Read Ninia Yali MAZMUR 107 Bible Online

MAZMUR 107 - Ninia Yali bible

MAZMUR 107

¹ “At TUHAN aire ebe fano deg lit, Aren enda hundig nenepuk on aire mundoho eitog eme wereg ma re, At obam neg dang duruk kamek.”

²Yaho hit henobam anggin-fanggindoho weregman henahap wendat-henepsi henap, Hit de o henapelegma il emberim fil il apma fil[60] mo bekit fil mo hware fil, etmano en mundoho andogdoho henobahaik wahasi henap, henele airoho ulug up sahal-fahaldoho iek.

⁴It fomane o lei kwe etmano leil watil laheg, kobokwe o kota enebe wereg ma lauk on enenda nong-hong uruk en dil laheg, duruk katswa.

⁵It enebe fam enahaik obok en deheg, enasiburu enaeg feheg, duruk kwit iren enendama ebet-ebet welatswa on etmano mundoho eleg aik lauk katsi.

⁶It enobam anggolo-fanggolo deg lit iren TUHAN ayonggo foruk katswa ma, it enebe airoho deg ma omano en TUHAN en fiselaroho wilibi feseruk katsi.

⁷Aren de kobokwe bekit deg on fene og-eneplug lalug de, o kota ap homi enebe wereg ma etmano feseik lauk katsi.

⁸Aren airoho enda hundig enepuk katsi ale ai en, Aren ap homi enobahet di ale su ale disi on etma re mun yin-hun deg anggere. Aren de ap homi ik enenda ahe enepuk on etmano enenda sakorebeheg, ne ap homi siburu obok en hunik wereg on etmano di on su on fano ale neg bulularoho og-eseheg, duruk angge re iren uk aleroho At dang duruk.

¹⁰Iren At Allah fam owag lahaleg ale neg deheg, ne At Mun Leho Wereg on anyo wene melaleg hweag-esauk on anyo holda-holda ale neg deheg, duruk katswa ai fam de, It fomane re o heikmu wereg lit nenek deheg, it ap sabu hetdoho feserukmu etmano wereg on bosiemanggen sabu hetdeg wereg lit anggilik-anggolo heheg, duruk katswa.

¹²Aren it yabuk anggin on og-esauk katsi fam de it enenda sebeloho feseruk katsi; ne it enebe eke bule wamburuk halug de ap amu on eke en let-enebuk fug alereg latsi.

¹³It enobam anggolo-fanggolo deg lit iren TUHAN ayonggo foruk katswa ma, it enebe airoho deg ma omano en TUHAN en fiselaroho wilibi feseruk katsi.

¹⁴Aren airoho enda hundig enepuk katsi ale ai en, it enebe o mum deg ma wereg ma anyo en og-eneplug wilibik waheg, ne it enenggikmu sabu bosiemanggen on fam het deg anyo somboroho hwik-eseheg, Aren de sok no tembaga fam hilinggoho lareg on etmano dukom eseheg, ne bosiemanggen on fam kelog wareg on etmano si eseheg, duruk katsi ai fam de iren uk aleroho At dang duruk kamag.

¹⁷Ap homi fomane enonggwareg enesiag en enebe sohou atuk katswa, ne it enonggwareg en kwasikdoho duruk katswa fam de enobam ouk-bouk hauk.

¹⁸Di angge su angge nauk on etmano abirangge me enape angge hag neg atuk, ne it enebe mun dereng uruk horog aik laukmu wereg.

¹⁹It enobam anggolo-fanggolo deg lit iren TUHAN ayonggo foruk katswa ma, it enebe airoho deg ma omano en TUHAN en fiselaroho wilibi feseruk katsi.

²⁰At ele melaleg fam de it enebe hilinggoho feseheg, ne it enebe re waratuk on ambilik elahaletman ohwale feseheg duruk katsi.

²¹Aren airoho ap homi enda hundig enepuk katsi ai en de iren uk aleroho At TUHAN fam dang duruk kamag. Aren di ale su ale ap homi enobahet duruk katsi on etma re mun yin-hundoho deg anggere.

