Read Ninia Yali AYUB 41 Bible Online

AYUB 41 - Ninia Yali bible

AYUB 41

¹ Haren de ikan aeg ikan wauk angge fam neg, at buaya Lewiatan [59] anyo senerehen halereg? Ne, at ambilik anggen de haren sabu het duruk angge fam het dehen halereg?

²At ambiang fam haren kumbi ililehen halereg ite bosiemanggen on en kwandi fam elahandumu lilehen halereg?

³At ebe loloho wilip aik ulug hat hobam heng-uk alereg? ite haren enda neowag ulug hinim henele misig seberoho marehep halereg?

⁴Aren hat hobahet duruk karuhuk ulug, hat hinim henele misig seberoho mareheg, hinim sali wat-wat aheg, dehep halereg?

⁵Hat hamingming angge hwelani on enaheyegdoho ulug, suwe kulduk on senetuk hagdoho haren at senerehen halereg?

⁶It ap ikan wauk enap en onggo balik lama, it ap di angge su angge onggo baloho hundutuk on wereg kwe etmano neg yohwan-yohwan am alereg a?

⁷At ahap de haren aeg soap fam at ahap folog debehen halereg? ite haren fit fam hwikdoho warehen hama unggul owagma fologdoho kwik la alereg?

⁸Haren we misig am neg at ebe bal halug, eke nim bal ha fug angge embeseiyug, hinim airoho lang-lang amuhup on aire mundoho-mundoho hapeleg aruhu fug on anyoreg.

⁹Ap homi en no Lewiatan ai inil hahup on en de enebe mundoho hororong il lauk kwit de enape moroho huram alereg.

¹⁰At ebe nohoruk men olukap deberuk halug de mun olok hum deg; at olohotma ap misig eke ambong seroho unduhuk lam fug alereg.

¹¹ Aren senggeleg eleg anggere ap san warik kuk alereg ma? O kwenangma suman de ap eke en ulug oho airoho duk fug alereg.

¹²Ahwi, no Lewiatan ai ebe obahare deg ale mel, at omamne wereg ale mel, obahare mun bigin-buhundeg ale mel, an den dindil hirik kohon.

¹³Asum dag fil wan-dalug on anyo re ap misig en eke nonggoluk fug alereg; ite asing hagdoho[60] dog yapuk kwit fahet ulug wan-dalug on ai foroho kuk fug alereg.

¹⁴At ambiang mun omamne on aire ap san ele arebouk alereg? Aeg et mun anggolo on sibing sobang uruk angge aire?

¹⁵Dog beiyalni hagdoho re at ambol owag[61] fil ai erareg; ne mun aldap heheg erareg ma re wirik kelog deg.

¹⁶Saplanggum heheg hetdeg ma re, hol ulug oho foroho kuk fug alereg.

¹⁷Dog beiyangge aire mundoho hunduhukmu re, amu-amu oko fouk fug alereg.

¹⁸At Lewiatan ai en hasig durukmu re ambogbag baloho wilipuk; Il anggen de mun hena bureg ma re mo lahabik waharuk on hag deg.

¹⁹Ambilik anggenman indok ambulbul hagdoho melelang duruk; indok asisingag waroho re di kwe su kwe wealik lauk.

²⁰Belanga indokma hwerie forukmu apmane en hobu wilipuk anyo hag, at ambiang elman de hobu mik-mik angge dil wilipuk.

²¹At ele ahe en de indok fisatuk; ne indok ambulbul de ambilik men wilibik waharuk.

²²At anduhun de mun omamne deg ma re; ap homi mundoho en at olohotma enakol duruk.

²³At ahap fam kuk deg ma eke wereg fug; Bosie hagdoho deg ma re erap duk fug alereg.

²⁴Enda re helep elek duk fug on hagdoho wereg lit biren baren uk fug angge wereg; Louk helep hagdoho omamnereg lit hambuk lele wareg.

²⁵At feiyalug inatuk mu re ap mun enomamne on[62] famen oho re enakol neg atuk; it mundoho enakol en de enamelmel atuk mu wereg.

²⁶Karog en ulug oho at ware fouk fug alereg; inggisim mel, dog en mel, firen mel, at ahap fam oukap kwelabe fouk fug alereg.

²⁷Bosiemanggen on etma re walengge suluk hagdoho atuk; ne tembaga on fam hilinggig on etma re e fubut on hag atuk.

²⁸Dog en at ebe siloho fouk fug alereg; Ne, helep at obam hwik dik lauk on de enggelangge hagdoho heruruk.

²⁹E bayuk de enggelangge iringgig on dem misig hagdoho atuk; ap en fit delik laukmu re aren unda yag-enepuk.

³⁰Ahum apma amurul wilibig on de woliom ambiangma enggatkat on hag; bosimanggen aeg sibing-sobang[63] uruk hagdoho deg ma re sabelep kwe hohot dil lauk kwit de karele feil lauk.

³¹Ik laut ahum anyo ape eleg feleg esaukmu re ik hulug duruk on hag atuk; Panci ik ahalue esetuk on fam atuk hagdoho atuk.

³²At eyog sobi folug laukmu obale re ombagbag duruk; ne ik laut ahum anyo re wasulahap neg langgi-langgi duruk.

³³Kwenang emberim fam etma re at nim ilit duk alereg on de eke wereg fug; no aire di angge su angge fam akol eleg angge wereg on de we misig ai neg.

³⁴Di on su on kwenang kwe loboruruk angge etmano along balongdoho wereg boruk on famen oho re aren de sebeleg hag boruk; Di on su on maro wereg angge etmano en enowe unuk bogdeg hag de we at neg wereg,” ulug hweag-etfag.