Read Ninia Yali MAZMUR 106 Bible Online

MAZMUR 106 - Ninia Yali bible

MAZMUR 106

¹ TUHAN neg motdeg welamag! At TUHAN aire ebe fano on wereg lit, Aren enda hundig nenepuk on anyo re mun eitog eme welaruhu mu re, at obam dang duruk kwit neg welamek.

²At TUHAN mundoho andung-dang wereg ale ai fahet de ap sa en walug saharik la alereg, ne ap sa hag angge en At obahet mun higitdoho mot-debouk alereg?

³It ap homi At awene melaleg holoho neg duruk on etma inim, ne it enobabut fam demdoho on neg duruk on etma inim, de mun enahayeg hauk kamag.

⁴TUHAN nakni Haren it homaliki enobahet mun fano ale neg debeseruk kahen anyo fam an oho wenggel neakiyug, ne Hare it homaliki etma enahap wendat-enepuk kwit halug de an oho let-nabiyug.

⁵It ap homi Haren momaloho feserihin on etma enangge mun sigdoho neg wereg ma nil eseheg, ne it Hat homaliki inim seberoho nahayeg heheg, duruk karuhuk lamag. It ap homi Hat honggwareg hangge atswa on inim seberoho, nahayeg heheg, nawonog aheg duruk karuhuk lamag.

⁶It nenambu-nenombasi en duruk katfag higitdoho nit mundoho siag duruhuk; niren de mun kwasikdoho neg deheg, ne Hat hawene melaleg sahaloho feheg, duruhuk.

⁷ It nenombasi o Mesir wereg lit etma fureberuk katfag fug, Haren di angge su angge mun fulu bolan aleroho deberuk katihin on etma iren enendama wenggel-hauk katfag fug. Ik Laut Gelagah horogman, Haren henda hundig hum ale enepihin on anyo enapeleg atsi mu, iren Hat Mun Leho Welahen on[59] anyo hil hanim wene lahalduk katfag.

⁸Famen de At TUHAN onggwareg enda ebet halug, At andung-dang wereg anyo enam amag ulug de, Aren enahap wendat-enepfag.

⁹ At ele miming fam de Laut Gelagah anyo iring atfag ma, Aren omaliki etmano ik laut ahum kwe anyo o lei kwe og-eneplug lauk hag og-eneplug watfag.

¹⁰Airoho disi ai fam de it enaselei on enenggikmen enahap wendare feseheg, ne it ena weim on enenggik omamne apma weregman fiselaroho wilibi feseheg, debag.

¹¹Famen de it ena weim on etmano re, misig eke lil atlug la fug angge, abirangge ik ahummu obuk ebag.

¹² Airoho disi ai fam de it omaliki etmano At TUHAN en sali wat-esebag on anyo fam demdoho bousareg, At obahet suni motdeg suni wilipuk katfag.

¹³Famen de it anyo folo-folo etano neg At TUHAN en disi ale anyo enapeleg atfagdeg, Aren wene komo ale hweag-nesowag ulug heng uk fug angge duruk katfag.

¹⁴ O leimu etmano en de it enal ahe lahabagma re, Allah abut balswa.

¹⁵Iren heng uruk angge anyo Aren og-esauk katfag, famen de it enobam ouk hwenanggo hag on aik watfag.

¹⁶ O leimu etmano de iren at Musa fam inim, ne Harun At amingming angge mun eneg horeg on anyo fam inim enalitno enepfag.

¹⁷Airoho debagma re kwenang bulkwe halet dil lauk kwit de Datan bil-eseheg, ne Abiram ohwe omaliki inim sal-enebeheg, debag.

¹⁸Indok wambik waharuk kwit de it on enebe kabogdeg on anyo enobam sebel-enebik watfagdeg, it wene melaleg sahale folug debag on anyo mundoho han-werag enepfag.

¹⁹ Dom Sinai fam en de iren wam sapi omaliki emas fam ahut ilitdoho wutfagdeg, enenggik en ahut hilinggebag angge anyo apne wauk katfag.

²⁰Iren de Allah Mun Along wereg on anyo re, no sapi enggelangge nauk on anyo inim higitap debag.

²¹Allah it enebe enahap wendat-enebeheg, ne o Mesir en mun along hum-ham ale deheg, debag on anyo enapeleg atfag.

²²O kwenang etma fam en de mun fulu-bolan ale debagman, ne ik Laut Gelagah anyo yenggelegman oho re fulu laleg ale Aren debagman.

²³Ai fam de At Allah en it enebe mundoho elehap debesemin ulug duruk men de, Musa At Allah en momaleg on anyo en kwe bale febag. At Musa ebe bul inatfagdeg it inili webag ai fam de, Allah olok lahabag on anyo lombuk ebag.

