Read Ninia Yali AYUB 7 Bible Online

AYUB 7 - Ninia Yali bible

AYUB 7

¹Nit ap homi aire ap enomamne fam diek ulug hweag-esaukmu duruk hagdoho anggolo-fanggoloroho wereg lahe; Nit nenoluk welahe ale aire ap eke onggo hwelamin ulug yabuk neg duruk kwit wereg hagdoho welahe.

²It ap homi enamingming angge wereg on en nalong bal-nusug lalep boruk kwit wereg hag, ne it ap ap yabuk wutuk on en onggo og nomag ulug nangno hauk kwit wereg hag,

³Di bigalem su bigalem aire ebe diroho fahet noluk welahi bouk eleg angge neg welahi. Di hup su hup etano nendama mun hesilduk kwit neg wereg ma welahi.

⁴Nohomin ulug nohorukmu nohweik lauk kahimen ohore, hup mundoho anunureg lit wereg, Folfolo o seleg dukwag ulug nangno hauk kwit neg weregman de nebe furoho nohoruk kahi fug.

⁵Nebe fam de sobon anggen humdoho ondoho lit mun alimbo deg, Nahap fam de yebil humdoho deg lit muluna baloho wilipuk.

⁶An nebe noluk welahi on su diroho aruhuk en ulug mel ebereg eleg angge wereg latlug folo-foloroho neg ambiangma aik lauk; It ap homi en sum seleben duruk kwit, sum seleben duruk angge kwanirurukmu lauk on aire andomog deg kweleg, we folo-foloroho neg lauk.

⁷Nakni Allah o, an noluk welahi on sure Haren hele ahe furoho kwelabeg on welahi anyo wenggel-neakin; An nahayeg wereg on anyo re mundoho obale lohon welam fug angge longgo ebag.

⁸Ketia Haren an hil neauk kahen famen de aire anunuroho fahet fug we elamna neg. Fobik en Haren an hera-neahunmen de eleg ma neahun lit deg.

⁹Hena en o orohole mum-mam debelug baloho eleg atuk anyo hag, ap homi ai ohore mundoho waratil lauk em de nikangge sombandoho obam wam fug alereg. It ap homi at enombaliroho deg latswa on mundoho en ohore, at mundoho enapeleg amuhup deg obahet eberuhup fug.

¹¹Ai fam de an nele eleg angge bok welam fug ale napuk! nenda hesilduk ale nim asig anggoloroho hauk kahi ale eiya fahet nim de nendama mun sebel ha fug ale napukmu re, an nele wiliboho nahummu boruk kahi ale eta wilibi feik waharuk kahi ai.

¹²An de kisu menawe naga mun olok on ik laut [15] fam etman wilibik waharuk on anyo hag deg en a? Haren hindik-hundig hil wereg lit kahal-nusug lit neg welahen oma hwi?

¹³An den nebe ying-atlug nobam anggin-fanggin wereg on ai lohon oko lowag ulug wal-hauk kahi nenda mun fililing ebag on au fahet keroho se alep ulug heraruruk kahi.

¹⁴Famen de Haren de na fam an nakolap kwelap-napuk kahen. Haren de na siag on mel, meneni saig on mel, nobam feik waharuk kahen.

¹⁵Ai fam de an nahap fam ouk-bouk hauk kwit neg wereg ale ai embeselug de, nanggolobag kongdoho warale ulug nenda boruk kahi.

¹⁶An de anggin-fanggin hauk kwit noluk wereg ale etma re mun ko napuk en de, mun warale ulug nenda boruk kahimu re, nebe noluk welahi ale aure we elalin hagdeg ma re, an fotog neakin.

¹⁷ Haren de ap homi ai nunggwelug mun along deg boruk kahen? Ne, iren duruk ale etma nunggwelug Haren fubi debeseruk kwit neg welahen?

¹⁸O sekandoho hubet neg hindik-hundig haren it ap homi omano hil en hwal-enepuk kahen. Ne, nukoho hundig-hundig de it wereg ma enesa waharuk kwit neg welahen.

¹⁹Nangginig li em an nibil en Hat halukwe enden atmihin mu, an nelemag lohon bilha ale napmisi abi?

²⁰Ap foroho ao, an den Hat hobam nasiag de kereg on dirihik? An den de hat hobam anggin humon hobaharihik a? Nunggwelug Hat handog anyo an neg nowarik lowag ulug nibil hwale foruk kahen?

²¹An nasiag de Haren hapelehapdoho fouk fug alereg en a? an kwasikdoho dirihik on de Haren elehapdoho fouk fug alereg en a? We il misig welatlug ap waratuk on sale feserukmu etmano yinggig laikoho lahimu re, Haren an hera napmihin famen de, an hweag-napmihin fug lit deg,” ulug ebag.