Read Ninia Yali AYUB 9 Bible Online

AYUB 9 - Ninia Yali bible

AYUB 9

¹ Airoho ebag ma re, at Ayub en onggo uruk kwit de, “Demdoho, haren hele uruk kahen on aire seiale uruk kahen fug aire an noluk deg. Famen de ap homi en eke Allah inim wene matlug bilingguruk kwit At along elehapdoho fouk alereg a? Mun eleg.

³At Allah en ele 1.000 en am hagdoho ap homi fam hein og-esaman de, ap homi[17] wene indip 1.000 en etan de misig ulug oho eke onggo uk fug alereg.

⁴At Allah aire mun enggat deg lit along wereg on deg ma re, ap sa hag angge en At ele sahale folug en oluk neg welam alereg? mun eleg.

⁵Ap homi enapeleg kweleg At Allah en neg dom-dom hamboko amumu feik lalug, mun olok hasimeg enden-fenden esauk.

⁶At Allah en neg o meik deberukmu kwenang mundoho elek duruk, kwenang au apma anduli hagdoho lahabeg lit leho wereg on anyo mun elek-felek duruk.

⁷At Allah en neg hubet mo lahabik watmihin fug ulug ili uk alereg, ne sohwalanggen o hup angge ombagbag duluhup fug ulug kwe bale fesouk alereg.

⁸At amu en neg bohol koloma etlendi diahan debesireg, kisu menawe naga ik laut [18] ahummu en lahaik waharuk on anyo ahabi sobit-sabat esasi.

⁹ Aren neg sohwalanggen lohwaloho huk hwiliroho Selatan fil wereg on etma feseheg, sohwalanggen Biduk mel, Belantik mel, sohwalanggen Kartika mel, etma feheg, debag.

¹⁰Aren mundoho wal-debag angge etma re mun hum-ham alereg ma re bilingguk fug alereg, ne Aren along on duruk katsi ale etma re, niren mun higitdoho wenahake fug alereg.

¹¹At ebe an nalukwe kwe lauk men de, an nilen hauk kahi fug, At ebe an neraham kwe lauk men de an nil fam enameg fug.

¹²Aren del-dama re ap sa en ambong seroho At fam nangge ulug ili uk alereg? Mun eleg. Ite ap hein og-hauk kwit, ‘Ao Hat de nangginduk kahen abi?’ Ulug enambong seroho eke uk fug alereg.

¹³At Allah en de Enda ahe laharuk ale nim, olok duruk ale nim aire hambuk ha fug alereg, it Rahab[19] let duruk on en famen ohore at apma neg sebe uk alereg.

¹⁴Aireg ma re an den keroho At obam nele ning-ning lahi halereg? Nele re nangginig on fam At onggo hweag-irihi halereg? Mun eleg.

¹⁵An siag dirihik fug famen ohore, an den At obam nele ningdoho ihi fug alereg, we At Allah an nawene katukdoho kong nutuk on ai fam henda neakin ulug neg de heng ihi halereg.

¹⁶An den At hweag-utuk men, At esanggo holug onggo hweag-nutuk men oho re, An den ihi on aire demdoho At esanggo holeheikdeg ane, ulug aire mun nenda biren-barendoho welahi halereg.

¹⁷An de Aren hol humon sahalimu bereleho nobahasimu welahi, wene dirihik ale indip mel eleg kweleg anggin on Aren nobam eke nim forukmu welahi.

¹⁸Il dorangge lohon an sat leg howag ulug oho fotog neauk fug; Airoho deg kweleg famen de Aren asig on mun hili-halaldoho nobam fesimu welahi.

¹⁹Nenebe nenomamne deg lahe ale At nim wal-wal ahe ha man de, At neg de omamne mun along on wereg, At fam an den wene ai owag lolmin ulug ihi ha man de, ap sa hag angge en ambong seroho wene katukdoho bilinggurukmu etmano At wamag ulug ayonggo[20] fouk alereg? Mun eleg.

²⁰An den dipdoho neg duruk kwit siag dirihik fug, ulug uruk kahi famen de nambilik famen de ahamdoho on wilibik waharuk; An nele imin ulug nambilik fam en uruk kahi on etma re, At Allah siahap deberuk kwit hagdoho neg uruk kahi.

²¹An siag dirihik fug famen de, an nebe fahet wenggel-dauk kahi fug. An nobahet mun leho angge eke wereg fug mu re, an noluk eke nim wereg ale mun ko napuk. Ap homi siag duruk on et bekitdoho duruk on et de enambiangma re we misig ale neg atuk anyo; We at Allah en it enebe birenet angge mun elehapdoho fesehu.

²³Ap siag duruk eleg on we fetagdoho waratuk mu re, At Allah re we unda neg yatuk.

²⁴Kwenang sure At Allah en it ap homi kwasikdoho duruk on fam og-esasi, ne it ap wene katukdoho bilingguruk enap hakim omano re Aren inil bugdoho fesesi. At Allah en neg mundoho etma debag, Ne, At fug halug de, Ap san eke debag behep? Eleg.

²⁵Nukoho an noluk welahi li em etano re, mun folo-foloroho neg lauk, we nahayeg lohon ha fugmen longgo neg ik lauk.

²⁶Perahu ik emberim kwe kululungdoho lauk hag, nebe noluk welahi on etano airoho neg atuk, suwe ikwesahop en bak eke hweaho folug watmin ulug mun baleg ahan sebelik lauk hag duruk.

²⁷An nambilikmu nim-num ulug nahayeg en unda yatuk kwit, ouk-bouk hauk kahi omano napelehap debemin ulug wal-hauk kahimen de, nenda ouk hauk kahi on anyo nikangge an mug naplug waharuk. At Allah en, ‘At siag debag,’ ulug an siaho nobaharuk ale aire an noluk deg ma airoho napuk.

²⁹Ne, an aireg on ulug boruk kweleg aire an den nunggwelug wenggelduk kwit neg welatmin?

³⁰An nasiag horukwag ulug de sabun eke wereg fug!

³¹At Allah en de an anyo buru amben siag on fam yuhul neasimu re, an nonggwareg nasum wandeg lahi on fam en oho an nahum aldo napuk.

³²At Allah ai ap homi on hag deg lalepman de an den at onggo hweag-etlereg de, nit nenebe birenet wene katukdoho biling esaukmu etmano nit ninim kahaleg welahe ale ai fahet elehap nesowag ulug kwik lela.

³³Famen de At dulug an dulug bul etare ap unggum bilinggulug wene kong-duruk on eke, hat siag dehen, hat fano dehen ulug hweag-nesa on eke wereg fug.

³⁴We At Allah amu en neg an unggum nobam foruk ale embeselug de, Aren nik aleroho nobam foruk on etma oko yatma feik lowag.

³⁵An nonggwareg nenda mundoho noluk deg ma re, an den At obam nele uruk ale fahet de an nakol boruk kahi fug mu, ketia nele uruk kahi ai.