²⁴ Ai en iren Allah en sali wat-esebag on anyo fam demdoho bousa fug mu atlug de o kwenang mun ebema anyo nenerim ulug embesebag.

²⁵It enobam sabo salegma etmano enele mul-mul neg uruk kwit de, TUHAN ele uruk on anyo holuk eleg angge welatfag.

²⁶Ai fam de Aren hombuk baloho uruk kwit de, ‘O Leimu en mundoho enowaruhuk,’ ulug hombuk balfag.

²⁷ It enambiangma en ondoho on de it ap homi enunggul unuk amu on enesahali kwe hwik-esahuk, ne enebe o kwenang enapeleg kwe del-fol esahuk ebag.

²⁸ Ai o Peor en de iren kembu Baal anyo apne webag, ne kembu dewa enobahet ulug nauk on febag on etmano nebag.

²⁹Iren airoho debag on ai fam de TUHAN olokap kwelapfag ma re, ai fam Aren ouk amben siag on enobam aik watfag.

³⁰Famen de at Pinehas wilipuk kwit de, it mundoho siag duswa on etmano unggum og-esebagma re, ouk amben siag on anyo bal-atfag.

³¹At Pinehas en debag on aire an den oho we misig eke dirihik boruk katfagma re, iren mundoho ebet hauk kwit neg welatfag.

³² Ik Meriba senema etmano en iren TUHAN ahummu olok kwelabeg ale debagma re, iren debag on ai fam de at Musa anyo apme anong-hong deg ale neg deberuk katfag.

³³Iren at endama mun hesilig ale debagma re, aren ele furoho wenggel-ha fug angge ebag.

³⁴ At TUHAN en hweag-esebag hagdoho iren ap homi enunggul unuk amu on etmano enebe elehapdoho fesouk fug anggere,

³⁵it enebe ap homi enunggul unuk amu on etmano inim nanggeleg-hanggeleg aik lebagdeg, iren ap homi Allah enapeleg on en duruk ale etmano enahut wal-heheg duruk katfag.

³⁶Airoho duruk kwit de iren kembu mot-duruk katfag, ne iren airoho duruk katfag ai fam de it enebe yoma-dobahat debag.

³⁷ Iren de enomalik omano waroho re, it ap homi Kanaan on en enanggembu etmano fam feik lauk katfag.

³⁸ Iren de ap homi siag duruk ale mel enapeleg on, it enonggwareg enomalik etmano enamep iren kembu etmano obahet enamep belapil lauk katfag, ai fam de iren o kwenang ai mundoho siaho foruk katfag.

³⁹Iren airoho duruk katswa ai fam de it enebe mundoho emet atuk kwit, iren Allah fam dipdoho welam fug angge duruk katfag.

⁴⁰ Ai en At TUHAN en it enobam ahummu olok ahan-han atfagdeg de, At onggwareg angge on fam en ahummu me aperoho hag kumu esauk katfag.

⁴¹Ai fam de Aren it anyo enebe ap homi enunggul unuk amu on enenggik og-esebagdeg, it enaselei on etman sebel-enusug lamag ulug embesebag.

⁴²Airoho debesebagma re it anyo enobam anggin-fanggindoho debeseheg, it enalong apma welamag ulug debeseheg, duruk katfag.

⁴³Li birenam-henahanam hagdoho At TUHAN en fiselaroho feseruk katfag famen ite ele owag lahalduk ale neg enambono deg latfag, ai fam de it enonggwareh enesiag sahalimu en enebe eleg atuk katfag.

⁴⁴Famen de iren enele hwiruruk on anyo At TUHAN esanggo holfag deg, it enebe fam anggin-fanggindoho hauk ale anyo Aren furebesebag.

⁴⁵It ai enobahet de Aren sali wat-esebag ale anyo ebet hauk katfag, ne Aren enda hum aleroho enda hundig enepuk anyo fam Aren enda enusug latfag.

⁴⁶It ap homi amu on it enebe sabu hetdoho feseik lauk on etmano en enenda hundig enepuk kamag ulug Aren ap homi etma fam debeseruk katfag.

⁴⁷ TUHAN Allah nakni, Haren nit nenahap wendat nenebin, niren Hat dang habeheg, ne Hat hunuk mun eneg horeg on ai mot-habeheg, duruk kamuhuk en de, nit ap homi enunggul unuk amu on enesahali kwe etma weregman haren andogdoho nenobahain.

⁴⁸Ketia huli en fobik mundoho-mundoho etma, it ap homi Israel on enakni Allah ai neg motdeg welamag, ne it ap homi mundoho en de, “Amin!” Uruk kamag. TUHAN neg motdeg welamag!