Read Ninia Yali MAZMUR 119 Bible Online

MAZMUR 119 - Ninia Yali bible

MAZMUR 119

¹It ap homi en TUHAN Awene melaleg diroho diyug suroho diyug ulug baleg wereg on anyo fam neg holoho duruk kwit, enebe fam siag ale duk fug angge wereg on etma enahayeg boruk kamag.

²It ap homi TUHAN en diroho diyug suroho diyug ulug uruk ale anyo higitdoho deheg, ne enenda enebe abirangge en At TUHAN ebe hweag-daul ulug herareheg, duruk on etma enahayeg hauk kamag.

³It ap homi At TUHAN enda ahayeg hauk aleroho welaheg, ne siag duk fug angge welaheg, duruk on etma enahayeg hauk kamag.

⁴TUHAN nenakni, Hat hawene melaleg anyo niren dipdoho duruk kamag ulug, Haren og-nesauihin.

⁵An nenda hambuk deg lit, Hat hawene melaleg en uruk ale etmaroho neg mutlug lauk karuhuk lamag.

⁶Ne, an den lahe Hat Hawene melaleg etma fik-furebelug duruk karuhuk halug de, an nenggali ware nobahakup fug lit deg.

⁷Nakni Haren wene katukdoho neg kongdoho uruk kahen ale etma fik-furoho kumu halug de, an nenda mun fano fam Hat mot-hapuk kahi.

⁸An de Hat Hawene melaleg ai fam furebelug neg duruk karuhuk anggere, Haren an lohon lin nea fug.

⁹Ap sauwe on de Hat hawene melaleg en uruk ale anyo higitdoho duruk halug, at ebe fam siag on eke duk fug angge welam alereg.

¹⁰An nebe nenda abirangge en Hat hebe noluk amag ulug hera-hapuk kahi, Haren Hawene melaleg wereg on anyo fam en bosokandoho wilibik lowag ulug fotog nea fug.

¹¹Hat hil hanim an den siag dihi ha no ulug, Hat Hawene mamul-napuk kahen on anyo nendama fahat dauihik.

¹²TUHAN nakni, an den Hat mot-hapuk kahi, Haren Hawene melaleg unduhuk ferihin on etma an mamul-nutuk kamin.

¹³Haren wene melaleg og-nitihin on anyo an nele buhun fam dindilduk kahi.

¹⁴Ap homi en enengge di angge su angge fahat dalug hag de, Hat hawene melaleg en uruk ale higitdoho duruk ale fahet nahayeg napuk.

¹⁵Haren wene kongdoho ferihin on etmano an den kumureheg, ne diroho diyug suroho diyug ulug irihin on etmano furebeheg, duruk kahi.

¹⁶Haren wene unduhuk ferihin on etma fam an nahayehap kwelap napuk, ne Hawene hweag-nutuk kahen on etma an den napeleg aruhuk fug lit deg.

¹⁷An nebe noluk ekenim welaheg, ne Haren mamul napuk kahen on anyo holoho deheg, duruk karuhuk en de, Haren an hamingming angge su fam henda fano amin.

¹⁸Hat hawene melaleg mun fulu-bolan alereg ma hweag-nesauk kahen on ai an furoho kumu hauk karuhuk en nil fenggene fein.

¹⁹An de we elamna fahet o kwenangma suma welahi, Hat hawene melaleg ai an nolohotman heraho fouk fug.

²⁰Hat hawene melaleg ai nukoho hundig-handig kumu hauk kale ulug, nendama mun fulung baloho nobam liog urukmu welahi.

²¹It ap homi en Hat Hawene melaleg fam en dahandoho duruk on de Haren hururung enepuk kahen, ne ap homi winik-wonog uruk on de Haren enenggali wat-enepuk kahen.

²²An den haren diroho diyug suroho diyug ulug melaloho ferihin on anyo duruk kahimu re, it ap homi etman an sebeloho nobahakeg, enele mul-mul ale en an siaho nobahakeg, duruk on etma fam en fiselaroho nobahain.

