Read Ninia Yali AYUB 4 Bible Online

AYUB 4 - Ninia Yali bible

AYUB 4

¹Airoho uruk katfag ma re, at Elifas en uruk kwit de diroho ebag: “An de anunuroho nele eleg angge welam fug ale napuk anggere, an nele imin halug de hat hendama herim napmihin ane?

³Ap homi humdoho re haren neg mamul-enepihin, it enemu en da fug alereg on omano haren neg let-enepihin.

⁴Hat hele uruk fam de ap homi enahayehap kwelabe feseheg, ap homi eneyog dungdoho ying-atuk on mel, enowag omamne eleg on mel, enebe enobabe eleg on mel, haren unduhuk feseruk katihin.

⁵Famen de ketiare hat honggwareg fam henda hesilduk on aik waha ma re: hat hebe youk lahen deg de nangginmin ulug duruk kahen au.

⁶Hun hat de Allah fam dipdeg lahen hahun no abi; Hat hebe fam mel de siag on eke wereg fug hahun no abi, Aireg lit atlug de hat hendama demdoho boruk kwit, henda hambukdoho welalen abi.

⁷Wenggel hakin, ap homi siag duruk fug kweleg eke enebe alemat amag ulug debeseheg, di anggin su anggin enobam amag ulug debeseheg, debag ale eke wereg a?

⁸An de nil hauk kahi ale fam en noluk deg alere yabuk wiri foruk anyo hagdoho siag on debelug, anggen a folduk anyo hagdoho enonggwareg en alema re fahat-dauk on anyo folduk, halug de, anggen yihig balduk hagdoho re anggin-fanggin mel, enebe alemar atuk on mel, balduk!

⁹Hol fi waharuk kwit duruk hagdoho, At Allah olok en it airoho elehap debeserukmu mun fun heheg lauk.

¹⁰It ap homi enolok on de wam singa en duruk hagdoho kouwa deheg, helak deheg, ngololog deheg, duruk. Famen de At Allah en it enaeg luluhun eseheg, enambilik dopno eseheg, duruk.

¹¹It de no singa en wat-dalug nauk on elegma waratuk mu omalik mun linggik-longgo uruk hagdoho it waratuk.

¹²An nesanggoma ling-long ale hweag-nutuk mu haldoho husumbi eke an nobam aik wahasimu re,

¹³ hup andundu ena mun siag ale og-hauk hagdoho, husumbi anyo en de nesangguli hagdoho neg duruk kwit de nohouk fug aleroho napuk katsi.

¹⁴Airoho napukmu re an nebe youk lauihikdeg de nakol en de nebe et mun elek duruk kwit de nebe abirangge mun hambuk ha fug ale napuk katsi.

¹⁵Airoho durukmu hol dorangge nolohotma leng-leng ik wahasimen de nameteruk mun lahasi.

¹⁶Airoho disimu weregman de ap hag angge eke nalukwema unduhuk latsi mu; an den fikfuroho kumu hauk men de, at ebe di ulug mel fubi debouk fug aleroho deg latsi. Airoho deg latsi mu duruk men de ele ngul-ngal isimu re di angge elehun su angge elehun deg latsi on anyo eleg atsi. Eleg atsi mu ele uruk kwit,

¹⁷‘Allah il hanim[7] ap homi siag duk eleg angge eke wereg a? At wal debag ahun il hanim[8] de at mun buhundoho siag eleg angge welam alereg a? Mun eleg.

¹⁸At Allah amingming angge bohol fam wereg on famen ohore Aren it fahet demdoho enombahauk fug alereg It Amingming angge Malaikat omano famen ohore siag deheg, kwasikdoho deheg, durukmu hweag-enepuk.

¹⁹Ap kwenang al on fam en waldoho fesesi on oma re kwenang ahe on deg ma re lobulong al berel esauk hagdoho hul mag esa alereg!

²⁰Ap aire we hubet neg oluk welatlug en de, o hupmu atuk kweleg etano hesama leiyaroho waratuk mu re ap homi li mundoho etma fam ebet ha fug alereg.

²¹Ai fam de angge di angge su angge fahat dalug on etmano mundoho eleg atuk mu; at ebe unggul owag enggatdoho wenggel-dauk on hwela fug angge waratuk’ ulug urukmu holdihik.