Read Ninia Yali MAZMUR 102 Bible Online

MAZMUR 102 - Ninia Yali bible

MAZMUR 102

¹It ap homi enobam anggin-fanggin hauk on en enebe lilipnaroho wereg lit TUHAN fam enele nginog duruk kwit somban uruk ale.

²TUHAN nakni, an den somban uruk kahi on hesanggo hol nabin, an den nele hobam uruk kahi on ai Hat hesanggoma aik waharuk lamag.

³An nobam anggindoho wereg ma nealug de, Hat horohole amu fil enden am fug. An den hwi hapuk halug de hesanggo hol nabiyug, haren onggo folo-foloroho neg hweag-numuk.

⁴An nebe noluk sure hobu baloho eleg atuk hagdoho eleg atuk, an nowag de indok fulung nauk hagdoho fulung duruk.

⁵An nebe re enggelangge iringgig on hagdoho liog uruk kwit de, nambilik di angge su angge na fug aleroho napuk.

⁶Nebe nenek duruk kwit ngaruruk men neg de; nebe we nahap nowag fam hwililip deg on neg wereg.

⁷An de suwe undan o leimu wereg on hag, ne suwe simu-simu o foluk meiyaleg lin-esaukmu wereg on hag deg lahi.

⁸An nebere suwe o dumu amu wereg hagdoho wereg lit, an nebe nohouk fug ale napuk.

⁹It naselei on en de nukoho hundig an bulip napuk kwit neg wereg, it an nobam enolok naplug duruk on en de an nunuk anyo wipdoho nobaharuk.

¹⁰An de ul omano nasiburu hag atuk mu nauk kahi, nilue re nahaik nauk on hag atuk mu nauk kahi.

¹¹An de Hat holok ahe laharuk on ai fam, hamboko hwik neauihin mu airoho hauk kahi.

¹²An nebe noluk de o hubet enapumag baloho lauk hagdoho eleg atuk kahi; nebe enggelangge halo uruk hag halo uruk kahi.

¹³Famen de TUHAN nakni Hat neg de raja mundoho-mundoho welaruhun, li lahakeg-wambeheg etma ebet heauk kwit neg welamuhup.

¹⁴Haren Sion fam henda hundig duhun li em anyo ketia mundoho aik waharukmu re, Hat hebe inatlug hend ahundig duhun lit deg.

¹⁵O ai mundoho ap en moluluk esausa on deg famen de, nit hat hamingming angge en de o ai fahet nenda hundig deg lahe. Ne, o ai mundoho ul alinlan atsi famen de, iren enenda fururuk kwit wereg.

¹⁶At TUHAN en o Sion nikangge obalma wiruhureg, At ebe andung-dang wereg lit enam aik waharuk li em de,

¹⁷At TUHAN omamne along wereg on ai fahet de it ap homi enunggul unuk-enunggul unuk en enakol duruk kamuhup; ne At andung-dang wereg on anyo fahet de it raja mundoho en inil along duruk kamuhup.

¹⁸It ap homi enebe mundoho fililing ulug wereg on At TUHAN fam somban uruk on de At mundoho esanggo holduk; iren heng uruk on Aren erim ulug embeseruk ale eke wereg fug.

¹⁹It ap enunggul unuk owan endag-atuk eleg on etman, At neg mot-duruk kamuhup en de, it enebe fobik welamuhup on etma enobahet, At TUHAN en disi ale mel duruk ale mel etma mundoho lisu baloho feiyug.

²⁰At TUHAN ebe obale mun lehoma etlema wereg lit il fu ha waharuk, o bohol fam etman de kwenangma suma orohole ben ha waharuk,

²¹it ap homi sabu hetdoho feserukmu wereg lit anggolo en nenek-fenek hauk ale esanggo holmin ulug duruk, ne it ap unggum enobam folug binggi enowatul ulug duruk on etmano loloho wilibi fesemin ulug duruk.

²²Ai fam de, it ap enunggul unuk-enunggul unuk on mel kerajaan etma wereg on mel, At TUHAN obahet dukoho kabog-duruk kwit,

²³At unuk de o Sion fam etma fag-duruk kamuhup, ne At ebere o Yerusalem fam etman mit-motdoho lahabe foruk kamuhup.

²⁴An nebe sauwereg lit At TUHAN en an nomamne wereg on anyo mundoho luluhun esasi, ne an nebe noluk wereg on umur anyo horohe fesi.

²⁵Airoho debesimu an den uruk kwit de, “Nakni Allah, an nebe noluk wereg on horog buldeg li em eiya, naheime og-nabuk fug.” Irihik. TUHAN Hat de holuk mundoho-mundoho welaruhun,

²⁶ o endam de Haren neg kwenang waldoho ferihin; ne bohol ohore Hat henggik en ahut hilinggi ferihin.

²⁷Ai mundoho abirangge eleg aruhu, famen de Hat neg de mun yugdoho welaruhun; mundoho etma re sum siag atlug denel heheg lauk hag aruhu. Haren de sum mining on hag wal-deberihin mu re, mundoho etma eleg aruhu.

²⁸Famen de Hat neg de hebe heitogdoho neg welaruhun, Hat hebe holuk ambiangma eleg aik lahun li em eke wereg fug.

²⁹Nit nenomaliki nenombasi inim de enobam finik-fanoroho neg welamuhup, ne Haren enalong baloho fahat-enusugmu re enambong seroho neg welamuhup.