²³It ap enalong wereg on en an nowarukoho lit nabug baluhup famen de, an hamingming angge su re Haren wene diroho diyug suroho diyug ulug melale ferihin on anyo kumu hauk kwit meneni yatdoho wenggelduk kahi.

²⁴Haren wene diroho diyug suroho diyug ulug unduhuk ferihin on aire, an komo napuk on ferihin mu nendama nahayeg ale neg nobaharuk.

²⁵An nebe re ul ahe fam yinggig welahimu; Haren hele sali irihin ale higitdoho an nebe hilinggi nobahain.

²⁶An den dirihik ale fag-durukmu Haren onggo hweag-nutuk kahen; Haren wene unduhuk ferihin on ai mamul-nutuk kamin.

²⁷Hat hawene melaleg[66] wereg on etma an den fik-fureberuk kamag ulug let-nabin, Haren mun fulu-bolan ale duruk kahen on etma an den kumu hauk kwit ebetuk karuhuk.

²⁸Anggin-fanggin nobam aik waharuk kwit an nenda mundoho si eheikma re, Haren hele sali irihin ale higitdoho nomamne nobahain.

²⁹Haren fano ale neg nenepuk kahen on ai fam, an kwe kwasik on fam la ale ulug Haren ohwale nobahain, Hat hawene melaleg ai neg hweag-nutuk kamin.

³⁰An de ele holoho neg duruk karuhuk ulug momal dauihik, Hat hawene melaleg etma an den hundig ebet hauk kwit neg welahi.

³¹TUHAN nakni, an de Haren wene diroho diyug suroho diyug ulug melaloho ferihin on anyo higitdoho neg duruk kahi, an nenggali amag ulug fotog nea fug.

³²Haren an wene fik-fureboukwag ulug nobaharuk kahenma re, Nenda nahayeg fam Hat hawene melaleg anyo furoho neg duruk karuhuk.

³³TUHAN nakni, wene Haren unduhuk ferihin mu wereg on ai an den ahae obog huli etma higitdoho neg duruk kwit welaruhuk en, Haren mamul nanbin.

³⁴Hat hawene melaleg ai an den holoho duruk kwit, ne nenda amu-amu eberuk fug angge duruk karuhuk en, Haren wenggele nobahain.

³⁵Haren diroho diyug suroho diyug ulug hweag-nesauk kahen on aire an nambono angge deg ma re, an den bug-bagdoho foroho laruhuk lamag.

³⁶An nenggik wereg on atuk ale ai mun sebeleg hag deg kweleg, Haren diroho diyug suroho diyug ulug melale ferihin on ai holoho neg duruk karuhuk en nenda omamneap nobahain.

³⁷An den we obahare on etmano fahet mutlug lauk kahi ha no Haren kahal nusug lamin, ne an nebe Hat henda hahayeg boruk kahen aleroho welamag ulug nobaharuk kamin.

³⁸Haren sali waroho ap Hat hele holoho neg duruk on fam og-esauihin on anyo, an hamingming angge su fam omamneap nobahain.

³⁹Hat hawene melaleg aire mun fano alereg ma re, it ap homi an sebele nobaharuk on fahet nakol boruk kahi on ai yatmaap debesein.

⁴⁰Haren de katukdoho deg ale neg duruk kahen, an de Haren wene kongdoho ferihin on anyo neg holoho duruk karuhuk ulug nenda omamneap deberihik mu re, Haren noluk keron og-nimin.

⁴¹TUHAN nakni, Haren an henda hundig napuk kahen ale fahet unug neakin, Haren hele sali irihin aleroho an nahap wendat nabin.

⁴²An de Hat hele anyo fam nenda dipdeg lit duruk kahimu re, ai fam it ap homi en an sebeloho nobaharuk ale fahet onggo hweag-esauk karuhuk.

⁴³An de haren wene kongdoho irihin on anyo fam neg nenda ebereg lit welahimu re, an den nele demdoho on neg uruk karuhuk en let neakin.

⁴⁴An de li mundoho-mundoho etma fam, Hat Hawene melaleg anyo bugdoho seneg laruhuk.

