Read Ninia Yali MAZMUR 105 Bible Online

MAZMUR 105 - Ninia Yali bible

MAZMUR 105

¹At TUHAN obam neg dang diek, ne At ebe along wereg ale ai fahet saharik lakiek, Aren duruk ale etma fahet it ap homi enunggul unuk-enunggul unuk wereg ma etma dindilik lakiek.

²At TUHAN obam neg suni motdeg suni iek, Aren di ale su ale mun fulu-bolan ale disi on ai fahet walug fag-dik lakiek.

³TUHAN ai ebere We Misig neg angge on anyo, nit de At onggwareg en on welahema henahayeg diek, hit mundoho At apne wauk kahep on halug de henawonog diek.

⁴Aren henomamne og-hesowag ulug heng uruk kamek, hundig-handig At neg apne wauk kamek.

⁵Yaho hit at Abraham Allah amingming angge anyo ombasi-ambusi welahep on, ne hit at Yakub ap momaleg on anyo ombasi welahep on, Aren duk fug ale duruk katfag on etmano henenda ebet hauk kamek, ne Aren wene kongdoho ebag on etmano henapeleg am fug.

⁷TUHAN aire nit nenakni Allah anyo, Aren wene kongdoho ebag on aire ap homi o kwenangma suma mundoho fahet ebag.

⁸Aren de atam abug wene waroho hweag-esebag on anyo ebereg wereg, Aren wene sali ebag on aire mundoho-mundoho welaruhu.

⁹ Wene sali aire at Abraham inim watfag, ai en at Ishak inim watfagdeg,

¹⁰ fobik en at Yakub inim wene sali watuk kwit omamne debebagma re, wene sali aire nit ap homi Israel on enobahet mundoho-mundoho wat-nesebag.

¹¹Aren wene sali wat-nesauk kwit de, “O Kanaan kwenang aire, hit henangge mundoho-mundoho amag ulug og-hesahuk.” Ebag.

¹²O endam etma it Allah omaliki etmano ap homi bohon hagdoho etma welatfag, it enebe re wenaho angge hagdoho neg welatfag.

¹³It enebe re ap homi enunggul unuk eke on weregman de enunggul unuk amu on wereg ma lil dag watil noruk katfag, o kwenang eke on fam en de kwenang eke on fam lil lauk katfag.

¹⁴ Famen de it ap homi amu on en eke it enobam anggin-fanggin feselug sebel-enusug lamag ulug At TUHAN en fotog-esauk katfag fug; it inili oko re Aren raja etmano fam ele foruk kwit de,

¹⁵“Ap homi An den momal-enepihik on ai eke enele ying-esahup hayog, it An nomaliki nabi etma fam siag ale debesehup hayog!” ulug wene eneluge febag.

¹⁶ O kwenang ai fam At TUHAN en siburu obok mondorik watfagdeg, iren nauk on ulug foukdoho fahat debag on etmano Aren mundoho webag.

¹⁷ Famen de it fomane owan deg kweleg Aren ap atam dam eke lauk kamag ulug mingming debebag on de, at Yusuf, enamingming angge welamag ulug onggo bal-debag on anyo.

¹⁸ Eiyog de sabu bosiemanggen on hag angge fam het-debebag, ne anggolobag ma re sabu bosiemanggen on elang deg angge ilili febag.

¹⁹Airoho dil-dil en ambiangma re aren airoho aruhu ulug wene suwit hagdoho uruk katfag on etmano ebe demdoho atfag, ne at ebere TUHAN ele fam en ap demdoho atfag ulug uruk.

²⁰ Ai en fobik en at raja Mesir ahun it di enunggul unuk su enunggul sebel-enusug lit enemberimmu welatfag ahun anyo en, o sabu hetdoho kwelabe feserukmu etmano en loloho wilibi febag.

²¹ Airoho wilibi fesireg de at ebe yabuk at raja obam olma etmano duruk kamag ulug og-etfag, ne at raja en angge di angge su angge wereg on etmano hwalduk kamag ulug unduhuk febag;

²²ai en eke foma it raja autsi pegawai etmano melaloho feseruk kamag ulug inim, ne it ap enowesi log-lohon lohwaleg anyo melal-enepuk kamah ulug inim, at obam neg febag.

