Read Ninia Yali AYUB 6 Bible Online

AYUB 6 - Ninia Yali bible

AYUB 6

¹Airoho ebag ma at Ayub en onggo uruk kwit, “An nendama anggin hauk kwit ouk hauk kahi on au anggin wal ha man de

³anggin de ik laut inggi yahamag deg etma hagdoho deg lam alereg. Ai halug de an den nele uruk kwit nenda wenggel-ha fug angge fetag-fetag deg ale neg uruk kahi on ai fahet hiren nangginoho bouk fug.

⁴At Mundoho Omamne Humon anyo en andog nowareheikma deg lahi. At aweik en de mundoho nebe fene etmano et hesilik laha. At Allah en duruk ale etma re mun namelmel ale neg duruk kwit de, Aren de ap selei on lohwalegma enowatuk hag nowarikoho neg duruk.

⁵No keledai ai ohore enggelangge ket laharuk og-oman neg de obam hambuk uk alereg hag de, no lembu ai ohore nauk on og oman neg de obam hambuk uk alereg.

⁶Famen de nauk angge eke mayu foleg eleg on hag aire ap san eke endareg behep? Sue anggen ilonggoma kuron ai naukmu unduk duruk a? Mun eleg.

⁷Mundoho etma re an nahum aldo angge[12] neg deg ma re, an de sen hauk ale oho re nerim deg lahi.

⁸An somban uruk kahi on etma At Allah en nunggwelug esanggo holduk fug aho? An nele hwiruruk kahi on etma nunggwelug fubi nobaharuk fug ahi?

⁹We At Allah en neg an siahap-biahapdoho nobahaukwag We Aren neg wenggel-halug an nebe binggi waroho nobahaukwag.

¹⁰Airoho nobahaku halug de an den de ai nendama onggone nobaharuk higitdeg bohuk; airoho bolug ouk-bouk hauk kwit en de nahayeg en holog duruk karuhuk. Allah mun amu eneg wereg on anyo en awene melaleg de an den mundoho fubi deberihikdeg holoho neg duruk kahi.

¹¹Famen de an nomamne aire nunggwangge hag deg lit wereg neg lahi aho? Mun anunuroho noluk welaruhuk ulug ebet-ebet welaruhuk ale eke deg a?

¹²An nebe aure helep wirik deg etma hag wirik deg lahi a? no tembaga wirik deg on hagdoho welahi a?

¹³Let naplep aho ulug duruk men de nomamne mundoho eleg aha an let neale eke wereg fug.

¹⁴At Allah di ale su ale duk ale neg deg on anyo fam de an den ele dahan debelug eke dirihik ane obam dipdoho neg duruk kwit welahi men ane? Ouk-bouk[13] diroho hauk kwit aire an nare mun fano on eke welalep ulug nendaman ebet hauk kahi.

¹⁵Famen de, yaho nori osit wam eleg angge hobi neg wereg ma ik wirig atuk on mundoho firitog atuk on hag deg lahepma re hit henobam demdoho bolug it wereg en bouk fug alereg.

¹⁶Hit de ik wirig atuk on lumbiag en salug ik ebe olom durukmu, ik anyo bok ape eleg angge wereg. O hobi laharukmu lumbiag anyo yenggelegma mel obale enameg eleg angge mun firitog-firitog eleg atuk. Ik apma erahamuno inim mundoho firitog atuk mu obale neg sia uruk anyo hagdoho hit airoho welahep.

¹⁸It ap o yatma en enangge wam unta emberimmu lahaplug lauk on ohore iren ik elegma herarebelug de, iren lahaik wambuk dil lauk kwit de o iliangge leiyareg ma etma waratuk.

¹⁹It ap enangge hwelalug o Syeba en mel Tema en mel, ik anyo enenda ebet-ebet wereg lamag beil waharuk.

²⁰Famen de iren wenggelduk ale anyo ik aegma ik ebe wereg fug mu etma mun suhwi aik waharuk.

²¹Nare hat de ik wirig atuk on[14] hag deg lahen; An naouk hauk kahi on au hil neauk ale hakol en de hebe hesingno uruk kahen.

²²Nunggwelug airoho duruk kahen? An den hat hobam heng hapihik angge eke wereg a? Ite an nobahet ap fam beik angge og-esalug diyug ulug heng hapihik a?

²³An den de it ap enenda esa fug angge duruk on etma fam en nonggo baloho nahap wendat nabukwag ulug heng irihik a?

²⁴Yoho, hiren ‘Hat hasiag ebe su,’ ulug henenggik dum waroho hweag-nemek! Hit henele ai nebe bik-bok atmin deg holmin anggere.

²⁵Ap homi en enele enameg bekitdoho uruk halug aire enendama et sakorik lauk, famen de hiren henele uruk kahep on etma re, ebe di fahet uruk kahe ulug mel fubireg eleg angge, we hesangge neg uruk kahep!

²⁶An nele uruk kahi on oma re hiren de hol ele hag boruk kahep; An mundoho nenda firaha ma wereg kweleg hiren onggo hweag-nutuk kahep on etma re we alemaroho hagdoho uruk kahep.

²⁷Hiren de it omalik wetien on anyo nim helep anggen wal halug de it enelaheg bouk fug angge duruk kahep, hit henere hininim sebereg on anyo fam en oho hit henenggik wereg on amul ulug de hwenaroho duruk kahep.

²⁸Hiren an fubi nobahayek; an den etma nunggwelug hit henobam lal-henepuk katmin?

²⁹Henenda wenggel amek! Hiren wene katukdoho duk eleg angge neg duruk eleg. Ne, ande dik-demdoho siag dirihik fug angge re, hiren an siahapdoho nobahauk fug.

³⁰Hiren boruk kwit de ‘At ele seiale uruk’ ulug boruk kwit duruk kahep. Ite aren siag on nim fano on nim eneko duruk eleg ulug uruk kahep.