⁴⁵Ai fam de Haren wene hweag-nutuk on anyo holoho durukmu, an nebe fam koloroho neg welaruhuk.

⁴⁶Haren wene diroho diyug suroho diyug ulug hweag-nesauihin on aire an den it raja etmano fam enoluge fesehuk, an de nenggali hahuk fug lit deg.

⁴⁷Hat hawene melaleg aire an mundoho nenda hundig deg ma re, an nahayeg alere Hat hawene melaleg ai duruk ale fahet nahayeg deg.

⁴⁸An den de Hat hawene melaleg ai along bolug leho beheg, ne nenda hundig deheg, duruk kahi; Haren wene melaleg unduhuk ferihin on aire an den furoho wenggelduk kwit meneni ebetuk kahi.

⁴⁹An hamingming angge nobam sali nenda ebereg lit wereg on, wat-nitihin on anyo henda wenggel-hakiyug.

⁵⁰Haren wene sali wat-nitihin on ai fam de an nebe nolukap napukmu re, an nebe ouk-bouk hauk kweleg famen de ai en neg an nahayehap kwelap napuk.

⁵¹Ap winik-wonog uruk on en de an sebele nobaharuk, famen de an den Hat hawene melaleg anyo fam en bosokandoho eke lauk kahi fug.

⁵²O endam en angge Hat hawene melaleg welatsi on ai fahet nenda ebet hauk kahimu re, TUHAN nakni, we ai fam en an nenda nahayehap nobaharuk.

⁵³It ap homi kwasikdoho neg duruk on en Hat hawene melaleg anyo embeselug neg duruk en de, an mundoho nolok anggolo hauk kahi.

⁵⁴An nebe noluk we il horog angge deiya o kwenangma suma wereg lit de, Haren wene melaleg unduhuk ferihin on etma re an den suni Hat mot-hapuk on deberihik.

⁵⁵TUHAN nakni, o hup anggo re an den Hat neg ebet heauk kahi, ne Hat hawene melaleg anyo re an den mun bugdoho seneg lahi.

⁵⁶Haren diroho diyug suroho diyug ulug hweag-nesauihin on ai furebelug duruk fam de, an mundoho nahayeg hwelauk kahi.

⁵⁷TUHAN nakni, we Hat neg an nendama on deg lahi, Haren mamul-napuk kahen on etma an duruk karuhuk ulug nele sali irihik.

⁵⁸Haren an henda neowag ulug an nenda nebe inim mundoho en heng hapuk kahi, Haren hele sali irihin ale higitdoho an henda nealug nelaheg bein.

⁵⁹An de nonggwareg nobabut fahet mundoho ebet hauihik deg, Hat hawene melaleg wereg on anyo duruk karuhuk ulug nele sali watihik.

⁶⁰Haren diroho diyug suroho diyug ulug irihin on ai duruk ale fahet an den hihildil la fug angge we folo-folo aleroho neg duruk kahi.

⁶¹Ap homi enolok on en de an nobahet sabu yep duruk, famen an de Hat hawene melaleg anyo napeleg atuk kahi fug.

⁶²Hup andudu deg kweleg an noluk inatlug Haren wene mun katukdeg ale neg kong-duruk kahen ai fam, Hat mot-hapuk kahi.

⁶³An de it ap homi wene melaleg furebelug duruk on nim it ap homi Haren wene diroho diyug suroho diyug ulug wereg on anyo higitdoho duruk on abirangge inim mangmangno enepuk kahi.

⁶⁴TUHAN nakni o kwenangma suma Haren henda hundig enepuk kahen on anyo en hoporeg, wene Haren unduhuk ferihin etma an mamul nutuk kamin.

⁶⁵TUHAN nakni, Haren hele sali irihin on anyo mudoho dip deberihin, ne Haren an hamingming angge su fam fano ale neg nobaharihin.

⁶⁶An de Haren wene diroho diyug suroho diyug ulug irihin on anyo fam nenda dip-deberuk kahimu re, Haren an nenda enggaron og-nereheg, noluk amag ulug on og-nereheg, din.

