Read Ninia Yali MAZMUR 112 Bible Online

MAZMUR 112 - Ninia Yali bible

MAZMUR 112

¹TUHAN motdeg neg welamag! It ap homi wene melaleg furebelug deheg, TUHAN awene melaleg enambonoroho deheg, duruk on etma enahayeg boruk kamag.

²It ai enomaliki re o kwenang suma fam sebeleg welamahup, it ap homi fano neg duruk on enomiliki re fanoap debeseruk karuhu.

³It enahain elekwe on de enenggik wereg on aheg, enangge di angge su angge hum-hamdoho welaheg, deg lamuhup, ne it aire enebe fam di li em su li em etma enenda seroho neg welamuhup.

⁴Ap homi en bekitdoho neg deheg, katukdoho neg deheg, enenda hundig enebeheg, enelaheg en debeseheg, duruk on fam de selehap enepuk karuhu.

⁵It ap homi enenda fanoreg lit enangge enori amu on fam fobik obalma og-nuruhun en ulug og-eseheg, di on su on fahet wut-duruk kwit hwenaroho duk fug angge bekitdoho neg deheg, duruk on etma enahayeg boruk kamag.

⁶Ap fano ale neg duruk on de di on su on duruk ale fahet eke dahan atuk karuhu fug, at de di salim su salim hundig ebet neg hauk kamuhup.

⁷Aren TUHAN fam enda dipdeg lit enda hambuk deg ma re, wene abug siag on esanggo holuhu famen oho re akol duhu fug.

⁸It aselei on etmano enalong elehapdoho fohup ulug at endama boruk kwit de, aren endama akol deheg, enda hum fireheg, duruk karuhu fug.

⁹ Aren de angge di angge su angge it ap homi enenggik eleg on let-eseheg, ne at ebe along wereg on deg lit leho wereg ma ap homi along bolug leho forukmu, aren fano ale on neg debeseheg, duruk.

¹⁰A siag duruk on en inil halug de enolok duruk kwit, enahum kwe heren de enaeg kilit hauk. Airoho dulug it enebe eleg aik lauk; iren enenda ebereg wereg on anyo re mundoho-mundoho fahet longgo ik lauk.