Read Ninia Yali AYUB 42 Bible Online

AYUB 42 - Ninia Yali bible

AYUB 42

¹Airoho hweag-etfag ma at Ayub en TUHAN fam onggo hweag-utuk kwit de, “TUHAN, nakni, Hat Homamne humon welahenma, Nangginig ale halug famen oho re Haren de mundoho dehen hale neg deg ai an noluk.

³ Haren an hein og-neauk kwit, ‘An nenda wereg ale fahet hat henda biren deg lahen,’ ulug hein og-neehen; famen an den diroho suroho ulug mel mun napeleg deg kweleg hein og-neehen. An den uruk kahi on etma re, su keroho ulug mel wenggel-atuk fug on etma fahet mel, an den hauk kahimu mun nik-nak ale along on deg ale etma fahet mel uruk kahi.

⁴ Haren an nobam mingming napuk kwit, ‘An nele urukmu hesanggo holeg lamin eheg,’ ne An den hein og-heaukmu onggo hweag-nimin eheg, duruk kahen.

⁵Hat deg lahen ale fahet aire endam de ap en neg hweag-nutuk mu nesanggo holdihik; famen de ketia neg de Hat holohotma ninim ambi atlug demdoho fubi hobahaki.

⁶Ai fam de an den nele mundoho irihik ale etmano fahet mun nenggali atuk en duruk kahi; ne nenda mundoho wat-dauk kwit de ul ahe fam suma hwerieg welahi” ulug ebag.

⁷TUHAN en Ayub fam wene mundoho hweag-etfagdeg de, Aren Elifas fam uruk kwit, “An nobahet hiren demdoho uruk kahep fug mu re ai fam hat inim it hori biren eta nim fam nolok henobam fehi. Famen de An namingming angge Ayub ai neg de airoho deg fug.

⁸Anggere ketia hiren wam sapi yohombuk on sabiren inim, domba yohombuk on sabiren inim, walug de Ayub akit lakiek. Lalug de mundoho etma waroho re hit henonggwareg fahet ulug wam waroho yal angge yaliyug. Ne, at Ayub en de An nobam somban imisimu re aren somban imisi on ai An nesanggo holikoho lahi. At Ayub en de An nobahet demdoho uruk kweleg hiren oho airoho ehep fug mu, ebe demdoho re hit unggum hwela alereg kweleg famen de hit henenggaliap henobahamin fug,” ulug hweag-etfag.

⁹Airoho hweag-esebag ma re it Elifas mel, Bildad, Zofar mel, etano en de TUHAN en hweag-esebag ale anyo higitdoho debag deg At TUHAN en Ayub somban ebag on anyo webag.

¹⁰ Airoho debelug de at Ayub en ori henahan etano enobahet somban yihig fesebag ma re, At TUHAN en de Ayub angge di on su on mundoho dungap debebag on aire angge atam eleg atfag on etmano horog maben hag deg kweleg eke nim enggik birenam hagdoho dopnoroho og-etfag.

¹¹At Ayub owesi mel, erekwi mel, at ombali wat-enusug latfag on etmano mel, at hakoho lit watfag ma re inim seberoho at obam etmano soni pesta esetfag. Iren at Ayub fam uruk kwit de, TUHAN anggin-fanggin hobam fesimu hauk katihin on ai fahet de nit oho nenenda wat-dauhuk deg fong watuk katuhuk. Ulug de endama aho warik watfag. Airoho debagdeg de it watfag on anyo enemu hundomog en de uang kabogdoho og-ereheg, enenggik sehelet fahet helep sehene emas on misig heg og-ereheg, debag.

¹²At Ayub ebe fam anggin fanggin ha fug lire horog maben hag famen de, at ebe oluk we horog ambiangma aik li welatfag on etano fam de At TUHAN en di angge su angge mun bulularoho fanoap debebag ma, Ayub owam kambing, domba nim de 14.000 en welatfag, unta re 6.000 en welatfag, sapi re 2.000 en welatfag, wam keledai re 1.000 en welatfag.

¹³Ne, aren de omaliki ap enebe sabiren ne hwelani angge henahan inim endag-enepfag.

¹⁴Ahaloho wandeba on anyo re unuk Yemima, bireneg on de Kezia, ombolim de Kerenhapukh[64] soal-enepfag.

¹⁵O sili etma fam de hwelani hun Ayub ahwelani eta neg de enorohole mun buhundoho inil aluli mun fanoreg latfag, ne it inim higit on eke welatfag fug. It enebe re it enerekwi ap omalik etmano hagdoho re enakni en abinggi angge it dohon og-isil lebag.

¹⁶Airoho debelug de at Ayub ebe umur 140 tahun huli wereg lit de at ombasi mel, ne it ombasi en endag-enepfag on mel, il esebag.

¹⁷Ai en de at Ayub ebe umur mun sobaldoho kungguk ebagdeg waratfag.