⁶⁷Owan onggum og-nom fug mu re an den wene melaleg dahandoho neg duruk katihik, ketia re, Haren wene diroho diyug suroho diyug irihin on anyo bug-bagdoho seneg lahi.

⁶⁸Hat hebe fano on deg lit fano ale neg napuk kahenma re, Haren wene melale unduhuk ferihin on etma an mamul-nutuk kamin.

⁶⁹Ap winik-wonog uruk on en de an enalitno napuk, famen an de Haren wene kongdoho ferihin on anyo nenda mundoho en hol-ho neg duruk kahi.

⁷⁰It ap aireg enap etman de fureberuk fug, famen an neg de Hat hawene melaleg ai en nendama mun homo nobaharuk.

⁷¹Haren wene melaleg diroho diyug suroho diyug ulug ferihin on ai an furoho noluk amag ulug aire, eiyale Haren an unggum og-nutuk kahen.

⁷²O kwenangma suma emas inim perak inim wereg famen de, an den de Hat hawene melaleg aire mun along angge deg lahi.

⁷³We Haren neg an nebe buhundoho wal-napihin, Haren wene diroho diyug suroho diyug ulug wereg on ai mamul-dauk karuhuk en de, an wenggelduk on og-nimin.

⁷⁴An de Haren sali wat-nitihin ai fam neg nenda ebereg welahimu re, at ap homi wene melaleg furebelug duruk on an inil nealug de enahayeg hauk.

⁷⁵TUHAN nakni, wene Haren kong-duruk kahen on etma re we katukdoho neg kong-duruk kahen ale ai an mun noluk, Haren we dipdoho neg duruk kahen anyo fam an unggum nobam ferihin.

⁷⁶Haren an hamingming angge fam sali wat-nitihin ale anyo higitdoho, Haren henda hundig napuk kahen on ai fam an nahayehap kwelabe nobaharuk karuhun lamag.

⁷⁷Hat hawene melaleg aire mun nendama homo nobaharukmu re, Haren henda nenahun fam an noluk eke nim welaruhuk.

⁷⁸It ap winik-wonog uruk on en an nabug siahapdoho fousa ma re it enenggali amag, famen an neg de Haren wene diroho diyug suroho diyug irihin on ai neg meneni yatdoho ebetuk karuhuk.

⁷⁹It ap homi wene melaleg furebelug duruk on mel, ne it ap homi Haren wene melaleg anyo enoluk deg on mel, etma mundoho an nakit waharuk kamuhup lamag.

⁸⁰An nenggali am no ulug, Haren wene unduhuk ferihin on ai fam en an den dahandoho duhuk hayog.

⁸¹Haren an nahap wendat nabik walep ulug an nendama mun fu napukmu welahi; an den Haren wene sali irihin on anyo fam ebereg lit welahi.

⁸²Haren wene sali irihin on ai dip deboukwag ulug nangno heauk men an nil mundoho eleruruk, an den uruk kwit de, “Nanggig li em Haren an nendama nahayehap nobahamihin abi?” Uruk kahi.

⁸³Nahep de ikwag ahap songgopnu duruk on hag atuk, famen de Haren wene unduhuk ferihin on aire an mun napeleg atuk fug.

⁸⁴Ke huli an hamingming su bok wereg lit nangno hauk karuhuk? Nunggwe salim Haren ap homi an sik-mug neauk on etma unggum og-esahun?

⁸⁵It ap homi Hat Hawene melaleg fam holoho duruk eleg on etmano en, an neyog kobogdoho wambukwag ulug kwenang habulduk.

⁸⁶Hat Hawene melaleg aire eke embesouk on wereg fug mundoho obam dip-debelug welam on neg de, wene indip eleg kweleg an obahatman mug-neauk en let-nabin.

⁸⁷Iren an nebe mun binggi nowatlep, famen de Haren hawene melaleg aire an den eke embeseruk kahi fug.

⁸⁸An den Hat hawene melaleg ai holoho neg duruk karuhuk en de, Haren henda hundig nusug lit neg welahen on anyo fam nahap wendat nabin.

