Read Ninia Yali AYUB 38 Bible Online

AYUB 38 - Ninia Yali bible

AYUB 38

¹Airoho uruk katfag ma re fobik en At Allah ebe ululu inim oweal nim fam etmano en ele Ayub hweag-utuk kwit de, diroho hweag-etfag:

²“Hat hebere san duruk kahen, An nenda wenggeleg on welahi ale anyo fahet hambong siseroho henda biren baren urukmu; hele hambilikmu en wilibik waharuk on ai ebe su fahet ulug mel wenggeleg eleg angge mun morueroho wereg lit uruk kahen ale aire?

³Ketiare hat hebe ap at deg lahenma re An nolohotma inaik watlug de, an den hein og-heamin on suma onggo ikma.

⁴Hat hunggul owagma holuk deg ale hum deg halug de, An hweag-nimin! An den kwenang su wal-duruk li em etare hat de hebe wereg kweleg wal-dirihik a?

⁵Kwenang su unggut mel ambiangma mel huli-huli wereg alere san anduli belabe[53] fesi? Ap sa en sabu ilit duruk angge fam ilit debesi? Ap di en disi ulug onggo uk ale hat holuk deg a?

⁶Ne, keroho anduli kwenang au hulugdoho lahabegma mun omamneroho mil-mil angge duruk kwit wereg? Sohwalanggen hubet enam atuk on omano en ambine suni eheg, ne it bohol fam etma enoluk wereg[54] lit Allah obahet duruk on etmano enahayeg en anggiluk deheg, duruk kweleg eta, Ap sa en helep oboule mun omamneroho kwenang au apma erahamu doale fesi?

⁸ Kwenang ahum apma erahamu en ik fulohomdoho lahabik waharukmu re, ik yenggeleg on au yenggeleg welamag ulug de san helahe waroho[55] fesi?

⁹We An den neg ik laut emberimmu anggulog sebele ferihikdeg de; mum en hwililipdoho ferihik.

¹⁰An den neg ik ahum yahamag deg on au yenggeleg laruhu mu ulug huli-huli ferihik; ne sok kelog waroho re lare ferihik mu wereg.

¹¹An den ik fam hweag-utuk kwit de, ‘Hat yenggeleg welaruhun on hulu-hulire su. Eke dahandoho lahauk fug! Ne, ik ahum funag-lenggag angge duruk on mun omamneroho watil bok aik waharuk karuhunmu re su huli,’ ulug hweag-itihik.

¹²Ayub ao, haren de we misik-misiham ulug oho eke, o hubet sekandilak amin ulug mingming dirihin ale wereg a?

¹³Ne, haren o hil yingguruk on anyo fam uruk kwit kwenang ai seneg nu; ne ap homi naleg-haleg neg duruk on etma re it enebe heraho lit wereg ma etman deloho hwik-esowag, ulug mingming dirihin a?

¹⁴kwenang dangge fam enenggik eneg angge cap foruk hag, ne sum bekit song on jubah fam ulunggun sireg ma deg hag, o nukoho seleg durukmu re dom-dom inim fanggong-fanggong inim mun enameg.

¹⁵It ap homi enakni apne wauk on elegma hesangge wereg on de nukoho etma re mun ambogbagdeg ma re; it siag on duk fug ale kwe bal-atuk.

¹⁶Hat de ik laut yenggeleg on ahum fam mun indipmu mik-mag erahamu wambirihin ale eke wereg a? Ik yahamagdoho yenggeleg on au indip kwe erahamu hat de lohon noruk katihin deg a?

¹⁷Ap homi waratuk on laukmu mun heik deg ma etma olohotma; sok dilong fololeg on aire hat lohon hweag-hutswa a?

¹⁸Kwenang au unggut wirilig ale fahet de di huli deg ulug henda meneni behen halereg a? Hat holuk deg halug de haren onggo in.

¹⁹O seleg aure ebe diman waharuk ulug de hat holuk deg a? ne o mum ai ebe indip demdoho re kema wereg?

