Read Ninia Yali MAZMUR 11 Bible Online

MAZMUR 11 - Ninia Yali bible

MAZMUR 11

¹Ap homi en suni wilibi folug enebe seberoho urukmu melal-enepuk on fahet, at Daud asuni su. An de At TUHAN fam neg nalong baleg wereg ma re; ap homi en hweag-nutuk kwit, “Suwe dom ma[8] daroho lauk hag hat hebe honggwareg en hahap wendat dakin, ulug hweag-nutuk on aire airoho uk fug alereg.

²It ap homi siag duruk on en de enasehen enggela ousale folug de, o heik deg ma etmano en ap homi bekitdoho neg duruk on fam bising-esakoho, dog sehen enggela fam kwelaboho fang deg lit wereg.

³Wene melaleg ap homi en diroho diyug suroho diyug ulug wereg on ai furoho hwale fouk fug angge welaman de, ap homi fano neg duruk on de nanggindul ulug henda firam alereg.” Uruk.

⁴TUHAN de obam boholma mun eneg ma etmano wereg, ne At ebe leho wereg lit hwerieg wereg ma re boholma etma wereg. Airoho wereg lit de ap homi mundoho en duruk ale etmano fahet At il wereg lit it enobabut di on su on duruk ale etmano mundoho At oluk deg.

⁵At TUHAN en de ap homi siag duruk on et fano neg duruk on et enobabut bal-esalug de, ap homi en enolok fam duruk ale aire Aren mundoho erim deg.

⁶Ap homi siag duruk on halug de Aren di anggin su anggin fam inim, indok fam inim, indok helep anggen on fam inim, ne hol han werag-enepuk on fam inim unggum og-esauk.

⁷At TUHAN aire fanoreg lit katukdoho neg durukmu re, ap homi fano neg duruk on de Aren enda hundig-enepuk, ne ap homi en bekitdoho neg duruk on de At TUHAN ebe enoluk aheg, inil heheg, duhup.