Read Ninia Yali AYUB 40 Bible Online

AYUB 40 - Ninia Yali bible

AYUB 40

¹Ayub ao, hat de An Allah Di ale su ale duk ale neg deg lahi on ninim wal-wal amul ulug uruk kahen halug de; hat halong eleg atuk en embesemihin henda a, ite nele sahale folug neg duruk katmihin henda a?” ulug hweag-etfag.

³Airoho ebag ma at Ayub en TUHAN fam onggo hweag-utuk kwit de, “Nakni TUHAN, an de ap morue on en uruk hagdoho uruk kahimu re, an den nele onggo nangginoho hweag-hirihi halereg? An den uk on de eke wereg fug.

⁵An den de nele mun hum hamdoho ihimu re,” ulug hweag-etfag.

⁶Airoho ebag ma, hena fam en ululu sipukdoho At TUHAN en Ayub fam eke nim hweag-etfag.

⁷Ai en At TUHAN en Ayub fam uruk kwit, “Hat oho hebe ap deg lahenma re An nolohotma inaik watlug de An den hein og-heamin on ai onggo ik watmihin.

⁸Haren de An den katukdoho neg duruk kahi on anyo maben hag boruk kwit de, An siaho nobahalug hat honggwareg fanoap dobahat-dauk kwit uruk kahen a?

⁹An nomamnereg lahi hag de haroho homamne deg lahen a? hat hele re An nele ululu sipuk duruk ai hagdoho ehen halereg a?

¹⁰Haren hebene halili angge mun hanggilukdoho lahabe feheg, halong balongdoho debeheg, hebe mun lik-loukdoho, ilmu buhundoho lahabe feheg, din

¹¹Airoho debelug de it ap homi enendama winik-wonog uruk on etma hil fu esalug de, holok hasim atlug de it aireg on ai sebeloho fesein.

¹²It ap leho fahat-dauk on etma kumu esalug de at al bereloho fein! ap homi kwasikdoho neg duruk on etma re wendaloho neg fesein.

¹³It enebe aire ul ahe sahalimu etma sale feseiyug; ne it ap homi waratlug laukmu etma kwelaboho feseiyug.

¹⁴Airoho dimihin halug de, hat homamne wereg on fam dehenma ulug, An den hat mot-hapmin.

¹⁵No Behemot [58] owag hweise aireg angge ai hil fubi debeiyug; hat hebe higitdoho re at ohore An den neg wal-dirihik angge. Wam lembu mel sapi mel hesangge on en duruk hagdoho, it oho airoho enggelangge nauk

¹⁶Famen de at ebe fam omamne wereg ale nim, ne omanggen fam mun ning deg ale nim ai fubi debeiyug!

¹⁷At ahaeto re e lak wilibig hagdoho unduhuk; ne enggik eyog mel fam omanggen wereg de mun ning-nangdoho deg.

¹⁸Owag wirik deg ale re bosie tembaga wirik deg hagdoho deg; ne eyog omamne re bosie baja omamne deg hagdoho deg.

¹⁹Di on su on An den waldoho ferihik on etma enesahalimu en de at neg de mun fulu laleg on wereg, we at wal-disi ahun neg de no ai ebe sebeloho fouk alereg.

²⁰O duk-duk di on su on inil bolog on etmano enahayeg hauk kwit yungguldil ying apil noruk kwe etma re, at ebe nauk angge enggelangge wilipuk.

²¹At ebere alog ahan wilibigmu etma sahaun deg, ne ik obale siareg kwe wabime sahalimu etma heraho wereg.

²²E alog ahan en kun apma wereg; E wilo ik aegma wilibig on ahohe en kunap deg ma wereg.

²³Ik Yordan il omamneroho wirig atuk famen oho re aren lohon akol duruk fug; ik en at orohole salik waharuk kweleg famen de bik-bok atlug wereg.

²⁴Ap sa en ambong seroho at il dokuk debelug, ambiangma yepdoho seneruk alereg?