²³ Ai en at Yakub anyo o Mesir lebagdeg, o etma ap bohon hagdoho wereg latfag.

²⁴ At TUHAN en de it At omaliki anyo enebe humap deberukmu eneb humdoho saha uruk katfag, ai fam de it ena weim on etmano enomamne eleg deg kweleg it anyo neg de enomamne hum atuk katfag.

²⁵At TUHAN en de it ap homi Mesir on enenda aham debesimu re At omaliki etmano enerim enepuk kwit, iren At amingming angge etmano mun siag-biagdoho neg debeseruk katfag.

²⁶ Airoho debeserukmu fobik Aren amingming angge Musa anyo inim, ap momaleg on Harun anyo inim mon-enebik lebag.

²⁷O Mesir etman iren duk fug on etmano deheg, At TUHAN en mun hum ale duruk on etmano deheg, duruk katfag,

²⁸ ne iren de At TUHAN en wene diroho diyug suroho diyug ulug melale fesebag on anyo ele holoho neg duruk katfag. Ai en At TUHAN en o kwenang anyo fam o mundoho il hup bin debebag.

²⁹ It enahaik etmano il ahamdoho il mep debebagma, ikan mundoho warail lebag.

³⁰ It enobam enanggwenang fam etma yahaye neg hweik solog uruk kwit, At raja obam hulumu kwik lebag.

³¹ At Allah amingming fam de sobon watfag, ne kolun de o kwenang ai fam mundoho saha-faha uruk katfag.

³² Osit obalma re Aren lumbiag belabik watfag, ne oeal de lepeng neg uruk kwit dahan-dahan atuk kamag ulug mondorik watfag.

³³Aren de e anggur mel arah mel omano dukom eseheg, ne it enahan etmano mundoho unggul wat-eseheg debag.

³⁴ At ele mingming fam de bulue elang hum-ham on, mun wenahauk fug aleroho watfag.

³⁵It etmano watfagdeg de it eneyabukmu di angge su angge a yaho on etmano mundoho ando fouk fug aleroho nenggeg, ne kwenang famen en anggen yihig wereg on etmano munmiroho nenggeg debag.

³⁶ Airoho dulug de it ap homi Mesir on wereg homia domog etmano enomalik ap wandeba on mundoho binggi enowatil lebag.

³⁷ Airoho debelug de Aren it ap homi enunggul unuk Israel on anyo og-eneplug wilibik watfag, it enebe wilibik waharuk kwit de, iren emas mel perak mel hwelalug waheg, ne enebe mel mun finik-fanoroho deg lit enomamne wereg ma wilibik watfag.

³⁸It ap homi Mesir on de enakol anggolo siag on enobam aik kwebagma re, it ap homi Israel on wiliplug waharukmu fano lahesa bebag.

³⁹ At Allah en de it omaliki etmano sambun-enusug lamag ulug de anggulog doale febag, ne indok de o hup angge ambogbag enepuk kamag ulug febag.

⁴⁰ Iren heng ebagma re Aren suwe musak mel hag on mondorik watfag, it enobam siburu roti boholma on og-esebagma, it enebe homoroho nauk katfag.

⁴¹ Aren helep dom fam kahale fesimu ik o lei kwe wirig atuk on hagdoho, wilibik watfag.

⁴²At TUHAN en amingming angge Abraham fam wene sali wat-etfag ale anyo ebet hauk airoho enepuk katfag.

⁴³Ai fam de Aren omaliki mun enahayegdoho og-eneplug watfag, ne ap homi Aren momale-enepfag on enanggilukdoho og-eneplug watfag.

⁴⁴ It ap homi enunggul unuk amu on en etmano it og-esebag, ap homi amu on eneyabuk etmano it At omaliki etmano enengge amag ulug og-esebag.

⁴⁵It omaliki etman At awene melaleg wereg on anyo fam furoho holoho neg deheg, ne Aren diroho diyug suroho diyug ulug hweag-esauk katfag on etmano deheg, duruk kamag ulug airoho debag. At TUHAN ai neg motdeg welamag!