²²Iren At obahet di angge su angge walug feik waharuk kwit At ebe dang duruk kamag, ne enesuni enahayegdoho wilibi folug de Aren duruk katsi ale etma fahet saharil lauk kamag.

²³It fomane re e kapal fam lahalug funag-lenggag anggeril lauk kwit, enangge nauk on laut humdoho sahareg ma etmano herarik lauk.

²⁴It airoho lauk kwit de At TUHAN en duruk katsi ale mel, Aren di angge su angge mun duk fug aleroho waldoho laut fam fesi on etmano inil hauk katswa.

²⁵At ele mingming fam de hol sielu firik waharukmu re ik ahum funag-lenggag angge esauk.

²⁶Kapal wirig angge etmano re hamboko koloma hwik-esa lahalug de, ik ahum il apma erahamu wendal esa wamburukmu re, ap homi enambong sereg on etmano mun anggolo aleroho elek-felek haukmu re, mundoho enamel-mel neg atuk.

²⁷It enebe re ap ik asig on nalug siomo duruk kwit enenda wenggelduk on eleg atuk mu duruk omano hagdoho re, enape morulug de dal-dal anggeroho kup duruk katswa.

²⁸It enobam anggolo-fanggolo deg lit iren TUHAN ayonggo foruk katswa ma, it enebe airoho deg ma omano en TUHAN en fiselaroho wilibi feseruk katsi.

²⁹Ik ahe fun-fan ele matuk on anyo boge feheg, ne ik ahum funag-lenggag angge duruk on anyo hambuge feheg, duruk katsi.

³⁰Airoho deberukmu re hol sielu anyo mundoho eleg aha ulug it enenda enahayeg atuk kwit; it enebe og-eneplug it laul borukmu belap-enepukmu etmano feseik waharuk katsi.

³¹Aren di ale su ale ap homi enobahet duruk katsi on etma re yin-hun alereg anggere, Aren airoho enda hundig enepuk katsi ai en de iren At obam uk aleroho dang duruk kamag.

³²Iren de At TUHAN along wereg ale anyo At omaliki enesahalimu en mot-deberuk, ne it enowesi ap log-lohon majelis anyo weregman At mot-duruk.

³³Ik wirig atuk on etmano re ahamdoho o leimuap deberuk katsi ik eleruk wilipukmu etmano re kwenang mun haroreg maap deberuk.

³⁴Kwenang mun hesiligmu etmano re, it ap homi etma wereg on en kwasikdoho neg duruk ai fam, kwenang leiroho oruk siagma deberuk.

³⁵O leireg kwe etmano re ahamdoho re ik sene yenggeleg kwe deberuk, kwenang iringgig kwe etmano re ik eleruk wilibi foruk.

³⁶Ap homi enasiburu obok on de etma feserukmu re, enobam wereg ma kota etma wit-dauk.

³⁷Iren de eneyabuk kwe etmano di a su a foleheg, de e anggur a yareheg, dulug de anggen yihig mun fulularoho kabog-duruk

³⁸At TUHAN en de it fam enomaliki hum-hamdoho we og-esauk, ne it enowam di on su on etmano re omalik endag-atuk kwit ebe humdoho sahail lauk.

³⁹Famen de it enebe anggin-fanggin enolok hasimeg enobam feseheg, ouk-bouk debeseheg, duruk kwit enalong elehapdoho feserukmu re, it enebe we dorangge neg wereg.

⁴⁰At TUHAN en de it enowesi melal-enepuk on etmano sebeloho feselug de, o lei kwe kobokwe lauk on mel mun eleg kwe etma dag warik lakiek ulug monde-feseruk.

⁴¹Famen de ap homi enangge eleg on de it enobam anggin-fanggin hauk on anyo fam fiselaroho feseruk, it enomaliki inim it enahain elekwe on nim wam domba uluk bembeal deg omano hagdoho hum atuk.

⁴²It ap homi bekitdoho neg duruk on en inil halug de enahayeg duruk, famen de ap homi siag on en bulip-enepuk.

⁴³It ap homi enenda wenggeleg on mundoho etma fahet wenggel-halug de, demdoho At TUHAN enda hundig nenepuk kwit neg wereg ulug uruk kamag.