¹¹Hena fam de ik yenggele fesi; oweal en de anggulog kuron etmano ambogbag duruk.

¹²At Allah ele melaleg fam de hena o kwenangma suma mundoho wereg, ne di kwe su kwe mundoho balug noruk.

¹³At Allah en de kwenang oweruruk kamag ulug osit feheg; ite ap homi unggum og-esauk kamag ulug feheg, disi. Ekere it ap homi en boruk kwit At Allah en enda hundig nenepsi aire mundoho-mundoho fahet; ulug enoluk amag ulug ename fesi.

¹⁴Ayub ao, il misig bok wereg lit hesanggo holeg welamin; At along along on duk fug on disi ale etma furin.

¹⁵At Allah en oweal hena fam inim anggulog fam inim en wealug lowag ulug; eneg ale deberuk ale aire hat holuk deg a, eleg a?

¹⁶At Allah mun oluk humon anyo fam deberuk angge; anggulog koloma etlema borulug lauk ale aire hat de holuk a hapeleg a?

¹⁷Eleg, hat de o kwenangma suma hol sielu selatan fil etman fi ha waharukmu ahanhan duruk on ai fahet nenek duruk kahen.

¹⁸Hat hebe Allah hag atlug henggik en bohol sohwalanggen wereg ma ai wiriloho fehen halereg a, ne airebelug ap en woliom il apunag hag on mel, logam mel hililoho keng dukwag ulug deberuk hag debehen halereg a?

¹⁹Niren Allah fam hweag-umul en, diroho hweag-emek ulug nit mamul-nenebin; nit nenunggul owag de mun wenggelduk on wereg fug mu, niren diroho suroho ulug ehe ha fug alereg.

²⁰At Allah en an nobam deg ale hweaho-nobahalug an nebe alemare-nobahauk no re; an den Allah Hat hinim ninim nele imin en ulug heng ihi ha fug alereg.

²¹Ketiare bohol ambogbag mun seleg deg ma re nil siag am ale duruk; hol de at ambilik ahe fam furoho eleho feseheik.

²²Ketiare o il utara fil en de seleg mun ambogbag on enam aha; ne At Allah ombagbag wereg ma re nit nenendama yande fouk duruk kam ale nenepuk.

²³Nit nenakni Allah aire demdoho omamne humon wereg ma re; niren At horogma aik lahe ha fug alereg. Aren de bekitdoho neg deheg, katukdoho neg deheg, duruk; Aren ap homi anggin-fanggin enobam feselug sebel-enusug lit wereg fug.

²⁴Ai fam de it ap homi enebe mundoho en At neg along bolug leho foruk kamuhup fano; Aren de it ap homi en an nenda wereg nahun ulug uruk on etma fahet fubi debeseruk fug.”