Read Ninia Yali AYUB 5 Bible Online

AYUB 5 - Ninia Yali bible

AYUB 5

¹Anggere Ayub ao, haren onggo uk ale eke wereg halug de hele in abi? Hat let habukwag ulug, malaikat de keno fam ayonggo fehen ha alereg?

²We ap mun morue on neg de enda ouk en waratuk.

³An de ap morue on eke hauihik; At ebere mun omamneroho unduhuk ahun hag welatsi Famen de fetagdoho etano at an den at ebe wereg ma etmano hururung deberihik mu re,

⁴at omaliki omano re it eke hwal-enebuk fug alereg latswa. Ap en it enawene bilinggoho kong-duruk men ohore ap eke inibil atuk on welatsi fug.

⁵It eneyabuk men anggen baloho fousa angge etmano re, it ap enasiburu obok on en nauk katswa. Gandum alog angge sahali[9] kwe wilibig on ohore, it ap nauk angge obok on en munmiroho nausa. It enangge on mel, enenggik dungapdoho wereg on mel, de it ap homi di angge su angge hwelela neg boruk on en inil mumiroho kwelaboho lit wereg.

⁶Ap homi enolok wereg on aire o kwenangma suman enam atuk fug enolok on aire kwenang famen wereg atuk fug.

⁷Mun eleg! indok ebe famen indok asisingag[10] baloho wilip atuk anyo hagdoho re it ap homi enonggwareg en at enebe fam alema re fahat-dauk.

⁸Famen de an neg de, At Allah fam neg hweag-etle an nawene deg ale fahet de walug At akit lelereg de elehap nimin ulug obam ik lele.

⁹At Allah en di angge su angge mundoho wal debag angge aire mun nik aleroho deg ma re; niren ebe mundoho fubi debelug wenahake fug halereg. Aren along wereg on duruk katsi on etma re mun hum-ham alereg ma re mun eleg-am fug alereg.

¹⁰Aren neg osit kwenang emberimmu belabik waharukmu, yabuk wirigmu inim, leimu inim enobam hililoho owe atuk.

¹¹At Allah ai en neg ap homi sebeleg on leho feseheg, ap homi enenda sebeleg wereg on enaheyehap debeseheg, neg duruk.

¹² Aren de ap homi enamenggel siag on en dul ulug boruk ale omano suhwi debeheg, it ap enawenggeleg on omano en dul boruk ale omano fugwirebeselug sen-enepukmu, iren dul ale ulug wenggelug duruk on etmano eleg aheg, duruk kwit it enonggwareg en wenggelduk ale fam en laloho fahat-dauk.

¹⁴O nukoho anggo famen de it enobam mum aik waharukmu, iren o hup anggo hagdoho fag-fag angge duruk.

¹⁵Famen de it ap homi enenggik eleg on[11] halug de waratuk on fam en del-enebeheg, ap homi sebeleg on halug de, ap homi en enapma sebeloho fahat enusug lit anggin-fanggin enobam foruk men enahap wendat-enebeheg, duruk.

¹⁶Ap homi enangge mun eleg on famen oho re enenda ebereg wereg ne At Allah en de it ap homi kwasikdoho duruk on enambilik mun lare forukmu re enele mun dit-dotdeg angge eke uk eleg angge wereg.

¹⁷ At Allah en komo hapuk halug de eiyale beiyug! Ne, Aren hat deg lahen ale fahet hweag-hutuk halug de, henda hesiluk fug.

¹⁸ At Allah ai en neg enenda oukgwe feselug en de Aren neg hilinggi feseruk anggere. At enggik famen ap yeik ware-feselug en de Aren neg obalma fanoap debeseruk anggere.

¹⁹Ne, hat mun hamelmel on hobam aik waharuk halug de hindik-hundig hat hili og-hapuk karuhu.

²⁰It ap yabuk wutuk enap en anggen yihig baleg omano mun maben atuk mu onggo lahabe forukmu henda firaik waruhu famen ohore siburu obok en ulug hat wararuhun fug lit deg. Weim yapuk en mun hamelmel neg aik waruhu famen ohore waratuk on fam en de hat de hili oho welaruhun lit deg.

²¹Ap en hunuk siahap-biahapdoho hobahakeg, it ap enolok atlug sen hapul ulug deheg, duruk on fam en ohore, hat de kahal husug laruhu mu re anggin on hobam aik waharuk on etma re hakol eleg angge hambong seroho wauk karuhun.

²²Ap enelok neg aheg, siburu obok lahakeg atuk kweleg famen de, hat de henda hambukdoho wereg lit unda yag-enepuk karuhun lit deg. Wam maro olok on olohotma atlug ohore hendama yehelik mel, hakol mel, eleg angge welaruhun.

²³Haren yabuk wutuk karuhunmu etma re helep eke welaruhu fug; maro olok on en de hat senggel hapmin ulug duhu fug.

²⁴Hat de hakol eleg angge mun fini-fanoroho hobam sabo wirigmu etmano welaruhun; ne haren howam domba etmano keroho deg ulug kumu esaukmu re, enebe abirangge enahap wendaroho neg wereg ma esauk karuhun.

²⁵Hat homaliki hombasi mel, de mun hum-hamdoho wenahauk fug aleroho enggelangge o leimu wilibig etma hagdoho deg laruhu.

²⁶Gandum anggen mundoho wirik atuk mu, li higitdoho anggen balduk anyo hag, haroho re hebe mun fanoroho neg welatlug sobal aik lahun.

²⁷Ayub ahwi, niren de mundoho etma kumu hehereg, nenele uruk kahe on etare demdoho on neg anggere wakiyug,” ulug ebag.