Read Ninia Yali AYUB 8 Bible Online

AYUB 8 - Ninia Yali bible

AYUB 8

¹Airoho ebag ma at Bildad en uruk kwit, “Hat hele airoho neg uruk men de li nunggwenam welatmihin? Hat hele uruk kahen on etma re hol aplohok fi-fi uruk hag uruk kahen oma.

³At Allah en de wene katukdoho uruk on aire kwaniroho amu fil debeik lauk fug. Ne, Aren de demdoho wene ai omamneroho debouk fug angge debag ale eke wereg fug.

⁴Hat homaliki en At il hanim siag dusama lit deg, Ai fam de At Allah en aire unggum enobam fesouk aleroho debesesi.

⁵Famen de hat hebe At apma wereg lit, Henda hundig nabin ulug heng eheg, nasiag hapelehapdoho nobahain ulug hweag-ereheg,

⁶haren siag on eke duk eleg angge, hendama mun bekitdoho neg deheg, duruk kwit wereg lahen halug neg de, At Allah en folo-folo let habuk alereg. Ne, airoho duruk kahen on ai onggore hat hahain elekwe nikangge fanoapdoho fouk alereg.

⁷Hat hangge di angge su angge mundoho eleg atsi angge etare, fobik hwelahun on fam en de inim higitdeg fug we maben hag deg.

⁸It ap enggat enap o endam etma welatfag enap etmano fubi debeseiyug. Ne it nenambu-nenombasi en duruk katfag ale mel, hauk katfag ale mel, omano ebet hauk kamuk.

⁹Nit nenoluk welahe on eiyare mun horog deg ma re, diroho suroho ulug mel mun nenapeleg. Nit nenoluk welahe on aire apumag baloho lauk anyo hagdoho welahe.

¹⁰It ap enggat enap o endam etma welatfag enap en, enele uruk kwit hweag-hutuk on su hesanggo holin,

¹¹‘No kem aire ik lup-lup kwe neg wilipuk, kilime de kwenang ik owereg kwe neg wilipuk.

¹²Ik anyo firitog atuk halug de bare anyo halo uruk, di angge su angge amu on wilibig on de il eke welatlug halo uruk famen de no kem ai neg de folo-folo airoho duruk. No ebe baloho walug ai fam en duruk ale owan duk elegman de ebe owan ahanuk ket laharuk kweleg airoho duruk.

¹³It ap homi TUHAN enapeleg angge wereg on aire airoho at wereg. Aren Allah fam enda ebereg eleg angge duruk halug de, aren duhuk ale ulug endama wenggeloho duruk on anyo oho suhwi aik lauk.

¹⁴Hekel amumla elegdoho il sako on fam enda dip deberuk, kimaling ahalesa fam enda demdoho bolug duruk.

¹⁵Ahalesangge ai fam dip-debelug duruk halug de omamne wereg a? Ne, hekel ai fam enenggik sen angge ulug seneko welaman de omamneroho welam alereg a?’ eleg.

¹⁶Osuk angge mun hesilig wereg ai hag, it ap homi Tuhan enapeleg on oho enebe mun finik-fanoroho neg wereg, Mo hundig obam yatuk mu re ebe hesiloho wilipuk kwit de yabuk wirigmu etmano saharoho wilipuk.

¹⁷Omanggen de kwenangma helep wereg on etmano fene walabit[16] watuk; mun omamneroho belabik laukmu re dukom duk fug alereg.

¹⁸Famen de osuk angge ai ketia waldoho sanog hakiyug, sanog hauk men de at ebe eta wilibig latsi fug on hagdoho deg ma hahup.

¹⁹It ap siag neg duruk on en enaheyeg hauk ale re we eta aleroho neg duruk, ap amu on watlug de at anyo obalma aik waharuk.

²⁰Famen At Allah en de it ap homi At obam dipdoho deg lit duruk on de fotog-esauk fug, ne ap homi kwasikdoho neg duruk on de Aren eke let-enepsi ale wereg fug.

²¹Aren de hat hambilik men unda yarukwag ulug hobahakeg, hahayeg en dukwag ulug hobahakeg duhu.

²²It ap homi hat enerim hapuk on de enenggali atlug nit sebeleg on hag bohup, ne it ap homi siag duruk on enobam etma re mun moluluk esahupmu eleg aruhu,” ulug ebag.