Read Ninia Yali MAZMUR 109 Bible Online

MAZMUR 109 - Ninia Yali bible

MAZMUR 109

¹Ap homi en suni wilibi folug enebe ambine urukmu melal-enepuk on fahet. At Daud Asuni. Nakni Allah Hat hebe an den hundig-handig mot-hapuk kahi on, Hat hebe bik-bok welam fug,

²An de it ap homi enolok on mel ap homi seiale uruk on mel en enele seiale an deg lahe ale fahet, saharuruk on etmano en nowarukoho salik waharuk anggere.

³Iren de enele mun enerim fam enalitno napuk, ne ebe indip eleg kweleg we obahatman an nobam deg hag aleroho neg uruk.

⁴An den it fahet nenda hundig enepuk kwit enobahet somban uruk kweleg, iren an nobam fug mu hekip neauk

⁵An den it fam fano ale debeseruk kweleg iren onggo siag on neg nobaharuk, ne an den it fam nenda hundig enepuk kahi on etmano iren onggo enerim napuk.

⁶At ai obahet awene katukdoho balukwag ulug ap kwasikdoho neg duruk on eke unduhuk fein, at ebe it aselei on etman obam wene hekip howag.

⁷At ebe awene katukdoho balduk men at siag demdoho disi ale eneg deg lamag; ne aren somban uruk on aire siag deg boruk kamag.

⁸ At ebe oho folo-folo eleg aik lowag, ne aren yabuk seneg lit unduhuk wereg on ai oho ap amu on en hwelowag.

⁹It omaliki re wetien on aheg, at ohwe re sohwe on aheg dukwag.

¹⁰It omaliki re a obam moluluk esauk on anyo fam en muko[62] wilibi feserukmu, heng-heng angge atlug dag watil noruk on amag.

¹¹At angge di angge su angge etma re it baleg angge wereg on en onggo og-nesakiek ulug heng uruk on etmano en feleleng deheg, ne aren anggilik-anggoloroho hwelauk angge etma re ap homi en del-deheg, duruk kamag.

¹²Ap homi foma at obam fano ale eke duhup hayog, ite at omaliki lin-esasi on etma enelaheg esalug duhup hayog.

¹³Aren ondohoma on aire abirangge eleg fun uhup fano, at unuk de it fobik welamuhup on etman oho ebet hauk kamuhup hayog.

¹⁴At ombasi en siag duruk katswa etma At TUHAN en endama ebereg lamag, ne at isinga en siag disi on etma elehap debehup hayog.

¹⁵It enesiag etma At TUHAN en ebereg lit neg welamag, it enobahet ap homi kwenangma suma en eke ebet esahup hayog.

¹⁶Ap aire aren ap homi enelaheg esalug enenda enepuk ale re mun apeleg latsi. Aren de ap homi enenggik eleg on mel enebe anggilik-anggolo roho wereg on etmano mel siahap-biahapdoho feseruk katsi, ne ap homi enobabe elegdoho wereg on etmano aren binggi enowatuk katsi.

¹⁷At de ap homi hururung enepuk ale fahet de mun ahayeg deg latsi; at onggwareg at hururung deg lamag! Aren de ap homi enobam fanoap debeseruk alere mun apeleg latsi; at onggwareg fam oho fano ale eke atuk karuhu hayog!

¹⁸Aren ap homi hururung enepuk ale fahet de we seram angge deg latsi, we sum enebe fam labelduk hag deg latsi. Aren hururung enepuk katsi etma ik enebe beiyalik waharuk hag obam atuk kamag, ne ahalue hagdoho at owag fene etma beiyalduk kamag.

¹⁹Aren hururung enepuk katsi on ai en sum wandeg hagdoho labulig lamag, ne hundig-hundig ombahaluk hagdoho bug deg lamag.

²⁰TUHAN nakni, unggum ai it ap homi an nobam dopno neeheg, ne iren an nobahet siag on eheg, duruk on etma fam fesein.

²¹Famen de TUHAN Allah nakni, an neg de Haren sali irihin hagdoho let nabin, Hat henda fano on anyo fam inim ne henda hundig napuk kahen anyo fam inim nahap wendat-nabin.

²²An de nenggik elegdoho kunggureg lit anggolo siagdoho welahi, ne an nendama yebil ouk mun anggolo on hauk kahi.

²³An nebe re ap homi enahohwe o hubet baloho eleg atuk anyo hagdoho eleg ale famen, ne no bulue elel esauk anyo hagdoho eleg ale famen.

²⁴An nambilik hweang hagdoho neg weregman ne nelenggen mun elek-elek angge duruk, ne nebe re mun sabu ahi.

²⁵ Ap homi an inil neauk on en de enambiang hesingno duruk kwit bulip napuk.

²⁶Nakni TUHAN Allah Haren let nabin, Hat henda hundig napuk kahen on anyo higitdoho Haren nahap wendat nabin.

²⁷Ai fam de it naselei on etmano en fureberuk kwit Aire Haren dirihin ulug enoluk amuhup, Hat TUHAN anyo en neg dirihin bohup.

²⁸Iren an hururung napuk kweleg, Haren neg an fanoap nobaharuk kamuk. It enebe enam amuhup famen de it enenggali aruhu; Famen de an hamingming angge su neg de nahayehap nobahakun.

²⁹It ap homi an nobam fug mu dopno neauk on etma re it eneb sebeleg ale anyo on neg enobam aik waruhu, ne sum humon dag kwe wan-duruk on jubah anyo bug deg hag it enenggali on enobam sal-enebik waruhu.

³⁰Aren de ap enenggik eleg on etmano, ap homi en enebe binggi wat-enepul ulug durukmu inibil aheg, del enebeheg, durukmu re,

³¹An den nele mun buhundoho TUHAN mot-duruk katmin, it ap homi humdoho kabogdegman an den At unuk neg leho foruk katmin.