Read Ninia Yali MAZMUR 108 Bible Online

MAZMUR 108 - Ninia Yali bible

MAZMUR 108

¹Suni At Daud asuni.

² Nakni Allah, an den Hat hobam nenda mun wirikdoho dipdeg lahi, an de Hat hobam suni eheg, mot-habeheg, duruk katmin. An nebe su ketia holuk inamin

³An nambinggong gambus inim kecapi inim henoluk amek. An de o sekan dukwag ulug elelikoho lahi.

⁴TUHAN, an de it ap homi enunggul unuk-enunggul unuk angge enesahalimu etman. Hat hobam mot-hapuk katmin. It ap homi enanggelegma etman, an den suni Hat hebe mot-hapuk suni uruk katmin.

⁵Haren henda hundig nenepuk kahen on aire ebe humdeg lit o bohol fam huli-hulireg, ne Haren dipdoho neg nenepuk kahen on aire anggulog wereg huli etma deg.

⁶Nenakni Allah, Hat hebe handung-dang welahen ale ai bohol fam etma unug-hakin, ne Hat haseleg ombagbag welahen ale ai o kwenangma mundoho etma unug-hakin.

⁷ Hat homamne fam nit nenahap wendat nenebin, nit Hat homaliki Haren henda hundig nenepuk kahen on etma nenahap wendareg welamag ulug, niren Hat hobam somban uruk kahe on ai hesanggo hol nenebin.

⁸At Allah ebe wereg ma mun amu enegma[61] etmano en ele uruk kwit, “An de nahayeg en nawonog hauk kwit kwenang o Sikhem kwenang fam etmano yohwan dimin. Ne, o Sukot fanggong ele aire helep anggen wal-hauk hagdoho wal-hamin.

⁹It Gilead inim Manasye inim etare An nonggwareg nangge, Efraim aire An nunggul topi helep baja on fam hilinggig angge, ne Yehuda re An nebe raja unduhuk wereg lit melal-enepuk kahimu anyo nandomuk hag.

¹⁰Famen de Moab de An neyog horuruk kahimu; An den de o Filistea fahet unggul luhutuk kwit nawonog atuk kahi. Edom fam de at ebe ai An nonggwareg nangge ulug enegdoho, An neyog sepatu anyo obam hwik hauk kahi.” Ebag.

¹¹Ap san en An og-naplug o Edom etma lahu? Ap sa en An hondog naplug o helep lehet omamneroho wirigmu ai nobahaik lahu?

¹²Nenakni Allah, Hat de nit ninim lamihin fug a? Hat de nit nenautsi tentara laukmu ininim lamihin fug a?

¹³Nit ap homi en let nenebuk on aire we alemaroho hag deg ma re, it nenaselei on wereg ma etman Haren let nenebin.

¹⁴Nit nenakni Allah ninim de nenebe neben-heben deg lamuhuk; Aren neg nit nenaselei on etmano enalong elehapdoho fesehu.