⁸⁹TUHAN, Hat hele airoho mundoho-mundoho omamnereg wereg, o bohol fam etma mun eitog eme at welatfag.

⁹⁰Haren dipdoho neg duruk kahen on anyo aham duk fug angge ketia huli en fobik huli etma welaruhu, Haren neg kwenang unduhuk ferihin mu mundoho obalma wereg.

⁹¹Ketia wereg angge ai abirangge re we Hat hele mingming fam en neg wereg, it ai enebe abirangge re Hat hamingming angge neg deg ma re.

⁹²Hat hawene melaleg ai ai nahayehap kwelabuk fug angge hag deg lalepman de, an nebe anggin-fanggin hauk kalereg mundoho warale lit deg.

⁹³An den Hat hawene melaleg ai fam Haren an nolukap kwelabe nobaharuk kahenma re, li mundoho-mundoho etma Hat hawene memaleg ai an den eke embeselug duruk karuhuk fug.

⁹⁴An nebe re Hat honggwareg hangge at deg ma, ne an den de Haren wene kongdoho unduhuk ferihin on anyo mundoho holoho neg dirihik mu re, an nahap wendat nabin.

⁹⁵Ap homi enolok on en de an nowatul ulug nangno napuk kwit wereg, famen de an de Hat hawene melaleg etma neg fureberuk katmin.

⁹⁶An den nil hauk kwit de mun fano wereg boruk kahi on famen oho re huli-huli wereg ma hauk kahi, we Hat Hawene melaleg neg de mun fano neg wereg.

⁹⁷Hat hawene melaleg fahet de an mundoho nenda hundig boruk kahi; nukoho hunduko kumu hauk kwit ebetuk kahi.

⁹⁸An de Haren wene diroho diyug suroho diyug irihin on, wene ai en it naselei on etmano enapeleg kweleg an nenda werehap nobaharuk on ai fahet hundig ebetuk kahi.

⁹⁹An den Haren wene diroho diyug-suroho diyug ulug wereg on ai kumu hauk kwit ebetuk kahimu re, it an naknisi guru en enoluk deg on de sebeleg hag deg kweleg an neg de mun alongdoho noluk deg.

¹⁰⁰An de wene Haren kondoho irihin on etma seneg lit welahimu re, it ap nowesi log-lohon en enoluk deg on de sebeleg hag deg kweleg an neg de mun alongdoho fureberuk kahi.

¹⁰¹An de wene Haren hweag-nutuk on ai fam neg holoho duruk katmin ulug de, enobabut mun kwasiksoho neg duruk ale on aire mundoho ahayeruruk kahi.

¹⁰²An de Haren neg mamul-napuk kahenma re, Hat hawene melaleg etma an den eke embeseruk kahi fug.

¹⁰³Hat hele aire unduk mundoho mit deg, unduk de kin ahalue mit deg alere horog hareg famen de ai neg de mun alongdoho mit deg.

¹⁰⁴Hat hawene melaleg ai en de an mundoho nenda enggare nobaharukmu re, enobabut mun hwena-hwena duruk ale aire an den mundoho nerim duruk kahi.

¹⁰⁵Hat hele ai eral lampu hag en de an neyog lauk kwe ambogbag napuk, ne an kwe fam lowag ulug selehap napuk on wereg.

¹⁰⁶Haren wene katukdoho kong-deberihin on etma fahet an den mun seneg laruhuk ulug nele hombuk baloho nele sali watihik on aire, an den mundoho nele irihik aleroho dip debehuk.

¹⁰⁷TUHAN nakni, an de nebe mundoho ouk anggolo hauk kahi, Haren wene sali irihin aleroho an nebe hwal-napuk kamin.

¹⁰⁸TUHAN nakni, an den Hat dang hapuk kwit somban uruk kahi on ai holoho weheg, ne Haren hawene melaleg ai an mamul-nereheg, din.

¹⁰⁹An de nebe eleg am aleroho duruk kahi, famen de Hat hawene melaleg de napeleg atuk kahi fug.