²⁰Haren de mum inim seleg inim wereg ma huli-huli su wereg ulug eneg debehen halereg a? ite it enebe enam aik wahail lauk em henengge lakiek ulug monde fesehen halereg a?

²¹Hat de o kwenang su wal-duruk kweleg welatihin hahun deg ma, ne hebe oho mun sobal atihin hahun deg ma re dehen ha ale neg deg!

²²Dog yabeheg, bin huhul kweheg, duruk salim fahet ulug An den osit mel helep anggen hag on lumbiag mel, anggin atuk salim mel, fam enowatuk angge ulug

²³o wiroho kwelabeg lit foroho lahimu, etma hat de hil lohon ha lauihin a, eleg a?

²⁴Mo indipmu etma re hat de holuk a, hapeleg a? Ite hol mo lahaik waharuk fil en warik waharuk on ai wereg ma indip de keman?

²⁵Osit obahare humon fahet de ap san ikalog hwale foruk? ne ululu mel oweal mel lamisi kwe ulug de ap san kobokwe hwale foruk?

²⁶O leimu etma mel, ne kwenang ap homi mel di angge su angge mel wereg fug mu etma re, ap sa en osit belabik waharuk?

²⁷Kwenang mundoho iringgig lit kelog deg on au fam en, enggelangge abirangge wilibukwag ulug de ap sa en ik hilildil lauk?

²⁸Osit ai akni endetsi on de hun sa? Ne, lil dotorangge enakni re hun sa?

²⁹Ik lumbiag es on aire isinga re hwe sa? Lil wirik dulug helep hag olom duruk on aire san endetsi?

³⁰Ap sa en ik on ahamdoho helep deberuk? ne ik laut ahum emberim anyo ape eleg angge yahamag deg?

³¹ Haren de sohwalanggen unuk Kartika lohwaleg anyo misigmu wut waroho fehen halereg a? ite sohwalanggen unuk Belantik anyo haren fiselaroho fehen halereg a?

³²It sohwalanggen enebe li deg aleroho enam atuk on etmano haren melal-enebehen halereg a? ne sohwalanggen unuk Biduk lohon mel doron mel it lauk kwe haren hwale-fesehen halereg a?

³³Bohol fam koloma etma fahet wene melaleg wereg aire hat holuk deg a? ne haren wene ai oko kwenangma suma oho wene ai on welamag ulug hweag-esa wahen halereg a?

³⁴Haren anggulog fam hawene melaloho hele hwiroho lahabeheg, ne at mingming duruk kwit ketia osit liloho belabik ma ulug mingming deheg dehen halereg a?

³⁵Ne, haren uruk kwit oweal lepengdoho sebelik laheg, sebelik waheg diek ehen ha man de, it watlug de, “Yuo, Nenowe!” uk alereg a?

³⁶Sue walu hag on ibis [56] ai en Ik Nil wirig atuk on anyo deta li em yenggelmisi ulug de san hweag-utuk? Ne, suwe ayam yohombuk on fam osit waikohoreg ulug de san oluge foruk?

³⁷Ap sa enda mun enggat deg lit anggulog wenahauk alereg? ne anggulog ebe enden esama osit belabik wam alereg?

³⁸osit anyo wambik waharuk kwit ul ahe wereg on anyo kwenang anggen aheg, ne kwenang ebe wereg on anyo dig-dag aheg duk alereg?

³⁹Haren de no singa fahet ulug it nauk angge waroho og-esa wahen halereg a? ite at omalik enesiburu obokdoho,

⁴⁰helep owik elma oho, ne it ena wirigmu oho kulug herahoma it nauk on og-esa wahen halereg a?

⁴¹Sue homale hag on enesiburu obokdoho wereg lit, di kwe su kwe nunggwe naul ulug hera daukmu san let-enebuk alereg? Ne, at omalik en An nobam nauk angge fahet heng napukmu ap sa en let-enesa alereg?