Read Ninia Yali MAZMUR 103 Bible Online

MAZMUR 103 - Ninia Yali bible

MAZMUR 103

¹At Daud en isi on. An nebe su yei, At TUHAN neg mot-din, an nenda abirangge en At unuk mun eneg on ai neg mot-din.

²An nebe su yei, At TUHAN neg mot-din, Aren fano ale neg hapuk on anyo hapeleg am fug!

³Aren neg hat hasiag apelehapdoho hobahasi, ne hat haouk wereg anyo mundoho aren neg hilinggi hobahasi,

⁴Hat hebe holuk anyo waratuk on fam etman Aren loloho wilibi hobahasireg, enda hundig habeheg, mun alongdoho enda habeheg, duruk.

⁵Aren mun fano angge on neg[55] hobaharukmu, suwe ikwesahop omamne deg hag hat hebe sobal am fug angge sauwereg lit neg welahen.

⁶Ap homi enobam anggin fanggin feserukmu anggin hauk kwit wereg ma, At TUHAN en de unggum enobam feseheg, katukdoho neg debeseheg, duruk.

⁷Aren diroho duhuk ulug wenggeleg welatfag on anyo at Musa fam hweag-itfag, ne At obabut duruk katfag ale anyo re it enunggul unuk Israel on fam hweag-esebag.

⁸ At TUHAN de enda hundig enebeheg, enelaheg eseheg, duruk on wereg, Aren de folo-folo fetagdoho duruk fug, Aren de mun alongdoho enda hundig nenepuk.

⁹Aren de hundig-handig etma ele bererag duruk kwit neg wereg fug, ne olok nenobam folug endama sebeleg lit neg wereg fug

¹⁰Aren de nit nenesiag wereg ale higitdoho unggum nenobam foruk fug; ite niren kwasikdoho duruk kahe on wutdoho ambiangma nenobam foruk fug.

¹¹Famen de kwenang emberimmu bohol lendi yatdoho wereg anyo hag, ap homi wene melaleg furebelug neg duruk on de Aren airoho at enda hundig-enepuk.

¹²O timur fil en de barat fil il yatdeg wereg anyo hag, il airoho at nit nenesiag yatma hwik-esauk.

¹³It ap en enomaliki fam enenda hundig enepuk hag, it ap homi wene melaleg furebelug neg duruk on de At TUHAN airoho neg enda hundig-enepuk karuhu.

¹⁴Nit ap homi nenebe fahet di angge en wal-deg wereg ulug aire At TUHAN mundoho oluk deg, ne nit nenebe re kwenang ahe on en welahe ale ai fahet Aren oho wenggel-hauk.

¹⁵Enggelangge wilipuk on li horogdoho neg wereg ai hagdoho ap homi nenoluk anyo mun horog deg wereg, ap homi nenebe re yabukmu owil angge yaho on owil yihiruk men;

¹⁶hol fi ha waharukmu re ebe mundoho eleg aik laukmu re, at obale oho kea ulug yamireberuk.

¹⁷Famen At TUHAN en de ap homi wene melaleg furebelug neg duruk on de enda hundig enepuk kwit neg wereg, it ap homi Aren abug wene waroho hweag-esasi on anyo furoho seneg lit wereg lit

¹⁸iren dipdoho neg At awene melaleg anyo enebe fam duruk on nim de, ne di li em su li em etma re Aren it fahet fano ale enepuk on anyo hauk kwit neg welamuhup.

¹⁹At TUHAN ebere bohol fam etma melalduk kwit wereg, At ebere di on su on mundoho sebeleg kweleg it mundoho enemberimmu raja mun along on wereg.

²⁰Hit malaikat mun henebe lik-louk deg wereg lit, At ele hole feheg, ne Aren uruk ale higitdoho neg deheg duruk kahep on etmano en At TUHAN neg mot-diek.

²¹Yaho hit bohol fam henoluk welahep on etmano abirangge en inim, ne hit amingming angge At enda ahayeg hauk ale neg duruk kahep on etmano en inim, At TUHAN neg mot-diek.

²²Yaho hit Aren mundoho waldoho henobahasimu wereg lit wilayah Aren melal-enepuk on fam welahep on etmano en At TUHAN neg mot-diek. Yei, an nebe su en inim At TUHAN neg mot-din!