¹¹⁰It ap enolok on en de an nobahet sabu yep napuk, famen an de[67] Haren wene kongdoho unduhuk ferihin on anyo fam en dahandoho wilibik lauk kahi fug.

¹¹¹Haren diroho diyug suroho diyug ulug irihin on aire an den nangge mundoho-mundoho fahat dalug laruhuk angge, mun nendama nahayehap napuk angge.

¹¹²An de wene Haren ferihin on ai neg holoho duruk men, nebe mundoho eleg aruhuk ulug nendama mundoho omamne deberihik.

¹¹³An de Hat hawene melaleg ai fam mun nenda hundig boruk kahi, ne ap homi enenda osokoreg lit Hat hobam dipdoho duruk on etma an den mun nerim enusug lahi.

¹¹⁴We Haren neg an nibil aheg, nalong bal-nabeheg, duruk kahen, an de Haren wene sali irihin on fam neg nenda ebereg welahi.

¹¹⁵Yaho hit ap kwasikdoho neg duruk henap etma, an wereg ma embeselug henengge yatma lakiek! An de nakni Allah ele melaleg ai neg holoho duruk katmin.

¹¹⁶An nebe noluk welamag ulug, Haren hele sali irihin ale muko an nomamneap nobahain, an nenda ebereg weregman nenda wat-dowag ulug nobahauk fug.

¹¹⁷An nahap wendareg wereg lit hundig-handig Haren diroho diyug suroho diyug ulug melaleg wereg on anyo fureberuk kamag ulug, henggik en aho nobahain.

¹¹⁸Ap homi Haren wene unduhuk ferihin on anyo fam en dahandoho duruk on de og-enepuk kahen fug. Iren enele fam en seiale wene uruk on aire we obahare ale neg uruk.

¹¹⁹It ap homi kwasikdoho neg duruk on etma re Haren we ololong angge hagdoho deg boruk kahen, ai fam an de Hat hawene melaleg anyo fam nenda hundig deg lahi.

¹²⁰Hat hobam nenda mun nakol en de nowag elek-elek angge duruk kahi, wene Haren kongdoho uruk kahen on etma fahet an nenda mundoho hambuk ha fug aleroho napuk.

¹²¹An de wene mundoho katuk deg ale deheg, demdoho on neg deheg, dirihik anggere, an nebe oko it na weim on enenggikmu nobahauk fug.

¹²²Hat let-hapuk karuhuk ulug Haren sali wat-nimin, it ap lahik-lahog angge neg duruk on etman an sebel neauk kamuhup hayog.

¹²³Haren an nahap wendaroho let-nabik wamag ulug nangno heauk men neg de nil mundoho ouk dil lauk, an de Haren fiselaroho wilibi hobahakuk ulug abug hweag-nitihin on anyo nangno hauk kahi.

¹²⁴Hat henda hundig napuk kahen aleroho fam an airoho neg nobahain, Haren wene unduhuk ferihin on ai mamul-nutuk kamin.

¹²⁵An de Hat hamingming angge deg lahimu, Hat hawene melaleg anyo fureberuk kamag ulug, Haren nobaharuk kamin.

¹²⁶TUHAN nakni, Ap homi en Hat hawene melaleg anyo dahandoho durukmu re, Haren dukwag ulug ketia aik waharuk.

¹²⁷Haren wene diroho diyug-suroho diyug ulug wereg on aire, emas sebeleg hag deg kweleg mun leho, emas mun wirik on oho re mun sebeleg neg.

¹²⁸Ai fam an de Haren diroho din suroho din ulug uruk kahen aleroho welahi; enobabut hwenaroho duruk ale etma re nobam lelereg lahi.

¹²⁹Haren wene melaleg wereg on aire mun fulu-bolan alereg ma mun nowag elek napuk, ai fam de an nenda mundoho fam holoho neg duruk kahi.

¹³⁰Ap enegdoho ulug urukmu re, Haren hweag-nutuk kahen on ai en nendama selehap napuk, ap homi enebe bukireg on fam en oho re enendama wenggel esauk.

¹³¹Hat hawene melaleg ai fahet nenda fu napukmu re, nendama sat lahaik-wambuk duruk kahi.

