Read Ninia Yali MAZMUR 115 Bible Online

MAZMUR 115 - Ninia Yali bible

MAZMUR 115

¹TUHAN nenakni Haren neg nit henda hundig nenepuk kwit welaheg, dipdoho neg nenebeheg, duruk kahen ai fam de, nit de fug o nenakni, nit de fug we Hat hamu neg mot-hapuk kamuhup.

²It ap homi enunggul unuk amu on en uruk kwit, “It enakni Allah aire ebe kema wereg uruk?”

³Allah nit nenakni re o boholma wereg, Aren de At onggwareg endama boruk ale neg duruk.

⁴ it enanggembu re emas mel perak mel en, ap homi enenggik en hilinggig on.

⁵It enambilik wereg famen de, enele uruk fug, inil hilinggig famen de inil en hauk fug.

⁶Enesanggo wereg famen de, enele uruk on holduk fug, enambiang wereg famen de amben sang hauk fug.

⁷Enenggik wilibig famen de enenggik en fag ha fug alereg, eneyog wereg famen de sobit-sobit la fug alereg, ne enanggolobag elman enele eke wilibik wam fug alereg.

⁸Ai deg ale higitdoho it ap homi enenggik en hilingguruk on mel, iren hilinggig angge ai fam enenda dip-deberuk on mel oho enebe airoho atuk[65] kamag.

⁹Yaho hit ap homi Israel on, TUHAN fam neg henenda ebereg lamek, we Aren neg henalong bal-henebeheg, let henebeheg, duruk.

¹⁰Yaho hit imam Allah il hanim duruk kahep henap, TUHAN fam neg henenda ebereg welamek, we Aren neg let henebeheg, henalong bal-henebeheg, duruk.

¹¹Yaho hit ap homi wene melaleg furebelug duruk kahep on, TUHAN fam neg henenda ebereg welamek, we Aren neg let henebeheg, henalong bal-henebeheg, duruk.

¹²At TUHAN en nit ebet-nenusug wereg ma Aren nit fanoap nenepuk karuhu, Aren de ap homi Israel on fanoap enepuk karuhu, ne it Imam Harun ambiangma mundoho inim fanoap enepuk karuhu.

¹³ Aren de ap homi wene melaleg furebelug duruk on, doron inim lohon inim fanoap debeseruk karuhu.

¹⁴At TUHAN en hit henobam inim hiren ondohoma on fam inim, we onggoleg henomalik humdoho og-hesauk kamag.

¹⁵At TUHAN o bohol kwenang wal-debag on ai en, hit henebe fam fanoap henepuk kwit neg welamag!

¹⁶O bohol aire At TUHAN amu angge, famen de kwenang de Aren ap homi fam og-esebag.

¹⁷It ap homi waratuk on en mel, it ap homi ap homi di angge su angge ele elegma wamburuk on en mel, TUHAN mot-duruk fug.

¹⁸Famen de nit nenoluk welahe on en neg de ketia inim fobik mundoho-mundoho At neg dang duruk kamul. TUHAN neg motdeg welamag!