Read Ninia Yali MAZMUR 118 Bible Online

MAZMUR 118 - Ninia Yali bible

MAZMUR 118

¹ At TUHAN aire ebe fanoreg lit, Aren enda hundig nenepuk on aire mun eitog eme welaruhu mu re, At TUHAN obam neg dang duruk kamek.

²Hit ap homi Israel on en halug henele uruk kwit de, “Aren enda hundig nenepuk on aire mundoho eitog eme welaruhu.” Uruk kamek.

³Hit ap Allah il hanim duruk kahep on imam etmano en uruk kwit de, “Aren enda hundig nenepuk on aire mundoho eitog eme welaruhu.” Uruk kamek.

⁴It ap homi wene melaleg furebelug duruk on en henele uruk kwit de, “Aren enda hundig nenepuk on aire mundoho eitog eme welaruhu.” Uruk kamek.

⁵An nebe fam anggin-fanggindoho wereg lit TUHAN fam nele hwiruruk kahimu; Aren ele onggo fag nealug, an fiselaroho nobaharuk.

⁶ An den TUHAN ninim wereg ma re an nebe elek-felek ihi ha fug alereg, it ap homi en diroho suroho ulug eke nobahauk fug alereg.

⁷At TUHAN en an let-napuk kaikoho an ninim wereg ma re, it naselei on etmano enalong elehapdoho feserukmu nil esahuk lit deg.

⁸Ap homi enomamne enobam dip-debelug wereg ale aire mun maben deg famen de, TUHAN en nalong balegma wereg ai neg de mun along.

⁹Ap yain-kain enomamne fam dip-debelug wereg ale aire maben deg famen de, TUHAN en nalong balegma wereg ale ai neg mun along.

¹⁰It ap homi an na weim on humdoho an mase nabik waharuk famen de, TUHAN omamne fam an den enalong elehapdoho feseruk kahi.

¹¹Iren de an nebe foma-foma en, nalukwe-nambol fil en mase nabik waharuk famen de; TUHAN omamne fam an den it enalong elehapdoho feseruk kahi.

¹²Iren de no kin en hagdoho an hwililip nabik waharuk famen de, TUHAN omamne fam an den it enalong elehapdoho feseruk kahi. Indok enggelangge sahalimu kulug nauk hagdoho deg ma, we misiham neg it enebe nahuli fesehup.

¹³An de it enomamne hasimeg nowarukoho dik waharukmu nebe mundoho bule wambik lauk kahi, famen de TUHAN en neg an let-napuk.

¹⁴ An den apne wauk kahi on ne an nebe nomamne anyo re TUHAN ai, Aren neg an nahap wendat napsi.

¹⁵TUHAN omaliki enobam sabo saleg kwe etman enalong ahesareg enahayeg en amit-mit duruk angge henesanggo holiek, “TUHAN en de mun alongdoho andung-dang wereg ale deheik!

¹⁶At TUHAN omamne en neg nit nenalonge feheik! At TUHAN en de mun alongdoho andung-dang wereg ale deheik,”

¹⁷An nebere wararuhuk fug famem de, At TUHAN en di angge su angge waldoho febag ale ai fahet fag-duruk karuhuk en noluk mundoho welaruhuk.

¹⁸At TUHAN en de mun al bereloho hagdoho an nobahasi, famen de Aren en nebe waratuk fam fotog neasi fug.

¹⁹An kwik watlug TUHAN dang duruk katmin en o TUHAN Obam ai sokole husi feiyek.

²⁰TUHAN obam asokole re su wereg ma re, we ap homi bekitdoho neg duruk on en kwe kwik la alereg.

²¹An den somban uruk kahi on Hat hesanggo hole folug; an nalongap nobaharihin mu, an den Hat neg mot-hapuk kahi.

²² It ap o helep on wituk kwit, helep su siag ulug embeseswa on anyo oboule doal atsi.

²³Ai airoho At TUHAN fulu-bolan ale ai debesimu, niren yanderuruk kahe.

²⁴Sure nukoho At TUHAN en ene fesi salim deg ma re, niren nenahayegdoho kabog-dukohon.

²⁵ TUHAN nenakni, Haren nit nenahap wendat-nenebin ulug heng hapuk kahe, nenakni TUHAN, Haren nit nenalonge nenobahain!

²⁶ Nenakni TUHAN unuk fam waha on su mot-dukohon, Niren Hat o TUHAN Obam wirigmu etman mot-hapuk kamul.

²⁷TUHAN aire ebe Allah deg ma, Aren nit nenobam enda kain atuk karuhu. Hit henebe esele henenggikmu ki-kei lohwaloho lauk kwit, TUHAN obahet waroho yaldukmu mezbah wirig on ai waling ha lakiek.

²⁸Hat hebe Allah deg lahenma an den Hat neg dang hapuk kahi, nakni Allah, an den Hat neg leho hobaharuk kahi.

²⁹TUHAN ai At ebe fano on deg lit enda hundig nenepuk on inim, dipdoho neg duruk on aire mundoho eitog eme welaruhu mu re, At fam neg dang duruk kamek.