Read Ninia Yali MAZMUR 10 Bible Online

MAZMUR 10 - Ninia Yali bible

MAZMUR 10

¹TUHAN nakni, nunggwelug Hat hebe nit ninim yatdoho welahen, nit nenobam sug-sag uruk en duruk li em nunggwelug Hat hebe herag atuk kahen?

²It ap homi siag duruk on en de enawonog fam ap homi enenggik eleg on etmano anggin-fanggin enobam feseruk oma hwi; We it ai enonggwareg en sabu yep dobahat-dauk angge ai fam it enebe luhut atuk kamag.

³It ap siag duruk on en de it siag neg dul boruk ale anyo fahet enele en werehap dil lauk, ap an namu nangge neg bolug dil noruk on en de TUHAN hururung deheg, At ebe nenerim ulug embeseheg, duruk.

⁴It ap siag duruk on en de TUHAN fahet enepe wong debelug dil lauk, ne it enawonog fam de At Allah aire ebe eleg ulug duruk.

⁵It ap homi siag duruk on en de iren duruk ale omano mundoho ambiangma fano neg atuk; famen de iren de At TUHAN ebe mel Awene melaleg mel, enapelegma furebouk eleg angge deheg, it enori eneselei on etmano seramap debeseheg, duruk.

⁶At endaman boruk kwit de, “An den duhuk on etma re ambiangma heilarebehuk fug; ne fobik welamuhuk huli etma ohore ap siag duk fug angge wereg hagdoho welaruhuk.” Boruk.

⁷ Airoho boruk kwit de, aren ap homi hururung enebeheg, enakolap kwelabeheg, ele seiale eheg, duruk. At ele uruk on etma re mun siag nerim berim on etmano neg wereg.

⁸Ap siag neg duruk on anyo en de it ap homi siag duruk ale mel enapeleg on etmano enowatmin ulug de, o sili dotdeg kwe etmano herag aik lalug wereg. No singa en at nauk angge senggelikoho osuk-osuk angge salma herag atlug wereg hagdoho re, at anyo ohore etmano heraho lit, ap homi enonggwareg en del-da fug alereg on etmano fam il wauk kwit wereg. Aren de hweap elegma etmano en ap homi enenggik eleg on etmano kwe bale feselug de, enebe sin-senale re lisoho og-eneplug lauk.

¹⁰Aren de it ap homi etmano senggel enebeheg, omamne fam-fam waroho belap-enepmin ulug, ebe konurebelug wereg.

¹¹Aren boruk kwit de, “Allah re mundoho apeleg atsireg de fubi nobaharuk fug; fobik etma ohore Aren lohon neauk karuhu fug!” ulug boruk kwit duruk.

¹²TUHAN nakni hebe inatlug ap siag duruk on etma unggum og-esakin! Ap homi sebeloho feserukmu anggin hauk on etma ebet esakin!

¹³Nunggwelug it ap homi siag duruk on en Allah mabenap debelug, Allah en unggum og-nesamisi fug ulug neg duruk?

¹⁴Airoho neg duruk famen de, Hat hil mundoho enesauk kahen; Haren de ap homi anggin-fanggin hauk on mel, anggolo hauk kwit wereg on mel, fubi debeseruk kwit, let-enesamin ulug fik-fouk deg neg welahen. Ap homi it enamu en duk fug alereg on en de it enebe Hat hobam neg og-hutuk, ne Haren de ap homi enenggik eleg on hundig let-enepuk kahen.

¹⁵Ap homi siag duruk on mel, Hat hele sahaloho folug duruk on mel en nenomamne wereg ulug duruk on ai Haren si esakin; it enobabut duruk on ai fam Haren unggum og-esahunmu it enebe enobabien angge amag ulug.

¹⁶At TUHAN de li mundoho-mundoho etma fahet unuk bogdeg unduhuk wereg lit melal-enepukmu re; it enunggul unuk-enunggul unuk on At ebe enapeleg on etma re At anggwenang fam en mundoho eleg amuhup.

¹⁷TUHAN nakni, Haren de it ap homi maben deg on etmano en somban uruk on hesanggo hol-eneplug de; it enenda omamneap debeseruk kahen.

¹⁸It omalik wetien on mel, ap homi sebeloho feseruk on mel, enawene re, ap homi en it enobam enakolap debesouk no ulug de Haren neg inibil atuk kahen.