Read Ninia Yali MAZMUR 104 Bible Online

MAZMUR 104 - Ninia Yali bible

MAZMUR 104

¹An nebe su yei, At TUHAN ai mot-din! TUHAN nakni Hat de mun handung-dang deg on welahen! Hat hebe hambogbagdeg lahen on inim, hobam angge lik-louk deg lahen on inim de hasum wandeg ma hag deg lahen; ne hebe re seleg en hulilipdoho welahen.

²Haren o bohol de no kemah wiriloho wiri forukmu deg hagdoho doale ferihin,

³ne Hat hobam de o bohol fam etman ik emberimmu[56] wiri ferihin. Haren hena emberimmu lahalug lauk angge hag deberihin, hol de Hat hahwerabul deberihin deg walug lauk kahen.

⁴ Hol de Hat hayonggo angge deberihin, ne oeal de Hat heyabuk let-hapuk on deberihin.

⁵Kwenang indip mun omamneroho oboule emberimmu lahabe ferihin mu re, li mundoho-mundoho etma lohon elek-felek uhu fug.

⁶Airoho deberihin deg Haren ik ahum en sale ferihin, ne ik de hetag-hetag yenggeldil dom anggolopma lahaik lasi.

⁷Hat hele bererag en de ik anyo biloho wirig atsi, Hat hele sipuk en de ik ebe il omamneroho wirig atuk.

⁸Ik de dom indip kwe en wirig atlug de donggoma, Haren obale fouk debeserihin mu etma wilibik lauk.

⁹Ik ai nikangge kwenangma abirangge yenggelik lahaik wam no ulug de, at wirig atuk karuhu fug kwe ulug Haren huli-huli ware ferihin.

¹⁰Donggo kwe mel fanggong kwe mel etman ik eleruk fulohom heheg wilipuk kamag ulug deberihin, ne ik ahanggen on de duk-duk honggolog kwe en wirig atuk mu,

¹¹di wam su wam, di bak su bak, yabukmu wereg angge mundoho etmano en nenggeg, ne wam keledai enggelama on etmano ik obok enepukmu enenda sakorebeheg, duruk kamag ulug deberihin.

¹²Ik aeg kwe etma re di suwe su suwe ena wit-dauk; ne it e enggela sahali kwe etmano enele neg dulit-dulit uruk.

¹³Haren bohol fam en osit dom fene belabik waharuk kahen, o kwenangma suma re Haren wal-dirihin angge di angge su angge en hoporeg lit wereg.

¹⁴Di wam su wam etmano enobahet Haren enggelangge wilibi foruk kahen, ne ap homi enobahet de di a su a yaho foruk kahenma,

¹⁵ai fam ap homi eneyabuk wit-deheg, a yag deheg, duruk ne enahan anggur anggen enendama enahayeg hauk aleroho yihig feseruk kahen. Ai en foma e zaitun ahalue og-esauk kahenma enerohole heal atuk, ne nauk angge it enebe enomamneap debeseruk kamag ulug og-esauk kahen.

¹⁶At TUHAN ahan e sin o Libanon At onggwareg en yatsi on etma re obam osit yirohoho belabik waharuk.

¹⁷E etma fam de di suwe su suwe ena wutuk, ne e andogdog fam etano re suwe ranggung a wutuk.

¹⁸Dom yaron fene etma re it kambing enggelama on wereg ma, ne no pelanduk de helep ug helep fam etma herag aik kuruk.

¹⁹Li huli-huli enegdoho ulug Haren bigalem waldoho ferihin, mo at obuk-ik lauk li at mundoho oluk deg.

²⁰Haren o mum belabik waharuk kahenma re o il heik atuk, ne it di bak su bak mel di on su on enggela kwe wereg angge mel wilibik lalug noruk.

²¹No singa ket sauwe on en de at nauk angge heraril noruk kwit de ele kouwaril, Allah en at nauk kamag ulug fouk deberuk on etmano og-nomag ulug dil noruk.

²²Mo lahabik wahail laukem de it anyo enebe lit-lit de, it enebe herag atuk mu etmano nohweik lauk.

²³Airoho durukmu it ap homi etmano eneyabuk wit-daul ulug wilibik lauk, wilibik lalug de yabuk duruk men neg de o hupmu aik lauk.

²⁴Yeheyu TUHAN nakni, Haren mun hum-ham ale wal-deberihin, mundoho etma re Hat henda wenggeleg fam neg airoho deberihin mu, o kwenangma suma Haren wal-deberihin angge etman hoporoho wereg.

²⁵Ik laut ahum mun doaloho yahamag deg angge ai ahumu, di ikan su ikan mel di on su on mel doron lohon mun wenahauk fug aleroho wereg angge furiek.

²⁶ Ik ai emberim fam etma kapal noruk, Haren kisu naga laut fam waldoho ferihin on Lewiatan [57] anyo etma wereg lit yingapuk.

²⁷It mundoho en de mo it nauk li em etano higit atuk mu, nauk on fahet Hat hobam neg enenda ebereg lit nangno heauk.

²⁸Haren og-esaukmu re iren andog-dauk, ne Haren fouk debeserukmu re it anyo enehummu homoroho neg nauk.

²⁹Ne, Hat horohole endenoho hamu fil deberukmu re it anyo enakol neg atuk; ne Haren it enebe fam sat wereg on anyo og-haukmu re, it enebe eleg aik lalug de enebe keram atswa hagdoho kwenang ahe aik lauk.

³⁰Famen de it enobam Haren hele ahe og-esauk li em de it anyo wereg atuk; Haren kwenang fam enoluk[58] keron og-esauk kahen.

³¹At TUHAN andung-dang wereg on aire mundoho-mundoho aireg lamag! ne Aren wal-debag angge etma fahet At ebe ahayeg hauk kamag!

³²Aren de kwenangma il fu halug de kwenang ebe elek deberuk, ne dom-dom doung haukmu re hobu baloho wilipuk.

³³An de nebe noluk wereg lit etma At TUHAN obahet suni uruk katmin, an nebe nil owag wereg li em At Allah obahet suni motdeg suni uruk katmin.

³⁴We Aren neg an nendama nahayehap nobaharukmu re, an den suni uruk katmin on etma At endama ahayeg hauk kamag!

³⁵It ap homi siag duruk on etma re o kwenangma suman mundoho eleg-ail lowag, ap homi kwasikdoho neg duruk on etma mun enobale ail lowag. Yei an nebe su TUHAN mot-din! TUHAN mot-din!