Read Ninia Yali MAZMUR 116 Bible Online

MAZMUR 116 - Ninia Yali bible

MAZMUR 116

¹At TUHAN en de an den heng uruk kahi on omano fubi nobahakeg, nele esanggo holeheg, duruk ai en de At fam nenda hundig boruk kahi.

²Li hundig-handig an den nele At obam hweag-utuk kahi on de, Aren esanggo hol napuk.

³Waratuk on anyo an horogma aik waharuk; waratlug laukmu etmano fahet an namelmel aik waharuk ai fam, an nebe hambuk da fug aleroho mun namelmel neg atuk.

⁴Ai fam de an den TUHAN fam hwiruruk kwit de, “TUHAN nakni, Haren an nahap wendat nabin ulug heng hapuk kahi!”

⁵TUHAN aire mun enda hundig nenepuk kwit katukdoho neg duruk on; nit nenakni Allah aire enda hundig hum deg.

⁶It ap homi enobam nong-hongdoho deg on de At TUHAN en neg hwal-enepuk; an nomamne elegdoho duk fug aleroho deg ma Aren nahap wemdare nobaharuk.

⁷At TUHAN en nobam fanoroho neg nobaharuk kwit wereg ai fam, an nenda bik-bokdoho welahi.

⁸Waratuk on fam en TUHAN en an liloho wilibi nobahasi; an daloroho wat-dowag ulug fotog neauk fug, we Aren neg nendama onggone nobaharuk.

⁹Ai fam de At TUHAN en nalong baloho fahat nusug kweleg, an noluk o kwenangma suma eke nim welaruhuk.

¹⁰ An den uruk kwit, “An nebe anggin-fanggindoho hondo nusugmu welahi.” Uruk kahi famen, an nenda demdoho boruk kwit welahi.

¹¹An nenda mundoho nong-hong urukmu, an den uruk kwit de, “Ap misig fam ulug eke an nenda dip debelug welahi fug ha alereg.” Uruk kahi.

¹²At TUHAN enda fano en an nobaharuk ale ai fahet, an den onggo At og-irihi ha alereg?

¹³Aren let-napuk on fahet obam dangdoho re, an den anggur TUHAN obahet walug og-irik lamin.

¹⁴It ap homi At omaliki etmano enolohotman, an den nele sali wat-itihik on anyo dip debemin.

¹⁵At TUHAN en de ap homi At enda hundig deg on waratuk mu re, mun enelaheg boruk.

¹⁶TUHAN nakni, an sure Hat hamingming angge, an nisinga en Hat hobahet duruk katsi hagdoho an den oho airoho duruk kahi, an nebe sabu hetdoho weregman Haren neg loloho wilibi nobaharuk kahen.

¹⁷An den Hat dangdoho ulug hobahet di angge su angge walug yalik waharuk kwit, somban Hat hunuk yiko ik watmin.

¹⁸It ap homi Hat homaliki o Yerusalem kota bulmu etma, o TUHAN Obam wirigmu anyo en ambe lilimol balegma etma

¹⁹kabogdeg on etma enolohotman an den nele sali wat-hitihik on anyo dip debemin. TUHAN neg motdeg welamag!