Read Ninia Yali AYUB 39 Bible Online

AYUB 39 - Ninia Yali bible

AYUB 39

¹Kambing domma on etma re isinga en deta salim endetuk ulug de hat holuk deg a? No rusa il bolog on en omalik endetuk ale fahet haren lohon fubi deberihin a?

²It li detan enomalik enahamu wereg ulug de hat holuk deg a? ne it enomalik endag-enepuk li em de haren wenahaken halereg a?

³Nangginig li em it enomalik enderukoho enambol konurebelug endetuk ulug hat holuk deg?

⁴It enomalik endag-enepukmu o leimu etmano en enebe log aheg, enomamne aheg duruk; Airoho atlug it enesinga weregman wilibik lauk anyo sombandoho enesinga akit waharuk fug.

⁵Ap sa en keledai maro on enggelema fotog-esauk? ap sa en kumbi loloho dag kwe noruk kamag ulug embeserukmu lauk?

⁶O leimu etma re it enobam hagdoho welamag ulug An den og-esauihik; ne mayu ili angge lei etma re it enebe wereg ma ulug og-esauihik.

⁷At de o kota kwe mel ap homi anggilukdoho duruk kwe mel etmano ahayeroho embeselug lauk; ap en eke il ware folug yabuk duruk kamag ulug debeseruk eleg.

⁸Doma enggelangge wereg on aire at ebe nauk angge atuk; kwe etma re aren enggela hesilig on heradauk.

⁹Sapi maro on hat hobahet yabuk duk alereg a? ne hat hobam wam obam ulug wirigmu etma at nohouk alere endareg a?

¹⁰Haren hanye fam at ebe kumbi lili folug an nobahet yabuk wirin ulug hweag-erehen halereg a? ne hat heyabukmu etmano kwenang lilukwag ulug at mingming dehen halereg a?

¹¹At ebe omamne dehen ulug hat henda at fam hembisoho welahen halereg a? ne haren yabuk anggin on etmano at og-erehen halereg a?

¹²Ne, haren hangge anggen yihig baleg on etmano aren kabog-dukwag ulug obam fehen halereg? ne airoho kabog-debelug walug anggen loloho kabog-durukmu walug wamag ulug dehen halereg?

¹³Suwe huhubi hag unta en ahwerabul lambuk-buk hauk alere mun folo-foloroho neg duruk; Famen de suwe walu en darulug lauk ale nim de higirap duk fug ale atuk.

¹⁴Suwe unta ai en de anggen kwenangma ondoho folug de embeselug lauk; famen de anggen etmano iliangge en ahanhan duruk.

¹⁵Ne, at de ap en feiyaloho hwik-dulusa mel enda boruk fug; ne, wam, mene, hag angge maro on etmano en eneyog en sobit-esalusa boruk fug.

¹⁶At apema re omalik etma amu on en hagdoho debeseruk; aren de an den dirihik on ai alemat aruhu aire boruk eleg.

¹⁷We An den neg enda sohouroho morue deberuk kahi; enda wereg on mel wenggeleg on mel An den og-utuk kahi fug.

¹⁸Famen de at eyog fililogdoho lauk[57] li em de, ap kuda emberimmu lahalug lauk on oho re enalong elehap debeseruk.

¹⁹Ayub ao, kuda omamne wereg aire haren og-utuk kahen, ne ombanisong kuda elahandumu aire haren neg og-utuk kahen?

²⁰Bulue en solog duruk hagdoho lauk on aire haren neg airoho solog din ulug mingming duruk kahen, ne at ele kouwa durukmu ap enakol duruk on aire haren mingming duruk kahenma uruk?

²¹O donggoma etma at ahayegdoho kwenang lileheg, ne mun anggilukdoho weim yapukmu kwik laheg, duruk.

²²At de enakol deheg, enowag elek deheg, duruk ale aire apeleg deg; inggisim akol en at eke ik debesi ale wereg fug.

²³Ap anduhunmu lahalug lauk on anyo en sehen helemiroho lauk on anyo oho re, ombagbag en wat-haukmu re apumag helag-felag angge duruk.

²⁴Airoho durukmu re kuda anyo enda ahayeg fam lauk; ne bohweap trompet anyo ele fururukmu re at ebe mundoho hambuk ha fug ale duruk.

²⁵Bohweap trompet anyo ele fu hil lauk em etano re at ele kouwaruruk; ne ebe yatma wereg lit de weim apuk on anyo amben sang hauk. It ap sehen foroho on enowesi perwira en eneg ale duruk kwit, enele uruk on anyo re at esanggo holduk.

²⁶Sue findi ai darulug lauk ale re haren mamul-itihin a? ne ahwerabul langdoho ik ambut selatan fil lauk ale aire haren hweag-itihin a?

²⁷Sue ikwesahop ai en a dom yaron fam owan wuruk ele kweleg de, hat hawene melaleg hole folug duruk a?

²⁸Aren de dom mun leho on fene at obam wutuk, ne helep unggulmu ambiang wereleg on etmano re at ebe mapnu angge atuk.

²⁹At ebe etma wereg lit di kwe su kwe etmano kahaleg wereg; il en de nunggwangge on senggelmin ulug loureg lit wereg.

³⁰ Di kwe su kwe en bak hag, kisu hag angge senggelduk halug aire amu fug we aren neg; ne aren senggelduk angge anyo amep de at omaliki etmano en nauk.