¹³²Haren ap homi Hat fam eneda hundig hapuk henda hundig enepuk kahen hag, An nibil horohole enden atlug henda hundig neakin.

¹³³Haren wene sali irihin aleroho an nowag lauk ale Haren omamne nobahain, siag on en an sebel nusug lamag ulug fotog nea fug.

¹³⁴An den Hat hawene melaleg anyo holoho duruk kamag ulug, it ap homi an nobam anggin-fanggin nobaharuk on etma fam en fiselaroho nobahain.

¹³⁵Hat horohole fam en an fanoap nobahain, ne Haren wene melaleg ferihin on ai an hundig mamul napuk kamin.

¹³⁶Hat hawene melaleg ai holoho duruk elegma, an nilue ik hagdoho bealug wamburuk.

¹³⁷TUHAN nakni, Haren de mun katukdoho neg duruk kahen, Hat hawene melaleg etma re mun higit ale neg deg.

¹³⁸Haren diroho diyug-suroho diyug ulug hweag-nesauk kahen on etma re mun katuk deg ale neg deg ma re mun obam dip-debouk ale neg deg.

¹³⁹It naselei on etmano en wene Haren hweag-nesauk kahen on anyo enepeleg atlug durukmu re, an nolok en nahummu ahe mondotlug laharuk.

¹⁴⁰Haren wene sali irihin on aire mun omamnereg ma re ai fam dip deberuk kam alereg, an den de mun nenda hundig deg lahi.

¹⁴¹An de nebe mun dotdeg lit sebeleg lahi, famen de wene Haren hweag-nutuk kahen on aire eke dahan deberuk kahi fug.

¹⁴²Haren wene katukdoho neg uruk kahen on aire mundoho-mundoho welaruhu, ne Hat hawene melaleg aire mun dem ale neg deg.

¹⁴³Anggin-fanggin inim, di on su on duk fug aleroho nim, nobam aik waharuk, famen de wene Haren unduhuk ferihin on etman an nahayehap kwelap napuk.

¹⁴⁴Haren diroho diyug-suroho diyug ulug wene ferihin on aire mun katukdoho neg deg, an noluk ekenim welamag ulug Haren wenggeleg on ekenim og-nimin.

¹⁴⁵TUHAN nakni, an de nenda ebe fam Hat hwi hapuk kahimu, hele onggo hweag-nimin, an de Hat hele melaleg neg holoho duruk karuhuk.

¹⁴⁶An den de Hat dang hapuk kahi; an nahap wendat nabin, an de Hat hawene melaleg wereg on ai seneg lit welaruhuk.

¹⁴⁷O mun hubet-habetdoho inatlug Haren let-nabukwag ulug hwi hapuk kahi; an de Haren wene sali wat-nitihin on anyo fam nenda ebereg welahi.

¹⁴⁸Haren wene hweag-nutuk kahen on anyo bilinggulug ebetmin ulug, Hup andundu angge noluk feiyaloho inatuk kahi.

¹⁴⁹TUHAN nakni, Hat henda hundig en an nele hesanggo hol nabin, Haren katukdoho neg duruk kahen anyo fam an nebe hwal-napuk kamin.

¹⁵⁰Ap homi an mug-naplug waharuk on de mun horog aik wahesa, iren de enenda wene siag on foroho lit de, Hat hawene melaleg anyo re embeseruk.

¹⁵¹Famen de TUHAN nakni, Hat de hebe re mun horogdoho welahen, Haren diroho diyug suroho diyug ulug uruk kahen on etma re mun demdoho on neg.

¹⁵²O endam en angge wene Haren hweag-nesauk kahen on anyo fam en noluk atuk kwit, Haren de li mundoho-mundoho fahet ulug unduhuk ferihin.

¹⁵³Hat hawene melaleg anyo an den de eke embeseruk kahi fug mu re, an hil fu nealug nahap wendat nabin.

¹⁵⁴An nawene fahet nibil atlug nebe fiselaroho nobahain, Haren wene sali irihin aleroho an nahap wendat nabin.

