Read Ninia Yali MAZMUR 113 Bible Online

MAZMUR 113 - Ninia Yali bible

MAZMUR 113

¹TUHAN neg mot-duruk kamek! Yaho hit TUHAN amingming angge on en, At TUHAN unuk neg mot-duruk kamek!

²Ketia inim fobik welamuhuk li em etma inim mundoho-mundoho, At unuk neg mitdeg motdeg welaruhu.

³Mo indip lahaik waharukmu en mo obuk ik laukmu etma huli en angge, At TUHAN unuk motdeg neg welaruhu.

⁴It ap homi enunggul unuk mundoho wereg on etmano enemberimmu At TUHAN en neg omamne wereg, At andung-dang wereg on ai en de bohol leho lit wereg.

⁵Nit nenakni TUHAN Allah ai higitdeg de sa eke wereg behep? Mun eleg. At ebe re obale mun lehoma etmano takhta fam hwerieg wereg.

⁶Famen de Aren kwenang inim bohol inim il fu haroho, konu uruk.

⁷Ap homi enenggik eleg on de kwenang ahe fam etman leho feseruk, ne ap homi enebe mundoho fililing ulug wereg on de ul ahe fam en og-enepuk.

⁸It anyo enebe ap enalong wereg on etmano ininim hwerie feseheg, ne it At omaliki on en ap enowesi yain-kain wereg on etmano ininim hwerie feseheg, duruk.

⁹Aren neg homi ibili on fam enomalik we onggoleg og-esauk, Aren hwe ai obam olma etma ahayeg wereg ma along bolug leho foruk kamag ulug deberuk. TUHAN eneg motdeg welamag!