¹⁵⁵It ap homi kwasikdoho duruk on de Hat hawene melaleg anyo holoho duruk fug mu re, enahap wendat-enebehen fug ha alereg.

¹⁵⁶TUHAN nakni, Haren henda hundig nesauk kahen on aire mun hum aleroho nenepuk kahen, Haren mun katukdeg ale neg duruk kahen anyo fam an nahap wendat nabin.

¹⁵⁷Ap homi enebe humdoho en an inilem naplug mug neauk, kweleg de haren diroho diyug suroho diyug ulug melaleg wereg on aire an den embeseruk kahi fug.

¹⁵⁸It ap enahwena enap ai esalug de Hat hawene hweag-nesauk kahen on ai mutlug lauk fug mu, mun nerim esauk kahi.

¹⁵⁹TUHAN nakni an den Hat hawene melaleg anyo fam nenda hundig duruk kahi ale ai hil neakin, Hat henda hundig anyo fam nahap wendat nabin.

¹⁶⁰Hat hele aire mun abirangge demdoho neg, Hat hawene melaleg mun katukdeg on etma re mundoho-mundoho welaruhu.

¹⁶¹Wene indip eleg kweleg ap enalong wereg on an mug-neauk, famen de we Hat hawene melaleg ai fam neg an nakol boruk kahi.

¹⁶²Ap en enangge di angge su angge hwelauk hag, Haren wene sali irihin on aire an mundoho nahayehap napuk.

¹⁶³Enele seiale uruk on etma re mundoho nerim duruk kahi, famen de Hat hawene melaleg neg de nenda hundig duruk kahi.

¹⁶⁴Hat hawene melaleg aire mundoho katuk deg ma re, an den hundig-handig Hat hobam dang hapuk kahi.

¹⁶⁵Ap homi Hat hawene melaleg fam enenda hundig duruk on de enakol eleg angge enebe fam seroho welamuhup, it fam eke kwe bal ale enebuhup fug.

¹⁶⁶TUHAN nakni, an de Haren enahap wendat-enepuk kahen on anyo fahet nangno hauk kahi, ne Haren diroho diyug suroho diyug irihin on etma re duruk kahi neg.

¹⁶⁷Haren diroho diyug-suroho diyug irihin wene anyo an den holoho neg duruk kwit, nendaman mundoho nenda hundig duruk kahi.

¹⁶⁸Haren de an duruk kahi ale etmano mundoho neauk kahenma an den de Hat hawene melaleg inim, diroho diyug suroho diyug ulug wereg on nim higitdoho neg duruk kahi.

¹⁶⁹TUHAN nakni, Haren hele sali irihin aleroho, an fureberuk on og-nimin, an den hwi hapuk kahi on ai Hat wereg ma aik waharuk lamag.

¹⁷⁰An den heng hapuk kahi on ai Hat wereg ma aik waharuk lamag, Haren wene sali irihin aleroho an nahap wendat nabin.

¹⁷¹Haren wene unduhuk ferihin on etmano mamul-nutuk kahen ai fam, an den Hat hundig-handig mot-hapuk kahi.

¹⁷²Haren hawene melaleg aire mun katukdoho neg deg ma re, Haren hele sali irihin on ai fahet an den hundig mot-hapuk kahi.

¹⁷³An de Hat hawene melaleg ai neg mutlug lauk karuhuk ulug momal-dauihik mu re, Hat henda fano en an let-napuk karuhun lamag.

¹⁷⁴Haren enahap wendare feseruk kahen on anyo fam nahap wendare nobahalen ulug nenda fu napukmu welahi, Hat hawene melaleg ai en an nendama nahayehap napuk.

¹⁷⁵Hat mot-hapuk karuhuk en an noluk welaruhuk fano, wene Haren unduhuk ferihin on ai fam an let-napuk karuhu lamag.

¹⁷⁶An de domba en longgo uruk on hagdoho longgo uruk kahi, ne an de Hat hawene melaleg anyo dahan deberuk kahi fug mu re, Hat hebe watlug an hamingming angge su hera nabik manu.